Խաչեր Գալուստեան

Խաչեր Գալուստեան;
Ծնած է	21 Հոկտեմբեր 1915
Ծննդավայր	Մարաշ, Ատանայի վիլայէթ, Օսմանեան Կայսրութիւն
Մահացած է	3 Դեկտեմբեր 1986 (71 տարեկանին)
Մահուան վայր	Պէյրութ, Լիբանան

Խաչեր Գալուստեան (Մարաշ, 1915- Պէյրութ, 1985) հայ կրթական ականաւոր գործիչ, որ իր ամբողջ կեանքը նուիրած է սփիւռքահայ կրթութեան կազմակերպման, մանկավարժական աշխատանքին եւ ուսուցիչներու պատրաստութեան։

Խաչեր Գալուստեան կը նկատուի սփիւռքահայ կրթական համակարգի զարգացման մէջ կարեւոր դեր ունեցող դէմք մը, որ իր կեանքով եւ գործով նպաստած է նոր սերունդներու ազգային ինքնագիտակցութեան ամրապնդման եւ բարձրորակ կրթութեան տարածման։

Կեանք եւ ուսում

Ծնած է 1915-ին՝ Մարաշ։

Հայոց Ցեղասպանութեան տարիներուն, իր ընտանիքը կորսնցուցած է:

Որբացած մանուկ հասակին, ապաստան գտած է տարբեր որբանոցներու մէջ՝ Մարաշի, ապա՝ Ճըպէյլի եւ Հալէպի կրթական հաստատութիւններուն մէջ։

Նախակրթական ուսումը ստացած է Մարաշի եւ որբանոցային դպրոցներուն մէջ, ապա՝ Հալէպի Հայ Աւետարանական Բեթէլ նախակրթարանին մէջ^[1]։

Երկրորդական կրթութիւնը աւարտած է Հալէպի Ամերիկեան քոլէճին մէջ։

Մանկավարժական գործունէութիւն

1932-էն սկսեալ, նուիրուած է ուսուցչական ասպարէզին․

1932-1938 թուականներուն, ուսուցչութիւն ըրած է Հալէպի Կիլիկեան Վարժարանին մէջ,
1938-1942-ին՝ Թրիփոլիի Ամերիկեան բարձրագոյն վարժարանին մէջ։

1944-1953 թուականներուն, ան եղած է տնօրէն Հայ Աւետարանական Բարձրագոյն Վարժարանին մէջ, ուր մեծ ներդրում ունեցած է կրթական ծրագիրներու արդիականացման եւ ուսուցիչներու վերապատրաստման մէջ։

Բարձրագոյն ուսում եւ ակադեմական գործունէութիւն

Մանկավարժական աշխատանքին զուգահեռ, շարունակած է իր ուսումը։

1958-ին, Պէյրութի Ամերիկեան Համալսարանէն ստացած է մանկավարժութեան մագիստրոսի տիտղոս։

1960-1964-ին ծառայած է իբրեւ տնօրէն Մելգոնեան Կրթական Հաստատութեան մէջ։

1966-ին «Թեմփըլ Համալսարանէն» (Temple University) ստացած է յառաջացեալ ուսման վկայական, ապա վերադարձած է Միջին Արեւելք եւ մինչեւ 1976 պաշտօնավարած է Հայկազեան Համալսարանի մէջ՝ իբրեւ մանկավարժութեան փրոֆեսէօր Ֆիլատելֆիա կատարած ուսումնառութեան փորձառութիւնը ներդնելով իր դասաւանդութեան մէջ։

Կրթական ձեռնարկ եւ ժառանգութիւն

Խաչեր Գալուստեանի մեծ իտէալը եղած է սեփական կրթական հաստատութեան մը ստեղծումը, որ իրականացած է 1974-ին՝ հիմնադրելով Գալուստեան Համապարփակ Կրթական Հաստատութիւնը՝ Պէյրութի մէջ։ Այս դպրոցը նպատակ ունէր համադրել ազգային դաստիարակութիւնը եւ ժամանակակից կրթական մեթոտները։ Հաստատութիւնը կը գործէ մինչեւ 1981, երբ Լիբանանի քաղաքացիական պատերազմի պայմաններուն պատճառով կը փակուի։

Իր երազը իրականութիւն կը դառնայ 1987-ին, երբ հանգուցեալին կնոջ ու զաւակներուն կողմէ յատկացուած գումարով, Մեծի Տանն Կիլիկիոյ Կաթողիկոսութեան հովանաւորութեան ներքեւ, մայրավանքի շրջափակին մէջ կը հիմնուի Խաչեր Գալուստեան Մանկավարժական Կազմաւորման Կեդրոնը: Յատուկ յանձնախումբ մը կեանքի կը կոչուի, որպէսզի զբաղի Կեդրոնին կրթական-վարչական հարցերով։

Մահ

Խաչեր Գալուստեան կը մահանայ 3 Դեկտեմբեր 1985-ին՝ 69 տարեկան հասակին։

Խաչեր Գալուստեանի Միտքերէն

Մենք կը խորհինք, որ ուսուցիչը պէտք է նաեւ սորվելու եւ սորվեցնելու եղանակը գիտնայ ու ամէն նիւթի յատուկ մեթոտով փորձէ անոր փոխանցումը դարձնել դիւրամատչելի եւ իրացումը հեզասահ։ Ուսուցիչը պէտք է նաեւ ծանօթանայ մանուկին հոգեկան աշխարհը յուզող հարցերուն, փորձէ թափանցել անոր հոգեկան բաւիղներէն ներս եւ հետւիլ անոր աճման հոլովոյթին ընկերացող դժուարութիւններուն եւ մանաւանդ սորվեցնէ սիրել աշակերտը եւ ինքզինք սիրցնել տալ անոր. արդարեւ սիրոյ եւ գուրգուրանքի ճամբով պէտք է մանուկը ուղղել արդի մանկավարժութիւնը։

- Խաչեր Գալուստեան

^[2]

Ծանօթագրութիւններ

Արտաքին յղումներ

«Խաչեր Գալուստեան» մանկավարժական կեդրոնի պաշտօնական կայք Archived 2022-12-02 at the Wayback Machine.

[1] Խաչեր Գալուստեան

[2] Գալուստեանի միտքերէն

[1]

[2]