Զաքինթոս (կղզի)

Զաքինթոս նահանգին քաղաքապետութիւնները – 1․Զաքինթոս, 2․Ալիքօն, 3․Արքատի, 4․Արթեմիսիա, 5․էլաթիօն եւ 6․Լաղանա։ Իսկ նկարին վարը, փոքրիկ 1-ով նշուած՝ Սրոֆատես կղզիները, Զաքինթոսի քաղաքապետութեան մաս կը կազմեն։

Զաքինթոս (յուն․՝Ζάκυνθος)․ մայրաքաղաքը՝ Զաքինթոս։ Յոնիական Ծովուն կեդրոնական կղզիներէն, Յունաստան։ Վենետիկցիներուն նախասիրած կղզին․ անոնք կղզիին տուած են Ֆիորօ թու Լեվանթէ ( Φιόρο του Λεβάντε․ թարգմ․՝ Արեւելքին ծաղիկը) եւ Ծանթէ անունը։ Տարածութեամբ՝ Յունաստանի 11-րդ կղզին է։ Իսկ Յոնիական կղզիներուն՝ երրորդը եւ բնակչութեամբ՝ երկրորդը։

Անոր ծովափները Յոնիական կղզիներուն լաւագոյններէն են։ Մայրաքաղաք Զաքինթոս, արեւմտեան Եւրոպայի մեծագոյն բնական նաւահանգիստն է․ կը գտնուի հսկայ ժայռի մը ստորոտին, ուր Տիոնիսիոս Սոլոմոս գրած է «Երգն Ազատութեան» Յունաստանի ազգային ոգերգը։ Այս կղզիին մէջ զբօսաշրջիկութիւնը շատ զարգացած է եւ ամէն տարի հազարաւոր զբօսաշրջիկներ կ'ընդունի։

Աշխարհագրութիւն[Խմբագրել | Խմբագրել աղբիւրը]

Զաքինթոս

Զաքինթոսի տարածութիւնն է՝ 406 ք․քմ․ եւ բնակչութեան թիւը՝ 40 758 է, ըստ 2011-ի մարդահամարին։ Հեռաւորութիւնը Պեղեպոնեզի Քիլլինի նաւահանգիստէն 9,5 ծովային մղոն է, իսկ Քեֆալոնիա կղզիէն՝ 8,5 ծ․ մղոն։

Բնակիչները կ'անուանուին Զաքինթյի կամ՝ Զաքինթինի ΖακύνθιοιΖακυνθινοί․

Կղզին կը նմանի անկանոն եռանկիւնի մը։ Զաքինթոսի հիւսիսի սրածայր մասին հրուանդանը Սքինարի (Σκινάρι ) կը կոչուի, իսկ հարաւը, երկու ծայրամասերու հրուանդաններուն միջեւ՝ արեւմուտքէն Մարաթիա եւ արեւելքէն Ղերաքաս, կը կազմուի Լաղանա Ծոցը։

Լաղանա Ծոցին մէջ կը գտնուին երեք կղզիակներ՝ Մարաթոնիսի, Այիոս Սոսթիս եւ Փելուզօ։ Իսկ աւելի վար, Ծոցին բացերը՝ Սրոֆատես կղզիները։

Մարաթիա հրուանդանը

Զաքինթոսի արեւմտեան դարվար ափերը, Վրահիոնաս լերան ստորոտներն են եւ կը պահպանուին Natura 2000 Յատուկ Պահպանման Գօտի արձանագրութեամբ։

Կլիմայ[Խմբագրել | Խմբագրել աղբիւրը]

Զաքինթոս կղզին Միջերկրականեան մեղմ յատկութիւններով կլիմայ ունի։ Նոյեմբերէն մինչեւ Յունուար անձրեւները յաճախակի են։ Ամառը՝ ընդհանրապէս տաք է եւ չոր։

Երկրաշարժներ[Խմբագրել | Խմբագրել աղբիւրը]

Կղզին ենթակայ է երկրաշարժի յաճախակի զօրաւոր ցնցումներու։ Պատմութեան ընթացքին պատահած են բազմաթիւ կործանիչ երկրաշարժներ․ 16 Ապրիլ 1469-ին, 1513-ին եւ 1514-ին՝ կը քանդուի հին մայրաքաղաքը եւ Պոհալի ու Այիօ Իլիա բլուրները իրարմէ կը հեռանան, 1622-ին՝ Այիօ Սոսթիս հրուանդանը կղզիէն կը բաժնուի եւ կը կազմէ համանուն կղզիակը Լաղանա Ծոցին մէջ, 1742-ին՝ ամբողջ կղզին կը ցնցուի բազմաթիւ յետերկրաշարժային ցնցումներէ։ Կործանիչ կ'ըլլան նոյնպէս 1768-ի, 1809-ի, 1820-ի, 1840-ի, 1893-ի եւ 1912-ի երկրաշարժները։

1953-ի Երկրաշարժը[Խմբագրել | Խմբագրել աղբիւրը]

12 Օգոստոս 1953-ին 7,1 ռիխթըր ուժգնութեամբ կործանիչ երկրաշարժը հիմնովին կը քանդէ կղզիին բոլոր կառոյցները եւ շէնքերը։ Կանգուն կը մնան միայն Այիօ Տիոնիսիս եկեղեցին, Ազգային Դրամատան շէնքը եւ Ամօ գիւղաքաղաքին դպրոցը։

Կործանիչ երկրաշարժէն տասնամեակ մը ետք, կղզին կը վերագտնէ ինքզինք եւ շէնքերը կը կառուցուին Հակաերկրաշարժային Ծրագիրի օրէնքներուն համաձայն։ Այսպիսով կղզին կը դիմանայ (փոքր վնասներ ունենալով) յաջորդող զօրաւոր երկրաշարժներուն՝ 1980-ին, 1990-ին (6,2), 2006-ին (5,9) եւ 26 Հոկտեմբեր 2018-ին (6,8)։

Պատմական անդրադարձ[Խմբագրել | Խմբագրել աղբիւրը]

Առասպել եւ անուանում[Խմբագրել | Խմբագրել աղբիւրը]

Հոմերոս «Իլիատա» եւ «Ոդիսական» դիւցազներգութեանց մէջ, Զաքինթոսը կը նշէ իբրեւ υλήεσσα , որ անտառներով ծածկուած կը նշանակէ։ Զաքինթոս (Ζάκυνθος ) անունը յառաջացած է Ὑάκινθος (Եաքինթոս) կղզիին վրայ տարածուած ծաղիկէն։ Հնադարեան շրջանին, կղզիին բնակիչները կը հաւատային, թէ սեռած են Տարտանոս թագաւորին որդի Զաքինթոսէն։ Անոնք հիմնած են Սպանիոյ արեւմտեան ափերուն Սակունտ (Sagunt) գաղթօճախը։

Կղզիին անունը Գծային Բ․ գիրերով արձանագրուած գտնուած է արեւելեան Պեղոպոնեզի ծովեզերեայ Փիլոս (Pylos) (կամ՝ Navarin) քաղաքին մէջ, Միկինէական շրջանին պատկանող գերեզմանաքարի մը վրայ։

Ըստ Հոմերոսի Ոդիսականին, Զաքինթոս Դրոյեան պատերազմին 12 նաւերով մասնակցած է։

Հնադար[Խմբագրել | Խմբագրել աղբիւրը]

Պարսկական պատերազմներուն ընթացքին, կղզին չէզոք դիրք կը բռնէ եւ ընդհարումներէն հեռու կը մնայ։ Անոնց յաջորդող Պեղոպոնիզեան Ա.Պատերազմին Ք․Ա․ 459-446 թուականներուն Զաքինթոս Աթէնքի հետ կը դաշնակցի։ Նաեւ Աթէնքի կողքին կը մասնակցի Սիցիլիոյ (Սիքելիոյ) արշաւանքին Ք․Ա․ 415-143 թուականներուն:

Հռոմէական եւ բիւզանդական ժամանակաշրջաններ[Խմբագրել | Խմբագրել աղբիւրը]

Ք․Ա․ 4-րդ դարէն, Զաքինթոս Մակետոնիոյ իշխանութեան մաս կը կազմէ։ Իսկ Ք․Ա. 191-ին վերջնականապէս կ'իյնայ Հռոմէական կայսրութեան ձեռքը, ապա՝ Արեւելեան Հռոմէական Կայսրութեան՝ Բիւզանդական կայսրութեան։

Բիւզանդական շրջանին, կղզին կ'ենթարկուի ծովահէններուն եւ Վանտալոններուն (Vandales) յաճախակի յարձակումներուն, նաեւ՝ արաբներուն եւ նորմանտներուն։ Սիցիլիի նորմանտները կղզին կը գրաւեն 1185-ին եւ Զաքինթոս մաս կը կազմէ Սիցիլիոյ Թագաւորութեան (Βασίλειο της Σικελίας), մինչեւ 1479։

Վենետիկեան իշխանութիւն[Խմբագրել | Խմբագրել աղբիւրը]

Զաքինթոս մայրաքաղաքը

1479-1797 թուականներուն կղզին կը գտնուի Վենետիկեան Իշխանութեան տակ։ Վենետիկցիները հմայուած կղզիին գեղեցկութենէն, զայն կ'անուանեն «Լեվանթինի Ծաղիկը» (Fior di Levante) եւ «Ոսկեայ կղզին» (Isola d'oro)։ 

Ռուս-թրքական եւ ֆրանսական գերիշխանութիւն

1797-1799 թուականներուն Յոնիական կղզիները ներառեալ Զաքինթոսը, Քամփօ Ֆորմիօ դաշինքով (traité de Campo-Formio) ֆրանսական գերիշխանութեան տակ կը գտնուին։

21 Մարտ, 1800-էն մինչեւ 8 Յունիս, 1807 Կոստանդնուպոլսոյ համաձայնագիրով Զաքինթոս մնացեալ Յոնիական կղզիներուն հետ «Եօթը կղզիներու Հանրապետութիւն» անուանումով կը գտնուին Ռուսիոյ եւ Օսմանեան լուծին տակ։

1807-1809 թուականներուն կղզիները կրկին կը գտնուին ֆրանսական տիրապետութեան տակ։

Անգլիական լուծ[Խմբագրել | Խմբագրել աղբիւրը]

1809-ին, ֆրանսական նաւատորմիղին պարտութեամբ, Անգլիացիները յաջորդաբար կը գրաւեն Յոնիական Ծովուն գլխաւոր կղզիները եւ Զաքինթոսը։

1815-1864 թուականներուն Զաքինթոս Անգլիոյ հովանաւորութեան տակ կը գտնուի՝ «Յոնիական կղզիներու միացեալ Պետութիւն» անունին տակ։ Սակայն, ինչպէս մնացեալ կղզիներուն բնակիչները, Զաքինթոսցիներն ալ տեւաբար կը ճնշեն պահանջելով անոնց միացումը Յունաստանին։

Յունաստանի հետ միացում[Խմբագրել | Խմբագրել աղբիւրը]

Յունաստանի Անկախութենէն տասնամեակներ ետք է, որ Յոնիական կղզիները մայր Յունաստանին կը միանան 21 Մայիս 1864-ին՝ Անգլիոյ, Ֆրանսայի, Ռուսիոյ եւ Յունաստանի միջեւ ստորագրուած դաշինքով մը։

Ի. դար եւ ժամանակակից շրջան[Խմբագրել | Խմբագրել աղբիւրը]

Լաղանա ծովափը

Ա․ Համաշխարհային Պատերազմի ընթացքին, կղզին կարճ ժամանակի մը համար ֆրանսական ուժերը կը գրաւեն։

Բ․ Համաշխարհային Պատերազմի սկզբնական շրջանին կղզին կը գտնուի նացիական Գերմանիոյ բռնապետութեան տակ։ Կղզիին քաղաքապետը եւ եպիսկոպոս Խրիսոստոմոս կը մերժեն նացիներուն յանձնել կղզիին հրեայ բնակիչները․ զանոնք կը պահեն գիւղական շրջաններու բնակիչներուն մօտ։

Կղզիին 275 հրեաները կը փրկուին։ Անոնց փրկութեան երկու գլխաւոր դերակատարները հետագային կը պարգեւատրուին Երուսաղէմի Եատ Վասեմ Yad Vashem թանգարանէն իբրեւ՝ Ազգերու Արդարները Righteous Among the Nations։

1953-ի Երկրաշարժը[Խմբագրել | Խմբագրել աղբիւրը]

Օգոստոս 1953-ին Քեֆալոնիա եւ Զաքինթոս կղզիներուն միջեւ 2-12 Օգոստոս՝ 113 զօրաւոր երկրաշարժներ կ'արձանագրուին, որոնցմէ ամէնէն ուժեղը եւ քանդիչն էր՝ 12 Օգոստոս 1953 -ին 6,8 ռիխթըր ուժգնութեամբ երկրաշարժը։  

Տնտեսութիւն[Խմբագրել | Խմբագրել աղբիւրը]

Հարուստ բուսականութեամբ կղզի մըն է։ Գլխաւոր ճարտարարուեստներէն են՝ զբօսաշրջիկութիւնը եւ գիւղատնտեսութիւնը։ Գիւղատնտեսութիւնը յենած է մանաւանդ ձիթենիի, կիտրոնազգի պտուղներու, չամիչի եւ ծաղկաբուծութեան արտադրութիւններուն վրայ։

Փոխադրամիջոցներ[Խմբագրել | Խմբագրել աղբիւրը]

Ցամաքային[Խմբագրել | Խմբագրել աղբիւրը]

Զաքինթոսի տափարակ մասը ունի ճամբաներու եւ փոխադրամիջոցներու խիտ ցանց մը, որոնք մայրաքաղաքը կը կապեն կղզիին մնացեալ շրջաններուն հետ։

Ծովային[Խմբագրել | Խմբագրել աղբիւրը]

Կան երկու նաւահանգիստներ․ մայրաքաղաք Զաքինթոսինը եւ անկէ 32 քմ․ դէպի հիւսիս արեւմտեան Վոլիմես շրջանին պատկանող Այիոս Նիքոլաոս գիւղինը։ Երթեւեկութիւնը Յունաստանի մայր ցամաքամասին հետ կ'ըլլայ Պեղոպոնեզի հիւսիս-արեւմտեան Քիլլինի նաւահանգիստէն։ Նաեւ կը կապուի դրացի Քեֆալոնիա կղզիին հետ։

«Երգն Ազատութեան»․ Տիոնիսիոս Սոլոմոս

Օդային[Խմբագրել | Խմբագրել աղբիւրը]

Կղզիին միջազգային օդակայանը Zakynthos International Airport "Dionysios Solomos" (IATA: ZTH, ICAO: LGZA) (բացուած 1972-ին) մայրաքաղաքին մօտն է եւ կապուած է Յունաստանի տարածքին մնացեալ օդակայաններուն հետ։

Մշակոյթ[Խմբագրել | Խմբագրել աղբիւրը]

Յոնիական Ծովուն կղզիները, դարերու ընթացքին զարգացուցած են իւրայատուկ մշակոյթ մը, որ ներկայիս կը բացատրուի իբրեւ Էփթանեզեան Դպրոց Επτανησιακή Σχολή (ճարտարապետութիւն, գեղարուեստ, երաժշտութիւն, եւ այլն)։ Զաքինթոս Քերքիրային հետ առաջնահերթութիւնը ունին։

Զաքինթոս կը նկատուի երաժշտութեան կղզին։ Բնակիչները երաժշտասէր են եւ ամէնուրեք կազմած են տեղական փոքր ընկերային բնոյթով «երգչախումբեր»։ Անոնք ընդհանրապէս կ'երգեն տեղական հին երգեր, մանաւանդ քանթատես καντάδες կոչուածը։

Կղզին ծննդավայրն է յոյն եւ իտալացի բազմաթիւ մտաւորականներու։ Տիոնիսիոս Սոլոմոս բանաստեղծը 1823-ին, Յունաստանի ազատագրական պայքարին ընթացքին կը գրէ «Երգն Ազատութեան» 158 տուներէ բաղկացած բանաստեղծութիւնը․ հետագային (1865) Յունաստանի Ազգային ոգերգը կը դառնայ։

Ուրիշ յատկանշական երեւոյթ մըն է բաց թատրոնի տեսակը, որ երեք դարու պատմութիւն ունի․ «խօսքեր (ομιλίες)» կը կոչուի։

2009-էն ի վեր, ամէն տարի ամրան, տեղի կ'ունենայ Ճազ երաժշտութեան փառատօնը (Φεστιβάλ Τζαζ Ζακύνθου / Zante Jazz Festival)։

Զաքինթոսի քաղաքապետութիւնը կը հրատարակէ երկամսեայ «Տիմոս + Փոլիթիա» (Δήμος + Πολιτεία) պարբերաթերթը։

Բնապահպանում[Խմբագրել | Խմբագրել աղբիւրը]

Արեւմտեան եւ հիւսիս արեւելեան ափեր[Խմբագրել | Խմբագրել աղբիւրը]

Զաքինթոս կղզիին արեւմտեան եւ հիւսիս արեւելեան ափերը կը պահպանուին Natura 2000, GR2210001 արձանագրութեամբ։ Կ'ընդգրկեն հիւսիս արեւելեան Այիօ Նիքոլաօ ծոցէն մինչեւ հարաւային Զաքինթոսի Աքրա Մարաթիա ծայրամասը։ Արեւմտեան դարվար ափերը, Վրահիոնաս լերան ստորոտներն են։ Անոնք թուփերով պատուած են։ Իսկ անտառային տարածութիւնները՝ Հալէպեան շոճիներով Pinus halepensis։  Շրջանին 214,190 լծվարները կը պահպանուին «Natura 2000 Յատուկ Պահմանման Գօտի» արձանագրութեամբ։

Այս շրջանի կենսահարստութեան մաս կը կազմեն՝  

Մարաթոնիսի

Ինչպէս նաեւ՝ Սեւականջ Քարաբնակը ασπροκωλίνες - Oenanthe hispanica - Hippolais olivetorum երկոտանիները եւ Limonium phytosianum, L. zacynthium, Յոնիական խոլորձին Serapias ionica եւ շատ ուրիշ տեղայատուկ բուսական տեսակներ։

Լաղանա ծոցն ու Մարաթոնիսի եւ Փելուզօ կղզիները[Խմբագրել | Խմբագրել աղբիւրը]

1999-էն, Լաղանայի ծոցը յայտարարուած է իբրեւ Ազգային Պուրակ։  Հոն հաւկիթ կ'ածեն անհետացումի վտանգին ենթարկուած Քարեթա-Քարեթա կրիաները։ Ծոցին տարածութիւնը՝ 6977 լծվար, NATURA 2000 GR2210002 արձանագրութեամբ պահպանուած շրջան մըն է։

Ծովային ճեմապարտէզ[Խմբագրել | Խմբագրել աղբիւրը]

Զաքինթոսի Ազգային Ծովային Ճեմապարտէզը կը հիմնուի Յունաստանի Նախագահական հրամանով 1999-ին (Εθνικό Θαλάσσιο Πάρκο Ζακύνθου (Ε.Θ.Π.Ζ.) - National Marine Park of Zakynthos)։ Հոն կը պահպանուին շրջանին կենսահարստութիւնը՝ բուսականութիւնը եւ կենդաբանութիւնը, մանաւանդ՝ Քարեթա-Քարեթա կրիաները։

Տեսարժան վայրեր, Պատկերասրահ[Խմբագրել | Խմբագրել աղբիւրը]

[1] [2] [3] [4] [5] [6] [7] [8] [9] [10] [11] [12] [13] [14] [15] [16] [17] [18] [19] [20] [21] [22][23] [24] [25] [26] [27] [28] [29] [30]

Տես նաեւ[Խմբագրել | Խմբագրել աղբիւրը]

Քերքիրա

Փաքսի

Լեֆքատա

Քեֆալոնիա

Իթաքի

Քիթիրա

Ծանօթագրութիւններ[Խմբագրել | Խմբագրել աղբիւրը]

  1. Զաքինթոս․ պատմութիւնը(անգլերէն)
  2. Յոնիական կղզիները Պղինձէ դարէն մինջեւ Երկաթի շրջան(յունարէն)
  3. Զաքինթոսը հին յունական արձանագրութիւններուն մէջ․ Γεράσιμος Χρυσάφης, հատոր 20, 5 (2000), էջեր՝ 499-514(յունարէն)
  4. [file:///C:/Users/anide/Downloads/01059.pdf Զաքինթոս կղզիին տնտեսական զարգացումը պատմութեան ընթացքին, Διονύσιος Δ. Ιθακήσιος(յունարէն)]
  5. Զաքինթոս, Մարաթոնիսի(յունարէն)
  6. ԱՄՆ․ Հոլոքոստի յիշատակման Թանգարանը - Յունաստանի եւ Զաքինթոսի հրիաները(անգլերէն)
  7. ԱՄՆ․ Հոլոքոստի յիշատակման Թանգարանը - Զաքինթոսի հրիաները(անգլերէն)
  8. The Jerusalem Post – Զաքինթոսի հրիաներուն հրաշալի պատմութիւնը, 10-1-2018(անգլերէն)
  9. Η ΚΑΘΗΜΕΡΙΝΗ, օրաթերթ – 1953 Յոնիական կղզիներուն երկրաշարժները, 12-5-2013, Κωνσταντινος Κουτσαδέλης(յունարէն)
  10. BBC News. 2018 Հոկտեմբերի երկրաշարժը
  11. Natura 2000 Յատուկ Պահմանման Գօտի արձանագրութիւն - Յունաստանի թռչնաբանական ընկերութիւն․ արեւմտեան եւ հիւսիսային Զաքինթոս(յունարէն)
  12. Princeton University Press - Ծովահէնները եւ յոյն առեւտրականները, Molly Greene (2010)(յունարէն)
  13. imerazante ելեկտ․ օրաթերթ – Գեղեցիկ Զաքինթոս, Σπύρος Καμπιώτης 8-5-2017(յունարէն)
  14. ZANTESISLAND – Զաքինթոյի կապոյտ քարայրները(յունարէն)
  15. Το Βήμα օրաթերթ․ Զաքինթօ կղզիին դժոխք վայրէջը․ 24-11-2008, ΝΙΚΟΣ Ι ΜΕΓΑΔΟΥΚΑΣ(յունարէն)
  16. wikiwand- 1953 Յոնիական Ծովուն երկրաշարժները(անգլերէն)
  17. «Զաքինթոյի Ծովային Ճեմապարտէզը(անգլերէն)»։ արխիւացուած է բնօրինակէն-էն՝ 2020-08-06-ին։ արտագրուած է՝ 2020-07-31 
  18. Զաքինթոյի Ծովային Ճեմապարտէզը․ Ծովային կրիային պահպանումը(անգլերէն)
  19. – Յունաստանի Պետական հեռասփռման կայան․ Զաքինթոյի Ծովային Կրիաներու Ճեմապարտէզը(յունարէն)[permanent dead link]
  20. ΕΡΤ – Յունաստանի Պետական հեռասփռման կայան․ Քարեթա-Քարեթա, կրիաներ եւ մարդիկ(յունարէն)
  21. ΕΡΤ – Յունաստանի Պետական հեռասփռման կայան – 1953-ի երկրաշարժը(յունարէն)
  22. Յունական պետութեան օրէնսդրութիւն՝ Բնապահպանում․ ΝΟΜΟΣ 3937/2011 – ΦΕΚ 60/Α/31-3-2011, վերջին փոփոխութիւններ՝ ΦΕΚ 108/Α/9-6-2020(յունարէն)
  23. Princeton University Press - Ծովահէնները եւ յոյն առեւտրականները, Molly Greene (2010)(յունարէն)
  24. «Շրջապտոյտ դէպի Զաքինթոս եւ Նավաղիօ» Յունաստանի նաւաբեկութեան ծովափը(անգլերէն)
  25. discovergreece – Յունաստանի 10 լաւագոյն ծովափները(յունարէն)
  26. «NATURA 2000, GR2210001 - Զաքինթոս կղզիին առեւմտեան եւ հիւսիս արեւմտեան ափերը(անգլերէն)»։ արխիւացուած է բնօրինակէն-էն՝ 2020-08-21-ին։ արտագրուած է՝ 2020-07-31 
  27. «Լաղանա Ծոցը եւ Մարաթոնիսի ու փելուզօ կղզիներ․ NATURA 2000, GR2210002 (անգլերէն)»։ արխիւացուած է բնօրինակէն-էն՝ 2020-07-24-ին։ արտագրուած է՝ 2020-07-31 
  28. Δήμος + Πολιτεία երկամսեայ պարբերաթերթ Զաքինթոսի քաղաքապետութեան
  29. Զաքինթոսի մէջ հնագիտական նոր վայրի մը յայտնումը․ 1971, G.J. van Wijngaarde(անգլերէն)
  30. Յունաստանի Հանրապետութիւն, Յոնիական Կղզիներու Շրջանային Միաւորում – վերջին տեղեկատուութիւն՝ Յուլիս 2019, Շրջ․ կառավարիչ՝ տիկին Ρόδη Κράτσα Τσαγκαροπούλου(յունարէն)

Արտաքին յղումներ[Խմբագրել | Խմբագրել աղբիւրը]

  1. Զաքինթոսի Ծովային Ճեմապարտէզը(յունարէն)
  2. Զաքինթոսի քաղաքապետութեան կայքէջը Archived 2020-07-29 at the Wayback Machine.(յունարէն)
  3. Զաքինթոսի հրեաներուն հրաշալի պատմութիւնը(անգլերէն)
  4. Սթրոֆատես, քարտէս(յունարէն)
  5. Միջերկրականի Մոնահուս կրիան(անգլերէն)
  6. Միջերկրականի Մոնահուս կրիան(անգլերէն)
  7. Քարեթա քարեթա կրիան(անգլերէն)
  8. [1][permanent dead link](յունարէն)
  9. Սեւաքար Բազէ(յունարէն)
  10. Ծովագռաւ(յունարէն)
  11. Սեւականջ Քարաբնակ(յունարէն)
  12. Սեւականջ Քարաբնակ(յունարէն)
  13. Սարտինեան երգակը(անգլերէն)
  14. Սարտինեան երգակը(անգլերէն)
  15. Սարտինեան երգակը(անգլերէն)
  16. Երգն Ազատութեան, Տիոնիսիոս Սոլոմոս(անգլերէն)
  17. Զաքինթոսի «քանդատա»յի նմուշ մը Γιαλό-Γιαλό (Ծովափէ՝ ծովափ)
  18. Զաքինթոսի «քանդատա»յի նմուշ մը Απόψε την Κιθάρα μου (Այսօր Կիթառս)
  19. Զաքինթոսի «քանդատա»ն․ գէֆի առիթ