Տաքար մրցաշարք

Տաքար մրցաշարք (ֆրանս․՝ Rallye Dakar, անգլ․`Dakar Rally)․ կառքերու մրցաշարք, ծանօթ նաեւ որպէս Փարիզ-Տաքար Ռալի եւ աւելի ուշ պարզապէս Փարիզ-Տաքար (Rallye Paris-Alger-Dakar, Paris-Dakar)։ Կը սեպուի շարժակ կառքերու դժուարագոյն մրցումներէն մէկը։

Պատմական ակնարկ[Խմբագրել | Խմբագրել աղբիւրը]

Մրցաշարքին կազմակերպումի գաղափարը կ՛ունենայ ֆրանսացի վարորդ Թիերի Սապին։ Ան 1977-ին Ապիճան-Նիս մրցաշարքին ընթացքին կը կորսնցնէ ուղղութիւնը եւ կը կորսուի։ Կ՛անդրադառնայ թէ անապատը յարմար վայր մըն է ուր ինքնաշարժներու մրցումներու սիրահարները կրնան փորձել իրենց կարողութիւնները։ Դեկտեմբեր 1977-ին կը կազմակերպէ Փարիզ - Տաքար առաջին մրցաշարքը եւ այնուհետեւ կեանքը կը նուիրէ անոր կազմակերպութեան։

Առաջին մրցաշարքը սկիզբ կ՛առնէ Փարիզէն 26 Դեկտեմբեր 1978-ին եւ կը վերջանայ 14 Յունուար 1979-ին Տաքար (Սենեկալ)։ 182 կառքեր կը մասնակցին եւ պէտք էր ճեղքէին 10․000 քլ․ մինչեւ հասնին վերջին հանգրուանը՝ Տաքար։

Միայն 74 կառք կը յաջողին հասնիլ։ Ալեն Ժենեսթիէ (ինքնաշարժ), Քիրիլ Նըվօ (հեծանիւ) եւ Ժան Ֆրանսուա Տիւնաք, Ժան Փիեռ Շափել, Ֆրանսուա Պօ (բեռնասայլ) յաղթական կը հանդիսանան։

Մրցաշարքը արագօրէն լայն ժողովրդականութիւն կը ստանայ եւ 1980-ին 216 կառքերով սկիզբ կ՛առնէ, 1981-ին՝ 291, իսկ 1982-ին՝ 382։

Տաքար 2009 մրցաշարքին ընթացքը՝ հարաւային Ամերիկա

Մրցաշարքը 1979-էն ի վեր կը կատարուի։ Մինչեւ 2007, մրցաշարքին գրեթէ ամբողջ ընթացքը տեղի կ՛ունենար Ափրիկէ։ Ուրբաթ 4 Յունուար 2008-ին, մրցաշարքը չսկսած, ժամը 12։30-ին «Տաքար 2008»-ի կազմակերպիչները կ՛որոշեն մրցաշարքին ջնջումը «ապահովութեան» պատճառաբանութեամբ․ մրցաշարքին տեւողութեան ընթացքին փուլերէն ութն պիտի կատարուէին Մաւրիթանիա, ուր սակայն սպաննուած էին ֆրանսացի 4 զբօսաշրջիկներ։ 2009-ին մրցաշարքը տեղի կ՛ունենայ Ամերիկայի ցամաքամասը՝ Արժանթին եւ Չիլէ․ մեկնակէտը եւ վերջին հանգրուանը Պուէյնոս Այրես ըլլալով։

2023-ի մրցաշարքը (45-րդ) տեղի ունեցաւ Սաուտի Արաբիա, 31 Դեկտեմբերէն 2022 - 15 Յունուար 2023։