Համբիկ Մարտիրոսեան

Համբիկ Մարտիրոսեան
Ծնած է	4 Դեկտեմբեր 1945(1945-12-04) (78 տարեկան)
Ծննդավայր	Սեբաստիա, Թուրքիա
Մասնագիտութիւն	բանաստեղծ, արձակագիր, հրապարակագիր

Համբիկ Մարտիրոսեան(4 Դեկտեմբեր 1945(1945-12-04), Սեբաստիա, Թուրքիա), բանաստեղծ, արձակագիր եւ հրապարակագիր։

Կենսագրութիւն

Ծնած է Արեւմտեան Հայաստան, Սեբաստիա: Նախնական, միջնակարգ եւ երկրորդական ուսումը ստացած է Պոլսոյ մէջ: Հայերէն լեզուն սորված է պատանի տարիքին:

Համալսարանական ուսումը ստացած է Լիբանանի Սէն Ժոզէֆ համալսարանէն ներս, հետեւելով հայագիտական ճիւղին: Յետ ուսման, մեկնած է Դամասկոս եւ պաշտօնավարած է Դամասկոսի Առաջնորդարանէն ներս՝ 25 տարի, նոյն ժամանակ հիմնելով եւ ղեկավարելով եկեղեցւոյ Եկմալեան երգչախումբը՝ նոյնքան տարիներ:  

Դիւանապետութեան կողքին, որպէս ուսուցիչ պաշտօնավարած է Դամասկոսի Հայկական Բարեգործական Ընդհանուր Միութեան Սահակեան վարժարանին  մէջ, նախ ուսուցիչ, յետոյ որպէս տնօրէն: Աշխատած է այլ դպրոցներու մէջ եւս, դասաւանդելով հայերէն լեզու եւ գրականութիւն:

Համբիկ Մարտիրոսեան, կը հանդիսանայ Դամասկոսի Թէքէեան Մշակութային Միութեան հիմնադիրներէն... աւելի ճիշդը՝ գլխաւոր հիմնադիրը՝ 1971 թուականին եւ հանդիսացած անոր ատենապետը՝ երկար տարիներ:

1997-ին տեղափոխուած է Լիբանան։ Լիբանանի մէջ եղած է Հայկական Բարեգործական Ընդհանուր Միութեան  Շրջանակային Յանձնաժողովի տնօրէն-դիւանապետ, ապա 2007 թուականէն ի վեր «ԽՕՍՆԱԿ» պաշտօնաթերթի գլխաւոր խմբագիրն է, միաժամանակ, հանդիսանալով ՀԲԸՄ- ի «Ահրամճեան Բժշկական Կեդրոն»-ի տնօրէն՝ 2018-էն մինչեւ օրս:

Հակառակ իր բազմազբաղութեան, ատենապետն է «ԽՕՍՆԱԿ» Մշակութային Յանձնախումբին եւ գեղարուեստական ղեկավարը եւ խմբավարը՝ իր հիմնած «ՇՈՂԵՐԳ» Երգեցիկ խումբին:

Գրական եւ Լրագրական Գործունէութիւն

Համբիկ Մարտիրոսեան իր խմբագրական աշխատանքին կողքին, երկար տարիներ աշխատակցած է լիբանանահայ մամուլի՝ «Զարթօնք», «Ազդակ», «Արարատ» եւ «Նայիրի» թերթերուն, ինչպէս նաեւ Միացեալ Նահանգներու «Պայքար» շաբաթաթերթին եւ սփիւռքահայ մամուլին: Ունի բազմաթիւ ազգային, ընկերային, երգիծական եւ քաղաքական յօդուածներ՝ հրատարակուած մամուլի մէջ, շատ յաճախ ծածկանուններով:

Համբիկ Մարտիրոսեան պատրաստած է նաեւ Քերականութեան դասագիրքեր՝ նախակրթարանի Գ.Դ. եւ Ե. կարգերու համար:

Երկեր եւ գրական ստեղծագործութիւններ

Համբիկ Մարտիրոսեան հեղինակ է հետեւեալ գործերու.՝

• ԵՍ ԵՒ ԴՈՒՆ, Բանաստեղծութիւն 1981

• ՍՊԻՏԱԿ ԵՐԳ, Պոէմ 2003

• ՄԱՐԴ ՄԱՐԴԱՑԻՐ Կ՛ԱՂԱՉԵՄ, Պոէմ 2004

• ՀՐԵՇՏԱԿՆԵՐՈՒ ՄԱՅՐԱՔԱՂԱՔԸ, Թատրերգութիւն 2004
• ՎԵՐԱԴԱՐՁ ԴԷՊԻ ԱՐՄԱՏՆԵՐ, Յուշագրութիւն 2006
• ԱՐՑՈՒՆՔ ԵՒ ԺՊԻՏ, Արձակ 2008
• ԿԱՐՕՏ ՈՒ ՄՈՐՄՈՔ, Բանաստեղծութիւն 2010
• ԵՐԿՈՒ ԱՓ, Բանաստեղծութիւն 2012
• ՀԱՅԵՐԳՈՒԹԻՒՆ, Բանաստեղծութիւն 2015
• ՃԱԿԱՏԱԳԻՐ, ՍԷՐ, ՀԵԳՆԱՆՔ, Արձակ 2018
• ՀԲԸՄ. ՀԱՄԱԳՈՒՄԱՐ՝ 2012  
• ՀԲԸՄ. ՀԱՄԱԳՈՒՄԱՐ՝ Փառաւոր Անցեալ 2018
• ՎԱՌ ՏԵՍԻԼՔԻ  ՂԵԿԱՎԱՐԸ՝ Պ. ՍԵԴՐԱԿԵԱՆ 2022

Ունի տակաւին տասնեակ մը անտիպ գործեր:

Դասախօսութիւններ

Համբիկ Մարտիրոսեան որպէս հրապարակախօս, դասախօսութիւններով հանդէս եկած է զանազան գաղութներէ ներս, այսպէս՝ Պէյրութ, Դամասկոս, Հալէպ, Ամման, Վալանս, Աթէնք, Կիպրոս, Փարիզ, Երեւան եւ Արցախ:

Համաժողովներ ու Համագումարներ

Մասնակցած է Հայաստան-Սփիւռք համաժողովներու, ինչպէս նաեւ Լրագրողներու եւ Գրողներու համագումարներուն:

Պարգեւներ եւ շքանշաններ

Սփիւռքէ ներս իր կատարած ազգային, հասարակական ու հայ-րենասիրական ծառայութիւններուն համար Համբիկ Մարտի-րոսեան պարգեւատրուած  է՝

• Սփիւռքի Նախարարութեան «ԴԻՊԼՈՄ»-ին, երբ «ԽՕՍՆԱԿ»-ը  հանդիսացած է Սփիւռքի լաւագոյն ամսաթերթը՝ 2002-ին:
• «ԶԱՐԹՕՆՔ» Օրաթերթի «ՄԱՄԼՈՅ ՄՐՑԱՆՔ»-ին.
• Հայաստանի Գրողներու Միութեան «ՎԱՍՏԱԿԱՒՈՐ ԳՐՈՂ» մետալին,
• Սփիւռքի Նախարարութեան «ԲԱՐՁՐԱԳՈՅՆ ՈՍԿԵԱՅ ՇՔԱՆՇԱՆ»-ին,
• Հայաստանի Հանրապետութեան Պաշտպանութեան նախա-րարին «ՀԱՅՈՑ ԲԱՆԱԿԻ 20-ԱՄԵԱՅ» մետալիոնին,
• Հայաստանի Հանրապետութեան Վարչապետին «ՄԱՅՐԵՆԻԻ ՏՕՆ»ի առթիւ՝ «ՈՍԿԵԱՅ ՇՔԱՆՇԱՆ»-ին,
• Հայաստանի Հանրապետութեան  Նախագահին «ՄՈՎՍԷՍ ԽՈՐԵՆԱՑԻ» շքանշանին,
• Նաեւ, շատ մը պարգեւներ ու վահանակներ՝ զանազան գաղութ-ներէ եւ կազմակերպութիւններէ:

Աղբիւրներ

• Համբիկ Մարտիրոսեան. Սփիւռքահայ պայմաններում մեր սքանչելի արեւմտահայերէնին վտանգ սպառնում է
• «Խօսնակ»ի Յաջող Վիճաբանական Երեկոն 3 Մարտ 2017 ՀԲԸՄ-ՀԵԸ-ի Ահրամճեան Կեդրոն Լիբանան
• Միասնական գրականութիւն դպրոցներէն Գրական Թերթ ՀԳՄ Պաշտօնաթերթ

Տե՛ս նաեւ

• Խօսնակ (Ամսագիր)
• Ազդակ օրաթերթ
• Զարթօնք (օրաթերթ)
• Արարատ (թերթ)
• Նայիրի (թերթ)
• Գրական թերթ
• Գրական թերթ Պաշտօնական Կայքէջ