Ալ Պանօ

Ալ Պանօ; իտալ.՝ Albano Carrisi
	Ալ Պանօ 2014-ին
Ծննդեան անուն	իտալ.՝ Albano Antonio Carrisi
Նաեւ յայտնի է իբրեւ	Al Bano
Ծնած է	20 Մայիս 1943
Ծննդավայր	Քելինօ Սան Մարքօ Cellino San Marco , Պրինտիզի Brindisi, Իտալիա
Քաղաքացիութիւն	Իտալիա; Ալպանիա
Տեսակ	փոփ երաժշտութիւն եւ Երգ
Մասնագիտութիւն	երգիչ, երաժշտագէտ, դերասան եւ գինեգործ
Անդամութիւն	Al Bano & Romina Power?
Ամուսին	Րոմինա Փաուըր եւ Լորետանա Լեչիզօ
Ծնողներ	մայր՝ Եոլանտա Օթինօ, հայր՝ Տոն Քարմելօ
Երեխաներ	Իլենիա, Եարի, Քրիստել, Րոմինա ճիւնիոր, Եասմին, Պիտօ
Կայքէջ	albanocarrisi.eu

Ալ Պանօ, Ալ Պանօ Քարիզի Albano Carrisi, 20 Մայիս 1943, Քելինօ Սան Մարքօ Cellino San Marco, Պրինտիզի Brindisi, հարաւային Իտալիա․ ուր եւ կ՛ապրի մինչեւ այսօր։ Իտալացի երգիչ, երաժշտագէտ, դերասան եւ գինեգործ։

Կեանքը

Ալ Պանօ ծնած է 20 Մայիս 1943-ին, հարաւային Իտալիոյ Քելինօ Սան Մարքօ աւանին մէջ։ Մինչեւ այսօր հոն կ՛ ապրի։ Մայրը զայն Ալպանօ կոչած է, որովհետեւ ծնած տարին (Բ․ Համաշխարհային պատերազմին), հայրը՝ իտալական բանակի զինուոր, կը կռուէր Ալպանիոյ մէջ։

Ալ Պանօ երգիչը

Երգիչի իր ասպարէզը կը սկսի 1966-ին երբ կը մասնակցի «Festival delle rose» երգի փառատօնին։ 1967-ին «Արեւուն» Nel Sole երգը ^[1] մեծ յաջողութիւն կ՛ունենայ։ Յաջորդաբար կը հրապարակէ «Io di notte» (Ես՝ իրիկունը) երգը^[2]՝ որ բացառիկ յաջողութիւն կ՛արձանագրէ Իտալիոյ մէջ, ինչպէս նաեւ Յունաստանի, Ֆրանսայի, Պուլկարիոյ, Սպանիոյ երկիրներուն մէջ, «L'oro del mondo» (Աշխարհի ոսկին) եւ «Il ragazzo che sorride» (Տղան որ կը ժպտի)՝ Միքիս Թէոտորաքիսին յօրինումը որ կ՛անդրադառնայ 1967-ի Յունաստանի եղելութիւններուն^[3]։ Նոյն տարին կը մասնակցի իտալական երգի «Սան Րեմօ Փառատօն»ին «La siepe» (Թուփը) երգով եւ կ՛արժանանայ լաւագոյն երգի մրցանակին։ 1969-ին «Pensando a te» երգը^[4] կ՛արժանանայ «Ամառուան Ձայնապնակ» Disco per l'Estate մրցանակին։

26 Յուլիս 1970-ին կ՛ամուսնանայ Րոմինա Փաուըրին Romina Power հետ (դուստրը ամերիկացի Թայրոն Փաուըր Tyrone Power եւ Լինտա Քրիստեան Linda Christian դերասաններուն)․ 1969-ին միասնաբար երգած են «Սիրահարներուն պատմութիւնը» Storia di due innamorati^[5]։ Միասին կ՛ երգեն մօտաւորապէս 30 տարի։ Իրենց գործերը մեծ ժողովրդականութիւն ունին Աւստրիոյ, Ֆրանսայի, Սպանիայի, Պուլկարիոյ, Ռումանիոյ, Յունաստանի եւ Գերմանիոյ մէջ։ 1975-ին կ՛ երգեն «Երկխօսութիւն»ը Dialogo։ 1976-ին եւ 1985-ին Եուրոտեսիլի երգի փառատօնին Իտալիան կը ներկայացնեն յաջորդաբար «Noi lo rivivremo di nuovo» եւ «Magic oh magic» երգերով։

1981-ին կը հրապարակեն «Շարազան» Sharazan երգը^[6]։ 1982-ին եւ 1983-ին կը մասնակցին «Սան Րեմօ Փառատօն»ին եւ յաջորդաբար «Երջանկութիւն» Felicità^[7] ու «Պիտի ըլլայ» Ci sarà^[8] երգերով կը գրաւեն 2-րդ եւ առաջին դիրքերը։ Նոյն Փառատօնին կը մասնակցին նաեւ 1987-ին («Nostalgia canaglia»^[9], 3-րդ դիրք) եւ 1989-ին («Cara terra mia»^[10], 3-րդ դիրք)։

2007-ին Ալ Պանօ «Nel perdono»^[11] երգով կը գրաւէ 2-րդ դիրքը։

26 Նոյեմբեր 1991-ին, երբ կը հրապարակուի Մայքլ Ճաքսընի «Վտանգաւոր» ալպոմը, Ալ Պանօ կը յայտարարէ թէ ան «գողցած» է իր «I Cigni di Balaka» բներգին երաժշտութեան մեծ մասը եւ օգտագործած է «Will You Be There» երգին մէջ։ Կը սկսի դատավարութիւններու շարք մը։ 1999-ին, Հռոմի դատարանը Մայքլ Ճաքսըն բանագողութեամբ կ՛ ամբաստանէ եւ կը դատապարտէ 4․000․000 իտալական լիրայի փոխ-յատուցումով․ երաժշտագէտ մը կը յայտնաբերէ թէ Ճաքսըն իւրացուցած է 40 խազերէն 37-ն։ Ճաքսընի փաստաբանները կը յաջողին կասեցնել փոխ յատուցումը։ Նոյն հարցով, Միլանոյի դատարանը Մայքլ Ժաքսըն անպարտ կ՛ արձակէ։

1996-ին, Ալ Պանօ իր երգիչի ասպարէզը մինակ կը շարունակէ։ Կը հրապարակէ «Իմ կեանքս է» È la mia vita երգը, իսկ 1997-ին՝ «Դէպի արեւ» Verso il sole եւ 1999-ին՝ «Դեռ թռիչքի մէջ» Ancora in volo երգերը։

1999-ին Ալ Պանօ եւ Րոմինա Փաուըր կ՛ ամուսնալուծուին։

2013-ի ամրան, Ալ Պանօ եւ Րոմինա Փաուըր վերստին կը միանան (արուեստի սիրոյն համար) եւ Մոսկուա ելոյթ կ՛ ունենան։ 2015-ին, իրենց բաժանումէն 20 տարի ետք, «Սան Րեմօ Փառատօն»ին անակնկալ ներկայացում մը կ՛ունենան (Ալ Պանօ 72 տարեկան է, իսկ Րոմինա՝ 63)․ անոնց վերջին ներկայացումը եղած էր 22 տարի առաջ Միլանօ քաղաքի «Սան Սիրօ» մարզադաշտին բեմէն, Յուլիս 1994-ին։ Ապա, 2015-ի գարնան ելոյթներ կ՛ունենան յաջորդաբար Աթլանթիք Սիթի եւ Լոս Անճըլես Ա․Մ․Ն․։

30 Մայիս 2015-ին, «Արենա տի Վերոնա» հռոմէական ամփիթատրոնին մէջ 11 000 հանդիսականներու ներկայութեամբ (տոմսերը առաջին ժամերէն արդէն սպառած էին) Ալ Պանօ ներկայացում (շոու) մը կը կազմակերպէ։ Բացառիկ յաջողութիւն կ՛ ունենայ․ հեռատեսիլի պետական կայանէն՝ RAI, կը սփռուի նաեւ ուրիշ երկիրներ․ 51 000 000 հոգի կը դիտեն։

Օգոստոս 2016-ին, Ալ Պանօ եւ Րոմինա Փաուըր միասին ելոյթ կ՛ունենան Թաորմինա եւ նոյն տարուան Սեպտեմբերին կը սկսին շրջապտոյտ մը աշխարհի զանազան երկիրներու մէջ․ առաջին համերգը տեղի կ՛ունենայ Թորոնթօ, Քանատա։

Օփերա

Փոքր տարիքէն Ալ Պանօ Օփերայի հանդէպ յատուկ սէր մը կը ցուցնէ։ Իբրեւ թենոր, օփերայի քանի մը ձայնապնակներ կը հրապարակէ։ 1997-ին «Concerto Classico» ձայնապնակը արագօրէն երկու անգամ բլատինի platinum կ՛արժանանայ։ Ձայնապնակը կ՛ընդգրկէ հետեւեալ երգերը՝ «Una furtiva lagrima»^[12], «Va, pensiero»^[13], «La nostra serenata»^[14], «E lucevan le stelle»^[15], «Ave Maria»^[16]։

Ալ Պանօ ժապաւէնագրութեան եւ հեռատեսիլի բնագաւառներէն ներս

Իր երգիչի ասպարէզին զուգահեռ, Ալ Պանօ մասնակցած է ժապաւէններու, ինչպէս նաեւ հեռատեսիլի ժապաւէնաշարքերու մէջ, ըլլալով գլխաւոր կամ կարեւոր դերակատարներէն մէկը։

Ժապաւէնագրութիւն

Nel sole (1967)
L'oro del mondo (1968)
Il ragazzo che sorride (1969)
Il suo nome è Donna Rosa (1969)
Pensando a te (1969)
Mezzanotte d'amore (1970)
Angeli senza paradiso (1970)
Champagne in paradiso (1984)
Poveri ma ricchi (2016)
Quo vado? (2016)

Հեռատեսիլ

1977-ին եւ 1990-էն ետք յաճախակի ներկայացումներ կ՛ունենայ իտալական հեռատեսիլի բազմաթիւ յայտագիրներու մէջ։ Նաեւ գլխաւոր դերակատարներէն է «Promessi sposi» - Rai 1 (1990) եւ «Un medico in famiglia» - Rai 1 (2013 տարուան ընթացքին յայտագրին) ժապաւէնաշարքերուն։

2005-ին հաղորդավարն է «Համբաւներու կղզին» L'isola dei Famosi ներկայացման (reality show)․ «Համբաւաւոր Վերապրողներ»ու Celebrity Survivors իտալական մեկնութիւնը։

Մարտ 2018-ին կը մասնակցի իբրեւ «coach» (մարզիչ) Իտալիոյ «Ձայնը» The Voice (երգի մրցաշարք) յայտագրին։

Րոմինա Փաուըրին հետ

2018-ին, Ալ Պանօ եւ Րոմինա, կ՛ընդառաջեն հրաւէրի մը եւ միասին կը պարեն «Ballando con le stelle» (Աստղերուն հետ պարելով) ժապաւէնաշարքի մէկ յայտագրին մէջ^[17]։

Ինքնակենսագրութիւն

Նոյեմբեր 2006-ին, «Մոնտատորի» Mondadori հրատարակչատունը կը հրատարակէ Ալ Պանոյի ինքնակենսագրականը «È la mia vita» («Աս է իմ կեանքս») խորագրով^[18]։ Ինքնակենսագրութեան մէջ, երկու կիներուն մասին ոչինչ կ՛ ակնարկէ եւ 2 էջ պարապ կը ձգէ։

Անձնական կեանք

Ընտանիք

26 Յուլիս 1970-ին կ՛ամուսնանայ Րոմինա Փաուըրին եւ կը բախտաւորուին 4 զաւակներով․ Իլենիա (1970), Եարի (1973), Քրիստել (1985) եւ Րոմինա Ճիւնիոր (1987)։ 1999-ին կ՛ ամուսնալուծուի առաջին կնոջմէն ու կ՛ամուսնանայ հեռատեսիլի հաղորդավար Լորետանա Լեչիզոյին Loredana Lecciso հետ ու կ՛ունենան 2 զաւակ՝ Եասմին (2001) եւ Պիտօ (2002)։

Այգեգործը

Ալ Պանօ հորմէն կը ժառանգէ այգեգործութեան եւ պանդոկատիրութեան ձեռնարկութիւնը՝ «Tenute Al Bano»։ Կ՛ օգտագործէ ծանօթութիւնները առեւտուրի եւ այգեմշակութեան բնագաւարներուն մէջ եւ կ՛ արտադրէ իր վաճառանիշով լաւ որակի գինիներ։ Ի պատիւ հօրը յիշատակին, գինիներէն մէկը կը կոչէ Տոն Քարմելօ Don Carmelo։

Պարգեւներ

16 Հոկտեմբեր 2001-ին, Մ․Ա․Կ․ի «Սնունդ եւ Երկրագործութիւն Կազմակերպութեան» (FAO) կողմէ կը նշանակուի «Բարեցակամութեան Դեսպան» Goodwill Ambassador։

Յունիս 2016-ին, կը յայտարարուի թէ Ալ Պանոյին կը շնորհուի Ալպանիոյ քաղաքացիութիւնը։

15 Հոկտեմբեր 2016-ին խտրականութեամ դէմ իր տարած պայքարին համար, Մոթա Սանթա Լուչիա աւանի Motta Santa Lucia, Քաէանծարօ, Քալավրիա, հարաւային Իտալիա, պատուոյ քաղաքացիի պարգեւին կ՛արժանանայ։

^[19] ^[20] ^[21] ^[22] ^[23] ^[24] ^[25]

Տե՛ս նաեւ

Ծանօթագրութիւններ

Արտաքին յղումներ

[1] Nel Sole Nel Sole

[2] Io Di Notte-Al Bano

[3] Il ragazzo che sorride

[4] Pensando a te

[5] storia di due innamorati - Ալ Պանօ եւ Րոմինա Փաուըր

[6] Sharazan

[7] Felicità

[8] Ci sarà

[9] Nostalgia canaglia

[10] Cara terra mia

[11] Nel perdono

[12] Una furtiva lagrima

[13] Va, pensiero

[14] La nostra serenata

[15] E lucevan le stelle

[16] Ave Maria

[17] «Աստղերուն հետ պարելով» Ալ Պանօ եւ Րոմինա Փաուըր

[18] «Աս է իմ կեանքս» Ալ Պանօ

[19] Մ․Ա․Կ․ի Սնունդ եւ Երկրագործութիւն Կազմակերպութիւն(անգլերէն)

[20] Ալ Պանօ եւ Չոմինա Փաուըր 14 տարի ետք կրկին միասին

[21] 1982-ի Սան Րեմոյի Փառատօն(իտալ.)

[22] Ալ Պանօ Քարիսի «Սնունդ եւ Երկրագործութիւն Կազմակերպութեան» Դեսպան(անգլերէն)

[23] Ալ Պանոյին կը շնորհուի Ալպանիոյ քաղաքացիութիւնը (անգլերէն)

[24] Լուր մը․ A Message Now Available from. Creative and Dreams Music Network (30 Մայիս 2015)(անգլերէն)

[25] Ոսկեայ ձայնապնակներ(անգլերէն)

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]

[19]

[20]

[21]

[22]

[23]

[24]

[25]