Շիրակ (հանդէս)

Շիրակ
Տեսակ հանդէս
Հիմնադրուած է 1905

Շիրակ (հանդէս), գրական, քաղաքական եւ հասարակական հանդէս (կիսամսեայ, ամէնամսեայ, շաբաթական)։ Լոյս տեսած է 19051907, 1909 թուականներուն, Աղեքսանտրիայի մէջ (19051906), Գահիրէի մէջ (19061907), Կոստանդնուպոլսոյ մէջ (1909)։ Խմբագիր-տնօրէններ՝ Վահան Թէքէեան, Միքայէլ Կիւրճեան, խմբագիր՝ Արփիար Արփիարեան։

Նիւթեր տպագրած է համիտեան կոտորածներու հետեւանքներու, հայութեան, անոր գրականութեան ու մշակոյթի վիճակի, Թուրքիոյ ներքին կացութեան, հայ-ռուսական յարաբերութիւններու եւ այլ հարցերու մասին։ Յիշարժան են Վ․ Թէքէեանի «Թուրքիան կրնայ՝ բարեկարգուիլ», Ա․ Արփիարեանի Հայաստան եւ Ռուսիա» (1905), «Ռուսիոյ հետ» (1906) յօդուածները։ Գրական բաժնին մէջ տեղ գտած են արեւմտահայ, արեւելահայ, ռուս եւ եւրոպական գրողներու ստեղծագործութիւններ, գրախօսական-քննադատական յօդուածներ, մամուլի տեսութիւններ։ Աշխատակցած են Գրիգոր Զօհրապը, Երուանդ Օտեանը, Դանիէլ Վարուժանը, Լեւոն Բաշալեանը, Մ․ Տամատեանը, Ա. Ալպոյաճեանը, Ա․ Ղազիկեանը, Պ․ Հինդլեանը եւ ուրիշներ։

Այս յօդուածի նախնական տարբերակը կամ անկէ մաս մը վերցուած է Հայկական Սովետական Հանրագիտարանէն, որուն նիւթերը հրատարակուած են` Քրիէյթիվ Քամմընզ Նշում–Համանման տարածում 3.0 (Creative Commons BY-SA 3.0) թոյլատրագրի ներքոյ։  CC BY-SA icon 80x15.png