Խնձոր

Jump to navigation Jump to search
Խնձոր

Խնձոր (Apple) Երկար Ժամանակ թարմութիւնը պահպանող ,քիմքային բարձր արժէքով այս պտուղը բոլոր կլիմայական գօտիներու մէջ կը համարուի կենսանիւթերու եւ հանքային աղերու աղբիւր: Կը պարունակէ մինչեւ 80-85% ջուր, շաքարը մինչեւ 7-15 %, բջիջանիւթ, փէքթիններ, օրկանական թթութեր, տապաղանիւթեր, կենսանիւթեր, եթերային իւղեր, հանքային աղեր, ֆիթոցիթներ: Փոթասիումի բարձր պարունակութեան եւ թանինի շնորհիւ կ'արգիլէ միզաթթուի կուտակումը մարմնի մէջ: Խնձորի ցած քալորականութիւնը զայն կը դարձնէ անփոխարինէլի գիրութենէ տառապողներու համար, իսկ պարունակած փէքթինային նիւթերը կը նպաստեն մարմինէն քոլեսթրոլի արտաքսմանը: Թթու տեսակի խնձորները իրենց պարունակած օրկանական թթուներու մեծ քանակի շնորհիւ խորհուրդ կը տրուի օգտագործել թերթթուային կասսթրիթներու, սփսթիկ քոլիթի, լեղիի կանգումի, ինչպէս նաեւ թունաւորումներու ժամանակ: Խնձորի քաղցր տեսակները նախընտրելի են գերթթուային ստամոքսաբորբի, խոցային հիւանդութեան պարագային: Խնձորի հիւթը ունի ցած քալորիականութիւն, հարուստ է երկաթով, հետեւաբար՝ օգտակար է արեան տկարութեան ժամանակ: Հիւթը հարուստ ըլլալով փէքթինային նիւթերով ունի մարմինը թափոններէ մաքրելու յատկութիւն: Ան կը նպաստէ երիկամի քարերու հեռացմանը, կը բարելաւէ շնչական սիստեմի աշխատանքը յատկապէս ծխողներու մօտ: Խնձորը օգտակար է ճարպակալման, աթերոսկլերոզի, արեան բարձր ճնշման, փոտակրայի, լիարդի եւ երիկամներու քրոնիկ հիւանդութիւններու ժամանակ: Օգտակար է առողջութեան համար խնձորով բեռնաթափման օրերը, երբ ամբողջ օրը պէտք է ուտել միայն 2քլկ. խնձոր: Խնձորը ինչպէս նաեւ վարունգը, նախընտրելի է ուտել կեղեւով, լաւ լուալէ ետք, քանի որ անոնց պարունակած սննդային արժէք ունեցող նիւթերը կը գտնուին կեղեւի մէջ: «Խնձոր կերէ՛ք լաւատես ըլլալու համար» կ'ըսեն ֆրանսացիները: «Խնձոր կերէ՛ք բժիշկէն հեռու մնալու համար», կը հաստատեն անգլիացիները:

Աղբիւրներ[Խմբագրել | Խմբագրել աղբիւրը]

Առողջութիւնն ու Սնունդը Գոհար Վարդանեան Քեշիշեան Պէրութ 2007