Մարիքա Նինու
| Մարիքա Նինու յուն․՝ Ευαγγελία Ανταμιάν[1] և յուն․՝ Μαρίκα Νίνου | |
|---|---|
 | |
| Ծննդեան անուն | Էվանկելիա Ադամեան |
| Ծնած է | 1922[2] |
| Ծննդավայր | «Էվանկելիսդրիա» նաւ |
| Մահացած է | 23 Փետրուար 1957 |
| Մահուան վայր | Յունաստան |
| Քաղաքացիութիւն |
.svg){kind=small} Յունաստան |
| Ազգութիւն | հայ |
| Տեսակ | ժողովրդական և Ռեպեթիքօ |
| Մասնագիտութիւն | Յունական ժողովրդային «ռեպեթիքօ»ի երգչուհի |
Մարիքա Նինու (յուն․՝ Μαρίκα Νίνου, աւազանի անունով՝ էվանկելիա Վանուհի Ադամեան (յուն․՝ Ευαγγελία Αταμιάν), 1922[2], Յունաստան - 23 Փետրուար 1957, Յունաստան, Էղալէօ), յունահայ երգչուհի։ Յունաստանի իգական սեռի ամէնէն լաւ ձայներէն մէկը։
Կեանքը
[Խմբագրել | Խմբագրել աղբիւրը]Մարիքա Նինու ծնած է 1922-ին, Կիլիկիոյ ջարդերէն փրկուած հայեր փոխադրող յունական «Թրաքի» (Θρακη) նաւուն մէջ։
Նորածինը տկարակազմ ըլլալով, նաւուն վրայ գտնուող գաղթական հայ քահանայ մը կ'օրհնէ զինք։
Մարտ ամսուն Իզմիր կը հասնին։ Հոն կը մկրտուի եւ իրեն կու տան Էվանկելիա-Վանուհի անունը։ Էվանկելիա կը կոչեն, որովհետեւ մկրտութեան օրը՝ 25 Մարտին, յունական Էվանկելիսդրիաս տօնն էր։ Նաւը կը թափառի մինչեւ հիւրընկալ նաւահանգիստ մը գտնէ։ Վերջապէս, Իզմիր (Զմիւռնիա) խարիսխ կը նետէ։ Քանի մը ամիս ետք, աշնան, Փոքր Ասիոյ աղէտէն (յունական բանակի նահանջ) եւ Իզմիրի հրկիզումէն փրկուած հարիւր հազարաւոր յոյն եւ հայ գաղթականներ քաղաքը կը լքեն։ Մանուկ Էվանկելիան Սիսեցի մօրը՝ Կիւլա Ադամեանին, երկու քոյրերուն եւ եղբօրը՝ Պարգեւին հետ Փիրէա կը փոխադրուին «Էվանկելիսդրիա» նաւով:
Հայրը՝ Կեսարացի Հայկ Ադամեան, արհեստով ժամագործ, Իզմիրի աղէտալի օրերուն կը սպաննուի։
Կեանքին առաջին տարիները
[Խմբագրել | Խմբագրել աղբիւրը]Ընտանեօք Քոքինիա կը հաստատուին, Մեղարոն փողոց թիւ 50։ Այդ օրերուն, Յունաստանը անպատրաստ, կ'ընդունի շուրջ մէկ ու կէս միլիոն յոյն եւ հայ գաղթականներ․ հայերուն թիւը՝ 80, 000 էր, որոնցմէ՝ 8, 000-ը որբ։ Փիրէայի շրջակայքը՝ Քոքինիա եւ Լիբազմա կ'ապաստանի շուրջ 11,000 հայ (Տե' ս Քոքինիոյ հայկական գաղութը):
Քոքինիա ողողուած հայ եւ յոյն գաղթականներուն կեանքը բնաւ դիւրին չ'ըլլար, նոյնպէս Էվանկելիային ընտանիքին համար․ դժնդակ տարիներ՝ աղքատութիւն եւ անգործութիւն։
Եօթը տարեկան հասակին կը յաճախէ Քոքինիոյ «Զաւարեան-Ազգային» նախակրթարանը։ Երգի ուսուցիչը կը քաջալերէ զինք կիթառակ (մանտոլինօ) mandolin (երաժշտական գործիք ) սորվիլ, որմէ քանի մը տարի ետք Էվանկելիան կը մասնակցի «Զաւարեան» ակումբի նուագախումբին։
- Այդ տարիներուն, Քոքինիոյ համայնքին կեանքը ընդհանրապէս կը դառնար Զաւարեան ակումբին շուրջ (հիմնուած՝ 1924-ին եւ կառուցուած 1927-ին, կը պատսպարէ նաեւ համանուն վարժարանը) եւ կը հարստանար զանազան առիթներով կազմակերպուած խնճոյքներով, թատերական ներկայացումներով, նուագահանդէսներով, պարահանդէսներով եւ այլ մշակութային կամ գրական ձեռնարկներով։
Գեղեցիկ ձայնին շնորհիւ, նախակրթարանի երգչախումբէն բացի, կ'անդամակցի շրջանի Ս. Յակոբ եկեղեցւոյ դպրաց դասին։ Իր շնորհալի ձայնը յատկապէս կը հնչէ Աւագ Շաբթուան օրերու արարողութիւններուն ընթացքին․ ան կ'երգէ Աւագ Հինգշաբթի օրուան Խաւարման գիշերի «Ո՞ւր ես Մայր իմ» շարականը։
Ընտանեկան Կեանք
[Խմբագրել | Խմբագրել աղբիւրը]1940-ին, կ'ամուսնանայ Հայկ կամ՝ Հայկօ Մեսրոպեանին հետ եւ 1943-ին կը բախտաւորուի մանչ զաւակով մը՝ Յովհաննէս։
Բ․ Համաշխարհային պատերազմի տարիներուն, գերմանացիներու գրաւման շրջանին, Մարիքա Նինուն եւ եղբայրը՝ Պարգեւը, կ'երգեն Քոքինիոյ եկեղեցւոյ դպրաց դասին մէջ։
Մարիքա միաժամանակ Ցիցանիին հետ կ'երգէ ժողովրդային համբաւաւոր Աթիք երգիչին պարտէզին մէջ, ծանօթ իբրեւ «Մանտրա դու Աթիք»։ Հոն կը համախմբուին այդ օրերու մեծագոյն յօրինողները, բանաստեղծները եւ լրագրողները, ինչպէս Թիմոս Մորայիթիս Θύμος Μωραϊτης , Ալեքոս Լիտորիքիս Αλέκος Λιδορίκης, Խրիսթոս Եանաքոփուլոս Χρήστος Γιανακόπουλος, Տիմիթրիս Եանուքաքիս Δημήτρης Γιανουκάκης, Տիմիթրիս Խրոնոփուլոս Δημήτρης Χρονόπουλος, Փանոս Փափատուքաս Πάνος Παπαδούκας, Ալեքոս Սաքելարիոս Αλέκος Σακελάριος եւ ուրիշներ։
Սակայն, Բ․ Համաշխարհային պատերազմի անմիջական հետեւանքները կ'ըլլան ներգաղթն ու արտագաղթը։
1947-ին, Փիրէայի նաւահանգիստէն «Չուկոտկա» սովետական նաւով կը ներգաղթէ 2,000-է աւելի յունահայ, կէսէն աւելին՝ Քոքինիոյ շրջանէն․ անոնց մէջն էր նաեւ Հայկ Մեսրոպեանը։ 1944-էն արդէն զոյգին մէջ հարցեր կային։ Հայկ Մեսրոպեան, առանց ամուսնալուծուելու, Խորհրդային Հայաստանի մէջ կրկին կ'ամուսնանայ եւ հինգ զաւակ կ'ունենայ։
Ասպարէզ
[Խմբագրել | Խմբագրել աղբիւրը]Նախաքայլերը եւ անուան փոփոխութիւնը
[Խմբագրել | Խմբագրել աղբիւրը]Էվանկելիա 1944-ին կը ծանօթանայ Նիքոս Նիքոլայիտիսին՝ Նինոս կեղծանունով լարախաղացին։ Երկուքով «Տուօ Նինօ» մականունով կը սկսին շրջապտոյտներ կազմակերպել, գլխաւորաբար՝ Պելոպոնեսի շրջանին մէջ։ Կ'ամուսնանան եւ կը դառնայ տիկին Էվանկելիա Նիքոլայիտու։ Հետեւելով սկեսրոջ խրատին, Էվանկելիա անունը կը փոխէ Մարիքայի․ սկեսուրը դերասանուհի ըլլալով, անոր կ'առաջարկէ Մարիքա անունը, որովհետեւ հանրածանօթ Մարիքա Քոթոփուլի Μαρίκα Κοτοπούλη - Marika Kotopouli դերասանուհիին կը վերաբերէր։
1948-ին, անոնց կը միանայ հինգամեայ Յովհաննէսը եւ խումբին պիտակը կը վերածուի՝ «Երկուքուկէս Նինօ»-ի։ Այդ ներկայացումներուն ընթացքին, երկչոտ քայլերով Մարիքան յունական ժողովրդային երգեր կը սկսի երգել։
Քանի մը անգամ կը հրաւիրուին Սալամինայի Նաւային Խարիսխը, լարախաղերու համար։ Այդ ներկայացումներէն մէկուն ընթացքին, նաւապետը, որ արեւելեան եւ ի մասնաւորի թրքական մեղեդիներու ջերմեռանդ խանդավառեալ մըն էր, Մարիքայէն երգ մը կը խնդրէ։ Մարիքա տատամսոտ կ'ընդառաջէ նաւապետին խնդրանքին եւ կ'երգէ թրքական երգ մը, զոր մօրմէն սորված էր։ Նաւապետը գոհ կը մնայ, բայց ներկաներէն՝ Փեդրոս (հայ․՝ Պետրոս) Քիրիաքոսը Πέτρος Κυριακός՝ աւելի։ Ան Մարիքան կը ներկայացնէ ժողովրդային երգի հանրածանօթ Մանոլիս Խիոթիս Μανώλης Χιώτης - Manolis Chiotis երգիչին, որ նաեւ յօրինող եւ քնարերգակ էր։
Երաժշտական ասպարէզի ամրապնդում
[Խմբագրել | Խմբագրել աղբիւրը]Մարիքա Նինուին ասպարէզին ամրապնդման սկզբնական քայլերը կը զուգադիպին Բ․ Համաշխարհային պատերազմին վերջաւորութեան Յունաստանի տարածքին մէջ ծագած միջ-քաղաքացիական պատերազմին՝ համայնավարական եւ հակահամայնավարական ուժերուն միջեւ, որ կ'աւարտի 1949-1950 թուականներուն (Տե' ս Յունաստան՝ Բ․ Համաշխարհային Պատերազմ գլուխը):
Յունիս 1948-ին, Մանոլիս Խիոթիս հմայուած Մարիքա Նինուէն, զինք կը հրաւիրէ եւ երկու ձայնապնակի երգ կ'արձանագրէ՝ Ώρες Σε Κρυφοκοιτάζω[3] (թարգմ․՝ «Ժամեր թաքուն կը դիտեմ քեզ») եւ Θα Στο Πω Το Μυστικό Μου [4] (թարգմ․՝ «Գաղտնիքս քեզի պիտի ըսեմ»)։
Այդ տարիներուն զուարճանալու տարածուած միջոց մըն էր «կապելա»ն ταβέρνα, ուր ժողովրդական բեմէն՝ Փալքօ, երգիչները կ'երգեն մանաւանդ յոյն հասարակութեան մէջ, յատկապէս՝ աշխատաւոր, բանուոր դասակարգերուն համբաւ ունեցող ռեպեթիքօ՝ Ρεμπέτικο - rembetiko քաղաքային յունական երաժշտութիւն։
Ռեպեթիքօ՝ քաղաքային-ժողովրդային երգը, «կը ծնի» ԺԹ. դարու վերջաւորութեան․ նախ կը զարգանայ Յունաստանի քաղաք-նաւահանգիստներուն մէջ Փիրէա, Սելանիկ, Վոլօ, ուր կ'ապրի ռամիկ բնակչութիւն՝ բանուոր, արհեստաւոր, ապա՝ քաղաքային «կապելա» կոչուած կեդրոնները։
Երաժշտական բնագաւառի դռները լայնօրէն կը բացուին Մարիքա Նինուին առջեւ
[Խմբագրել | Խմբագրել աղբիւրը]Հոկտեմբեր 1948-ին, Մարիքան կ'ընդառաջէ ընկերակցելու երգեհոնահար եւ ժողովրդային երգիչ Սդելաքիս Փերփինիատիսին Στέλιος Περπινιάδης - Stelios Perpiniadis, «Ֆլորիտա» կոչուած կապելա-կեդրոնին մէջ՝ Ալեքսանտրաս պողոտայ, Աթէնք։
Նոյեմբեր 1948-ին, Մարիքա կը գործակցի Եանի Փափայոանուին Γιάννης Παπαϊωάννου - Giannis Papaioannou հետ եւ Το 'φαγες Το Παιδί [5] (թարգմ․՝«Տղուն գլուխը կերար») երգը սկաւառակի կը ձայնագրէ։
1949, Մարիքա Նինուն յօրինող եւ քնարերգակ Եորղօ Միցաքիսին Γιώργος Μητσάκης - Giorgos Mitsakis երգերէն քանի մը հատը սկաւառակի կը ձայնագրէ։ Նոյն տարուան Հոկտեմբերին, կը ձայնագրէ Վասիլի Ցիցանիին Βασίλης Τσιτσάνης - Vassilis Tsitsanis երգը՝ Για Τα Μάτια Π' Αγαπώ[6](թարգմ․՝«Սիրած աչքերուս համար»)։
- Վասիլի Ցիցանիս․ Ի. դարու Յունաստանի համբաւաւոր երգիչ, յօրինող եւ քնարերգակ։
Մարիքա Նինուի ասպարէզին կարեւոր շրջադարձը
[Խմբագրել | Խմբագրել աղբիւրը]Երգչուհիին ասպարէզին կարեւոր շրջադարձը կը պատահի քանի մը ամիս ետք, երբ կը սկսի երգել Աթէնքի հանրածանօթ «Ծիմի թու խոնտրու» Τζίμη του Χοντρού կապելա-կեդրոնին մէջ Ախարնոն փողոց թիւ 77, Վասիլի Ցիցանիսին հետ։ Վերջինս, Մարիքային հետագայ յաջողութիւններուն գլխաւոր ուղեկիցը պիտի դառնար, հակառակ այն իրողութեան, թէ մշտապէս կը վիճէին․ երկուքն ալ զօրաւոր նկարագիրի տէրեր էին։
Նինու շուտով Ցիցանիսին մուսան կը դառնայ։ Սակայն ռեպեթիքօ երաժշտութեան բնագաւառին մէջ Մարիքա իր ներկայութիւնը կ'ամրապնդէ շնորհիւ Փացիֆաս անունով ձեռներէց նորարարի ներդրումին․ ան Մարիքա Նինուին անունը հանրածանօթ կը դարձնէ։
1951-ին, Փացիֆասը զուգահեռ կերպով Նինուին 33-նոց երկու սկաւառակներ ձայնագրել կու տայ։ Առաջինը յենած Մանոս Խածիտաքիսին Μάνος Χατζιδάκης - Manos Hatzidakis երաժշտութեան վրայ, իսկ երկրորդը՝ Ցիցանիսի յօրինած ռեպեթիքոներով։
- Մանոս Խածիտաքիս. 20-րդ դարու Յունաստանի համբաւաւոր խմբավար, բանաստեղծ, դաշնակահար եւ յօրինող։ 1961-ին Պարգեւատրուած է Օսքար մրցանակով «Oscar - Academy Awards» «Փիրէայի տղաքը» (Τα παιδιά του Πειραιά) երգին համար, յօրինուած՝ Ժիւլ Տասենի - Jules Dassin «Երբեք Կիրակի օր» (Ποτέ την Κυριακή - Never on Sunday) ժապաւէնին համար։
Նոյն տարին, Ցիցանիսին եւ Էվանկելիա Մարղարոնիին հետ ելոյթ կ'ունենան Պոլսոյ «Քազապլանքա» կեդրոնին մէջ բացառիկ յաջողութեամբ։ Ելոյթներուն հասոյթը հետեւեալ կերպով կը բաժնուի․ 3 ոսկեդրամ Ցիցանիսին, 2 ոսկեդրամ Նինուին եւ 1 ոսկեդրամ Մարղարոնին։ Իր վարձատրութեան ոսկեդրամով, Մարիքա Էղալէօ Αιγάλεω քաղաքին մէջ (Քոքինիոյ հիւսիս-արեւմուտքը), կը ձեռնարկէ իր բնակարանի շինութեան։
Յունաստանի միջ-քաղաքացիական կռիւները կ'աւարտին ձախակողմեան ուժերու պարտութեամբ։ Կը յաջորդէ ռեպեթիքօ երգի խոր տագնապը։
1952 - 1955, համբաւի արժանացած մեծագոյն աստղերը՝ ժողովրդական երգահաններ կամ պուզուքիի μπουζούκι - bouzouki ճարտար նուագածուներ, շատ մեծ դժուարութեամբ գործ կը գտնեն։
Ամերիկա տեղափոխումը
[Խմբագրել | Խմբագրել աղբիւրը]Այդ տարիներուն Ա․Մ․Ն․-ի մէջ յունական երգերու մեկնաբանութիւններէն հասոյթը շատ մեծ էր․ հոն կար յունական հսկայ գաղութ մը, որ կարօտը ունէր լսելու յունական երգեր, մանաւանդ՝ ռեպեթիքօ։
1955-ին, Ամերիկայի Միացեալ Նահանգներ կը տեղափոխուի հիմնական երկու պատճառներով.
- Եղբօրը քառանդամ ընտանիքը եւ զաւակը՝ Յովհաննէսը, իր տնտեսական հոգատարութեան կարիքը ունէին․ եղբայրը՝ Պարգեւը, քաղցկեղէ կը տառապէր։
- 1954-ին, կ'իմանայ թէ ինքն ալ արգանդի քաղցկեղէ կը տառապէր։ Աթէնքի հիւանդանոցներէն մէկուն մէջ գործողութեան կ' ենթարկուի։ Լսած էր, թէ Ամերիկա այս հիւանդութեան համար բուժման միջոցները աւելի յառաջացած էին եւ կ'որոշէ Ա․Մ․Ն․ մեկնիլ։
Ամերիկա մեկնումին եւ հոն կեցութեան ու բուժման ծախսերը կը հոգան Ռենա Տալիա Ρένα Ντάλια եւ Գոսդաս Գափլանիս Κώστας Καπλάνης։
Մահը
[Խմբագրել | Խմբագրել աղբիւրը]1956-ին, Յունաստան կը վերադառնայ եւ հակառակ անտանելի ցաւերուն, գործի կը լծուի մինչեւ Փետրուար 1957-ի սկիզբները։
22 Փետրուար 1957-ին, Շաբաթ լուսցող Ուրբաթ գիշեր մը, Էղալէոյի իր բնակարանին մէջ, Մարիքա Նինուն կը մահանայ․ ան հազիւ 35 տարեկան էր։ Կը թաղուի Նէափոլիին գերեզմանատան մէջ, եղբօրը՝ Պարգեւին, կողքին․ Պարգեւ մահացած էր 1955-ին, 42 տարեկան հասակին։
Մարիքա Նինուին յուղարկաւորութիւնը
[Խմբագրել | Խմբագրել աղբիւրը]Մարիքա Նինուին (Էվանկելիա Ադամեան ) յուղարկաւորութիւնը տեղի կ'ունենայ խուռներամ պարզ ժողովուրդի ներկայութեամբ։ Ներկայ կը գտնուին նաեւ Ցիցանիս, Խիոթիս, Մերի Լինտա, Աննա Խրիսաֆի, Փոլի Փանու, Սոթիրիա Պելլու, Ծիմի Խոնտրոս, Փափայիոաննու, Մարքոս Վամվաքարիս, Գ․ Գափլանիս, Քերոմիթիս եւ ուրիշ հանրածանօթ երաժիշտներ։
[7] [8] [9] [10] [11] [12] [13]
Յետ մահու
[Խմբագրել | Խմբագրել աղբիւրը]Մարիքա Նինու գրեթէ ոչինչ կը ձգէ հարազատներուն․ եղբօր աղջկան՝ Կիւլա Ադամեան Անսերեանին քով, կան նկարներ եւ քանի մը հագուստներ։ Էղալէոյի բնակարանը կը բռնագրաւուի կարգ մը շահագործներէ։
Ընտանիքը ազգագրագէտ Իլիաս Փեթրոփուլոսի օգնութեամբ կը փորձէ Նիքոս Փարասքեւոփուլոս անունով անձին սեփականութեան անցած Նինուին փաստաթուղթերն եւ վաւերագրական առարկաները յայտնաբերել եւ ձեռք ձգել․ քանի մը ձայնապնակ, այդ օրերու թերթերու յօդուածներ, երկու սկաւառակ՝ ուր իր զաւկին հետ կը խօսի, քիչ թիւով լուսանկարներ, անցագիրն ու անձնաթուղթը, արհեստաւորի տետրակ եւ երկու ձայնաժապաւէն։ Սակայն անկարելի կ'ըլլայ։
Մարիքա Նինու, ասուպը
[Խմբագրել | Խմբագրել աղբիւրը]Եզակի է Մարիքա Նինուին ներդրումը ռեպեթիքօ երգի տարածման մէջ։ Մեծ յաջողութեամբ կ'երգէ նաեւ ազնուառեպեթիքօ αρχοντορεμπέτικα կոչուած երգեր։ Անկրկնելի ձայնը, ռեպեթիքօ երգը ժողովուրդին պարզ խաւերէն կ'անցընէ աւելի բարձր ընկերային դասակարգերուն։
Ան նոր հուն կը բանայ յունական ժողովրդական երգին մէջ եւ այդ մէկը կը յաջողի իրագործել միա՛յն ութ տարուան արհեստավարժ գործունէութեամբ։
Գոսդաս Ֆերիսի 1983 «Ռեպեթիքօ» ֆիլմը ներշնչուած է Մարիքա Նինուին կեանքէն։
1974-ին, միջազգային համբաւի արժանացած յօրինող Մանոս Խածիտաքիս Manos Hatzidakis - Μάνος Χατζιδάκις անոր յիշատակին կը նուիրէ իր «Փերիքս» Πέριξ ձայնապնակը։
Երգարուեստի բնագաւառէն քանի մը ծանօթ դէմքերու նկարագրութիւնները Նինուին անձին մասին․
|
Բեմին վրայ անմրցելի էր, իր շարժումները ցնցող ուժ մը կը պարունակէին, իսկ երբ կ'երգէր այդպիսի արտայայտչականութիւն եւ հաղորդակցութիւն կը փոխանցէր ունկընդիրներուն, որ այդ համոզումը կու տային թէ իր նմանը պիտի չծնի երբեք։ - Վասիլիս Ցիցանիս
|
|
|
|
«Մարիքա Նինու ճանաչում ստացաւ իբրեւ հնչիւնային մարմնաւորում գոյութիւն ունեցող մարմնոյ ու ոգիին, ու կը բնակէր այն ժամանակ քաղաքներու ժողովրդային թաղամասերուն մէջ։ Ու պատահական չէ, որ նման համեմատութիւն մը ունեցող Մ․Պիթիքոցիս եւ Նինու, յունական երգի բուրգի գագաթը կը գտնուին իբրեւ երկու պատմական դէմքեր: - Եորղոս Փափատաքիս, երաժշտագէտ
|
|
|
|
Մարիքա Նինու գեղեցիկ ու կրքոտ ձայն մըն է, որ ենթարկուած է միշտ ազնուական արուեստի մը հրաւէրներուն, առանց երբեք սահմանները ինքնակամօրէն խախտելու։ Այս արուեստը բնածին քաղաքավարութիւն մը կը պարունակէ, նաեւ՝ ժողովրդային ազնուականութիւն մը։ - Սոֆիա Սփանուտի, երաժշտագէտ՝ 1951
|
|
|
|
Իր ձայնը կը տիրապետէր մնացեալ ձայներուն վրայ։ Մինչեւ այդ օրը կնոջական ձայները (զուգերգի պարագային, խմբ․) միայն ընկերակցելու կը ծառայէին։ Մարիքա Նինուին շնորհիւ, երգչուհին դարձաւ տիրող՝ առաջին ձայն․․․։ Մէկ տեղ պալքանեան քէֆով կ'երգէ։ Ուրիշ տեղ՝ ներքին արտասուքով մը։ Թէ' Արեւմուտք է, թէ' Արեւելք։ Տարբեր ձեւով ըսուած՝ Յունաստա'նն է ան: - Ալքիսթիս Փրոթոփսալթի
|
|
|
|
Երգի -ֆամ ֆաթալն (ճակատագրական կին) էր՝ յոյզերով լեցուն ու ապրումներով։ Ժողովուրդին ծոցէն ելած՝ իսկապէս մեծահոգի էր․․․։ Իր կախարդանքը ձայնին մէջ չի կայանար, այլ իր դրսեւորած հոգիին մէջ: - Վիքի Մոսխոլիու
|
|
|
|
Հաստատեցի, թէ երգիչ մը կարող է իր ոճը կամ իր խօսելաձեւին մէկ մասը կրկնել, բայց չի կրնար ընդօրինակել իր հոգեկանութիւնը։ Եւ ա՛յս իսկ պատճառով Նինուն անկրկնելի է։ - Ղլիքերիա
|
|
|
|
Փարիզի ձիւնոտ գիշեր մըն էր Յունուար 1985-ին։ Ականջներուս տակաւին կ'արձագանգէ Իլիաս Փեթրոփուլոսին հաստատ ձայնը մեր ողջերթի պահուն՝ «Յոյները կ'անգիտանան թէ ռեպեթիքոյի մեծագոյն երգչուհին յոյն չէր։ Մարիքա Նինուն հայուհի էր, թէ՛մօր, թէ՛ հօր կողմէ»։ - Եորղոս Ի․ Ալլամանիս
|
|
Գործունէութիւնը
[Խմբագրել | Խմբագրել աղբիւրը]Մարիքա Նինու մասնակցած է կամ առանձին երգած է ձայնապնակի վրայ՝ 174 երգ։
Այս երգերէն 1/3 Ցիցանիին կը պատկանին եւ մնացեալ 20-ը այլ յոյն յօրինող կամ քնարերգակներու։
174 երգերէն, 119-ն իբրեւ առաջին ձայն կ' երգէ, իսկ մնացեալ 55-ը՝ երկրորդ ձայն։
1954-ի ամառը, Աթէնքի «Փարնասոս» սրահին մէջ, կը ձայնագրէ Ցիցանիին 9 երգերը, իսկ 1955-ին, «Ծիմի թու խոնտրու» կեդրոնին մէջ՝ 11 երգ։
Առանձին երգած 119 երգերը 78-նոց սկաւառակի ձայնագրուած են։ Ասոնք ձայնագրուած են յաջորդաբար հետեւեալ ընկերութիւններէն՝ 34-ը His Masters Voice, 37՝ Columbia, 8՝ Odeon, 6՝ Parlophone, 12՝ Melody, 20՝ Ամերիկայի Liberty եւ 2՝ Աւստրալիոյ Apollo։
Նշենք, թէ Մարիքա Նինու չորս երգերու խօսքերը գրած է․ երկուքը Յունաստան եղած ատեն, մնացեալ երկուքը՝ Ա․Մ․Ն․ (վերջիններուն նաեւ երաժշտութիւնը)։
Ձայնապնակի վրայ կարգով արձանագրուած Նինուին երգած երգերը․
| Տարի | Տիտղոս | Հայերէնի թարգմ․ | Մեկնաբանութիւն | Երգահան-խօսքի հեղինակ |
|---|---|---|---|---|
| 1948 | Ώρες Σε Κρυφοκοιτάζω | Ժամերով թաքուն քեզ կը դիտեմ | Մ․ Նինու, Մ․ Խիոթիս | Մ․ Խիոթիս |
| 1948 | Θα Στο Πω Το Μυστικό Μου | Գաղտնիքս քեզի պիտի ըսեմ | Մ․ Նինու, Մ․ Խիոթիս | Մ․ Խիոթի |
| 1948 | Το 'φαγες Το Παιδί | Տղուն գլուխը կերար | Մ․ Նինու, Ս․Փերփինիատիս | Ղ․ Փափայոանու |
| 1948 | Άνθρωποι-Άνθρωποι | Մարդիկ-մարդիկ | Մ․ Նինու, Ս․Փերփինիատիս | Ղ․ Փափայոանու |
| 1948 | Με Κάρφωσαν Τα Μάτια Σου | Աչքերդ վրաս մնացին | Մ․ Նինու, Մ․ Խիոթիս | Մ․ Խիոթիս |
| 1948 | Είσαι Φίνος Χαρακτήρας | Եզակի նկարագիր ունիս | Մ․ Նինու, Ս․Փերփինիատիս | Մ․ Խիոթիս |
| 1948 | Ο Κυνηγός | Որսորդը | Մ․ Նինու, | Գ․ Սոթիրիատիս, Տ․ Խածիթէոլողու |
| 1948 | Η Βλάχα | Գեղջկուհին | Մ․ Նինու, | Գ․ Սոթիրիատիս, Տ․ Խածիթէոլողու |
| 1948 | Νύχτες Ξενυχτώ Χωρίς Ελπίδα | Գիշերները անյոյս՝ արթուն կը մնամ | Մ․ Նինու, Ս․Փերփինիատիս | Ղ․ Փափայոանու |
| 1948 | Τον Άνδρα Της Γυρεύει | Ամուսինը կը փնտռէ | Մ․ Նինու, Ս․Փերփինիատիս | Ղ․ Փափայոանու, Լ․ Պաքալիս |
| 1949 | Σούλα | Սուլա | Մ․ Նինու, | Գ․ Սոթիրիատիս, Տ․ Խածիթէոլողու |
| 1949 | Κούκλα Μου Εσύ | Պուպրիկս ես դուն | Մ․ Նինու, | Գ․ Սոթիրիատիս, Տ․ Խածիթէոլողու |
| 1949 | Ο Τραυματίας | Վիրաւորը | Մ․ Նինու | Վ․ Ցիցանիս |
| 1949 | Πού Θα Πας Πού Θα Τα Βρεις Στρωμένα | Ո՞ւր պիտի երթաս, ո՞ւր ամէն ինչ պատրաստ պիտի գտնես | Մ․ Նինու, Փրոտրոմոս Ցաուսաքիս, Վ․ Ցիցանիս | Վ․ Ցիցանիս |
| 1949 | Πάλι Θα Σμίξουμε | Կրկին պիտի միանանք | Մ․ Նինու, Վ․ Ցիցանիս, Ղ․ Միցաքիս | Վ․ Ցիցանիս, Ղ․ Միցաքիս |
| 1949 | Κατεργάρα | Խարդախիկ | Մ․ Նինու, Ս․Փերփինիատիս | Մ․ Նինու |
| 1949 | Ας Την Κρίνει Ο Θεός | Աստուած զայն դատէ | Մ․ Նինու, Ս․Փերփինիատիս | Մ․ Նինու |
| 1949 | Η Μικρή Του Καμηλιέρη | Ուղտապանին օրիորդիկը | Մ․ Նինու, Աթանասիոս Էվղենիքոս | Ափոսթոլոս Խածիխրիստոս |
| 1949 | Ο Παντρεμένος | Ամուսնացածը | Մ․ Նինու, Փ․ Ցաուսաքիս, Վ․ Ցիցանիս | Վ․ Ցիցանիս |
| 1949 | Για Τα Μάτια Π' Αγαπώ | Սիրած աչքերուս համար | Մ․ Նինու, Փ․ Ցաուսաքիս, Վ․ Ցիցանիս | Վ․ Ցիցանիս |
| 1950 | Στα Μπουζούκια Να Με Πας | Զիս պուզուքիա տար | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Τα Τρία Αδέλφια | Երեք եղբայրները | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Η Χήρα Του Φαντάρου | Զինուորին այրին | Մ․ Նինու, Փանոս Փեցաս | Փ․ Փեցաս |
| 1950 | Το Βιτριόλι | Ծծմբատը | Մ․ Նինու, Վ․ Ցիցանիս, Ն․ Վուլղարիս | Վ․ Ցիցանիս |
| 1950 | Ο Πρώτος Άντρας Που Αγάπησα | Առաջին սիրած տղամարդս | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Η Γυναίκα Που Ψηφίζει | Կինը, որ կը քուէարկէ | Մ․ Նինու, Աթանասիոս Էվղենիքոս | Ափոսթոլոս Քալտարաս |
| 1950 | Έχασα Τα Μάτια Τα Ωραία | Գեղեցիկ աչքերը կորսնցուցի | Մ․Նինու, Մ․ Խիոթիս | Մ․ Խիոթիս |
| 1950 | Παράξενη Κοπέλα | Տարօրինակ աղջիկ | Մ․Նինու, Ն․ Վուլղարիս, Մ․ Խիոթիս | Մ․ Խիոթիս |
| 1950 | Σούρουπο Με Συννεφιά | Ամպոտ իրիկնամուտ | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Έχεις Δίκιο | Իրաւունք ունիս | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Η Ταμπακέρα | Մոխրամանը | Մ․ Նինու, Վ․ Ցիցանիս | Իոսիֆ Ռիցիարիս, Միմիս Թրայֆորոս |
| 1950 | Θα Σε Τιμωρήσω | Պիտի պատժեմ քեզ | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Το Όνειρο Της Αδελφής | Քրոջը երազը | Մ․ Նինու, Փ․ Ցաուսաքիս, Վ․ Ցիցանիս | Վ․ Ցիցանիս |
| 1950 | Χάθηκε Η Προξενιά | Խնամախօսութիւնը կորսուեցաւ | Մ․ Նինու, Փ․ Ցաուսաքիս | Խրիստոս Միկոս |
| 1950 | Γιατί Άλλαξες Γιατί | Ինչո՞ւ փոխուեցար, ինչո՞ւ | Մ․ Նինու, Ս․ Քերոմիթիս | Ս․ Քերոմիթիս, Գ․ Մանեսիս |
| 1950 | Απόψε Μες Στο Καπηλειό | Այսօր, կապելային մէջ | Մ․ Նինու, Ս․ Քերոմիթիս, Վ․ Ցիցանիս | Վ․ Ցիցանիս |
| 1950 | Η Καρδιά Σου Θα Γίνει Χρυσή | Սիրտդ ոսկի պիտի դառնայ | Մ․ Նինու, Փ․ Ցաուսաքիս, Վ․ Ցիցանիս | Վ․ Ցիցանիս |
| 1950 | Τι Σου Φταίω | Ես ինչո՞վ մեղաւոր եմ | Մ․ Նինու | Ղ․ Միցաքիս |
| 1950 | Βαλεντίνα | Վալենթինա | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Η Μικρούλα | Փոքրիկը (օրիորդիկը իմաստով) | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Εγώ Είμαι Για Σένα | Ես քեզի եմ | Մ․ Նինու, Աթանասիոս Էվղենիքոս | Ա․ Քալտարաս |
| 1950 | Κουτσομπόλα Χτύπα Ξύλο | Քարը զարկ բամբասող | Մ․ Նինու, Վուլղարիս, Մ․ Խիոթիս | Մ․ Խիոթիս |
| 1950 | Δεν Θα Ξαναϊδωθούμε | Կրկին պիտի չհանդիպին | Մ․ Նինու, Իոաննիս Թաթասոփուլոս, Ն․ Վուլղարիս | Մ․ Խիոթիս |
| 1950 | Το Κουρέλι | Քուրջը | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Με Την Καρδιά Μου Παίζεις | Սիրտովս կը խաղաս | Մ․ Նինու, Իոաննիս Թաթասոփուլոս, Ղ․ Միցաքիս | Ղ․ Միցաքիս |
| 1950 | Σ' Αυτό Το Ρεματάκι | Այս ակին | Մ․ Նինու, Աթ․ Ղիանոփուլոս, Ա․ Էվղենիքոս | Գոստաս Քոնտողիորղոս |
| 1950 | Γιαλό-Γιαλό | Ծովափ-ծովափ | Մ․ Նինու, Աթ․ Ղիանոփուլոս, Ա․ Էվղենիքոս | Գոստաս Քոնտողիորղոս |
| 1950 | Κι Αν Αμάρτησα Δεν Φταίω | Եթէ մեղանչեցի, յանցաւոր չեմ | Մ․ Նինու, Աթ․ Ղիանոփուլոս, Ն․ Վուլղարիս | Խ․ Թամվաքիս |
| 1950 | Εφώτισε Η Χαραυγή | Լուսցաւ արեւածագը | Մ․ Նինու, Աթ․ Ղիանոփուլոս, Ն․ Վուլղարիս | Խ․ Թամվաքիս |
| 1950 | Μην Περιμένεις | Մի՛ սպասեր | Մ․ Նինու | Միխալիս Ենիցարիս |
| 1950 | Τσίφτισσα | «Ցիֆդիսա» | Մ․ Նինու, Ա․ Էվղենիքոս, Միխալիս Ենիցարիս | Միխալիս Ենիցարիս |
| 1950 | Το Πεζοδρόμιο | Մայթը | Մ․ Նինու, Իոաննիս Թաթասոփուլոս, Ղ․ Միցաքիս | Իոաննիս Թաթասոփուլոս, Նիքոս Ռուցոս |
| 1950 | Το Δέκα Το Καλό | Տասն լաւը | Մ․ Նինու, Իոաննիս Թաթասոփուլոս, Ղ․ Միցաքիս | Իոաննիս Թաթասոփուլոս, Նիքոս Ռուցոս |
| 1950 | Φτάνει Που Θα Μ' Αγαπάει | Բաւ է, որ զիս պիտի սիրէ | Մ․ Նինու, Բաւ է որ զիս պիտի սիրէ | Բաւ է որ զիս պիտի սիրէ |
| 1950 | Κι Αν Πάθεις Και Καμιά Ζημιά | Վնաս ալ նոյնսիսկ գայ գլխուդ | Մ․ Նինու, Վ․ Ցիցանիս | Վ․ Ցիցանիս |
| 1951 | Το Ελληνόπουλο | Յոյն պատանին | Մ․ Նինու | Ն․ Ֆիլիփու-Թուրքաքիս |
| 1951 | Έρχεται Τ' Αγόρι Μου | Ընկերս կու գայ | Մ․ Նինու, Իոաննիս Թաթասոփուլոս | Ա․ Պուրլիասքոս |
| 1951 | Αραμπάς Με Τα Στολίδια | Զարդերով կառքը | Մ․ Նինու, Իոաննիս Թաթասոփուլոս, Ն․ Վուլղարիս | Ա․ Պուրլիասքոս |
| 1951 | Είσαι Γυναίκα Αμαρτωλή | Մեղաւոր կին ես | Մ․ Նինու, Ն․ Վուլղարիս | Ա․ Պուրլիասքոս |
| 1951 | Η Σεράχ | Սերահը | Մ․ Նինու | Վ․ Ցիցանիս |
| 1951 | Αντιλαλούνε Τα Βουνά | Լեռները կ'արձագանգեն | Մ․ Նինու, Ս․ Ծաունաքոս, Ս․ Էվսթաթիու | Վ․ Ցիցանիս |
| 1951 | Πόνεσα Μες Στην Καρδιά | Սիրտս ցաւեցաւ | Մ․ Նինու | Ղ․ Քլուվաթոս |
| 1951 | Χάθηκα-Χάθηκα | Կորսուեցայ-կորսուեցայ | Մ․ Նինու | Ս․ Խրիսինիս, Ի․ Փափատոփուլոս |
| 1951 | Τα Διαλεχτά Παιδιά | Ընտիր տղաքը | Մ․ Նինու, Փ․ Ցաուսաքիս, Ս․ Էվսթաթիու | Վ․ Ցիցանիս |
| 1951 | Την Πιο Ωραία Μου Ζωή | Ամենալաւ կեանքս | Մ․ Նինու, Ս․ Էվսթաթիու | Վ․ Ցիցանիս |
| 1951 | Χρόνια Πολλά Σε Λάτρευα | Տարիներ քեզ կը պաշտէի | Մ․ Նինու, Ս․ Էվսթաթիու | Վ․ Ցիցանիս |
| 1951 | Είμαι Μια Δυστυχισμένη | Դժբախտ մըն եմ | Մ․ Նինու, Ս․ Էվսթաթիու, Վ․ Ցիցանիս | Վ․ Ցիցանիս |
| 1951 | Παλαμάκια | Ծափիկներ | Մ․ Նինու, Իոաննիս Թաթասոփուլոս, Ն․ Վուլղարիս, Ղ․ Միցաքիս | Ղ․ Միցաքիս |
| 1952 | Άιντε Παράτα Με | Հանգիստ ձգէ զիս | Մ․ Նինու, Նիքոս Քալերղիս, Ի․ Ծիվանիս | Ա․ Քալտարաս |
| 1953 | Δεν Μου Κοβότανε Το Χέρι | Երանի ձեռքս կտրուէր | Մ․ Նինու, Ս․ Ծաունաքոս, Իոաննիս Թաթասոփուլոս | Ն․ Նիքոլայիտիս |
| 1953 | Ο Κόκορας | Աքլորը | Մ․ Նինու | Վ․ Ցիցանիս |
| 1953 | Μπάλοι | Պալի | Մ․ Նինու, Վ․ Ցիցանիս | Վ․ Ցիցանիս |
| 1953 | Καβουράκια | Խեչափառիկները | Մ․ Նինու, Վ․ Ցիցանիս, Խարալամպոս Մավրիտիս | Վ․ Ցիցանիս |
| 1953 | Ο Μήνας Έχει Εννιά | Եւ ամսուն ինն է | Մ․ Նինու, Վ․ Ցիցանիս, Խ․ Մավրիտիս | Միխալիս Սողիուլ, Ղ․ Ծավելաս |
| 1953 | Απόψε Κάνεις Μπαμ | Այսօր «պամ» կ'ընես | Մ․ Նինու, Վ․ Ցիցանիս | Վ․ Ցիցանիս |
| 1953 | Παίξτε Μπουζούκια | Պուզուքեաներ, խաղացէ՛ք | Մ․ Նինու, Վ․ Ցիցանիս | Վ․ Ցիցանիս |
| 1953 | Φτωχόπαιδο | Աղքատիկը | Մ․ Նինու, Վ․ Ցիցանիս | Վ․ Ցիցանիս |
| 1953 | Θάλασσα, Μπαρμπαριά κ.α. | Ծով, «պարպարիա» եւ ուրիշ | Մ․ Նինու, Վ․ Ցիցանիս | Վ․ Ցիցանիս |
| 1953 | Αλέγκρο (ποτ πουρί) | Ալեկրօ | Մ․ Նինու, Վ․ Ցիցանիս | Վ․ Ցիցանիս |
| 1953 | Ό,τι Μου Κάνεις Θα Σου Κάνω | Ինչ որ ինծի կ'ընես, պիտի հակադարձեմ | Մ․ Նինու | Վ․ Ցիցանիս |
| 1954 | Βουνό | Լեռը | Մ․ Նինու | Լ․ Տարալաս, Վ․ Փրեքաս |
| 1954 | Έλα Όπως Είσαι | Եկուր ինչպէս որ ես | Մ․ Նինու, Վ․ Ցիցանիս | Վ․ Ցիցանիս |
| 1954 | Τι Σήμερα Τι Αύριο Τι Τώρα | Ի՞նչ այսօր, ի՞նչ վաղը, ի՞նչ հիմա | Մ․ Նինու, Վ․ Ցիցանիս | Վ․ Ցիցանիս |
| 1954 | Αυτή Η Θλιβερή Βραδιά | Այս տխուր իրիկունը | Մ․ ՆԻնու | Պ․Պաքալիս |
| 1954 | Ζαΐρα | Զայիրա | Մ․ Նինու, Ի․ Սալասիտիս, Ա․ Ղիանոփուլոս | Վ․ Ցիցանիս |
| 1954 | Γεννήθηκα Για Να Πονώ | Ծնայ ցաւելու համար | Մ․ ՆԻնու, Թ․ Պինիս | Վ․ Ցիցանիս |
| 1954 | Καρδιές Βασανισμένες | Տանջուած սրտեր | Մ․ ՆԻնու, Ս․ Փլեսաս | Ն․ Կումաս |
| 1955 | Είσαι Μια Κότα Παρδαλή | Պիսակաւոր հաւ մըն ես | Մ․ ՆԻնու, Ս․ Սուղիուլծիս, Փափազողլու | Մ․ Նինու |
| 1955 | Λόγια Ανταλλάξαμε Βαριά | Իրարու ծանր խօսքեր ըսինք | Մ․ Նինու | Թոնիս Մարուտաս |
| 1955 | Αγάπη Που 'γινες Δίκοπο Μαχαίρι | Սէր, որ երկտրուկ դանակի վերածուեցար | Մ․ Նինու | Վ․ Ցիցանիս, Մանոս Խածիտաքիս |
| 1955 | Θάλασσα Πικροθάλασσα | Ծով․ թթու ծով | Մ․ ՆԻնու, Ս․ Սուղիուլծիս | Տ․ Էվսթաթիու, Ղ․ Ցաքալոս |
| 1955 | Νύφη Εγώ Στην Εκκλησιά | Ես Հարս, եկեղեցիին | Մ․ Նինու, Տ․ Էվսթաթիու | Մ․ Նինու |
| 1956 | Δώσ' Του Δώσ' Του Νάνι-Νάνι | Տուն անոր, տուր, Նանի նանի | Մ․ Նինու | Ղ․ Քլուվաթոս |
| 1956 | Παράπονα Παράπονα | Գանգատներ, գանգատներ | Մ․ Նինու, Փանոս Ղավալաս, Ռենա Ղիանուլաթու | Ղ․ Քլուվաթոս |
| 1956 | Κάθε Βράδυ Πάντα Λυπημένη | Ամէն գիշեր, միշտ տրտում | Մ․ Նինու, Վ․ Ցիցանիս | Վ․ Ցիցանիս |
| 1958 | Ζαΐρα | Զայիրա | Մ․ Նինու, Վ․ Ցիցանիս | Վ․ Ցիցանիս |
| 1958 | Ατσιγγάνες | Գնչուհիներ | Մ․ Նինու | Ս․ Խչիսինիս |
Կը յաջորդեն Նինուին ձայնագրութիւնները, զորս Liberty ամերիկեան ընկերութիւնը հրապարակած է։ Այս ձայնագրութիւններուն մեծամասնութիւնը Ամերիկա Ա․Մ․Ն․ կը կատարուին 1954-1956 թուականներուն, Նինուին հոն գտնուած ընթացքին։ Սակայն հաւանական է նաեւ, թէ Liberty-ն վերահրապարակած ըլլայ նաեւ Նինուին քանի մը հին երգերն ալ, որոնք Յունաստան ձայնագրուած էին։
| Տիտղոս | Հայերէնի թարգմ․ | Մեկնաբանութիւն | Երգահան-խօսքի հեղինակ |
|---|---|---|---|
| Σε Παλάτια Σε Τσαντίρια | Պալատներու, վրաններու տակ | Մ․ Նինու, Վ․ Ցիցանիս | Վ․ Ցիցանիս |
| Της Φτώχειας Τα Κουρέλια | Աղքատութեան քուրջերը | Մ․ Նինու | Վ․ Ցիցանիս |
| Τα Καράβια Στο Γιαλό | Ծովափին նաւերը | Մ․ Նինու, Խ․ Մաքրիս | Գ․ Գափլանիս |
| Χτύπα Καμπάνα | Զանգակ, հնչէ՛ | Մ․ Նինու | Մ․ Պաքալիս |
| Φεύγω Για Ταξίδι | Ճամբորդութեան կը մեկնիմ | Մ․ Նինու | Անծանօթ է |
| Πες Μου Αν Με Βαρέθηκες | Ըսէ՛, եթէ զզուեցար | Մ․ Նինու | Մ․ Խիոթիս |
| Δεν Σε Νοιάζει, Δεν Σε Νοιάζει | Հոգդ է, հոգդ | Մ․ Նինու | Գ․ Գափլանիս |
| Σ' Αγαπώ Σ' Αγαπώ | Քեզ կը սիրեմ, կը սիրեմ | Մ․ Նինու, Ն․ Գափլանիս, Խ․Մաքրիս | Նիքոս Ղունարիս |
| Τα Καβουράκια | Խեչափառիկները | Մ․ Նինու, Ն․ Գափլանիս, Խ․Մաքրիս | Վ․ Ցիցանիս |
| Είσαι Η Γυναίκα Που Μ' Αρέσει | Կինն ես, զոր կը հաւնիմ | Մ․ Նինու, Ն․ Գափլանիս | Ս․ Քորոնիս, Նիքոս Ֆացէաս |
| Πάρε Πια Το Δρόμο Σου | Ա՛լ գտիր քու ճամբադ | Մ․ Նինու | Աքիս Զմիռնէոս, Մ․ Թրայֆորոս |
| Τι Όμορφη Που Είσαι Όταν Κλαις | Որքան գեղեցիկ ես, երբ կու լաս | Մ․ Նինու, Խ․ Մաքրիս | Ս․ Խրիսինիս, Խ․ Քոլոքոթրոնիս |
| Γλυκοχαράζει Ο Αυγερινός | Արեւը անուշ կը ծագի | Մ․ Նինու | Ի․ Թաթասոփուլո, Ն․ Ռուցոս |
| Ζαΐρα | Զայիրա | Մ․ Նինու | Վ․ Ցիցանիս |
| Με Γέρασε Η Ξενιτιά | Պանդխտութիւնը ծերացուց զիս | Մ․ ՆԻնու | Ա․ Քալտարաս |
| Μας Ζηλεύουνε | Կը նախանձին մեզմէ | Մ․ Նինու | Գ․ Գափլանիս |
| Η Κότα | Հաւը | Մ․ Նինու | Մ․ Նինու |
| Αφού Το Ήξερες | Քանի՝ գիտէիր | Մ․ Նինու | Անծանօթ է- |
| Παραπονιάρικο | Գանգատողիկս | Մ․ Նինու | Ղ․ Քլուվաթոս |
Մասնակցած է երեք շարժապատկերի ժապաւէններու մէջ, ուր Ցիցանիսին հետ կ'երգէ․
- «Տղուս համար մեղանչեցի»,
- «Մեծ Ճամբաներ»,
- «Ի վերջոյ յաջողեցանք»։
Աղբիւրներ
[Խմբագրել | Խմբագրել աղբիւրը]- Տիոնիսիս Մանիադիս, «Յետ՝ Գրամաձայնի (Կրամոֆօն) ձայնապնակագրութեան Η Εκ Περάτων Δισκογραφία Γραμμοφώνου» (Աթէնք, 2006)
- «Ազատ Օր» օրաթերթ, 2002 բացառիկ - էջ՝ 78 - 80, արտատպում 2002 Յուլիս 17-ի հայութեան անունով պր․ Յակոբ Ճելալեանի ունեցած ելոյթը «Նիքէայի թատերապարտէզ»ին մէջ Նիքէայի քաղաքապետարանին կողմէն կազմակերպուած Մարիքա Նինուին ձօնուած ձեռնարկին ընթացքին
Տե՛ս նաեւ
[Խմբագրել | Խմբագրել աղբիւրը]Հայ Կապոյտ Խաչի Զաւարեան վարժարան
Ծանօթագրութիւններ
[Խմբագրել | Խմբագրել աղբիւրը]- ↑ https://www.newsbeast.gr/weekend/arthro/2369425/o-thiellodis-ke-paranomos-erotas-tou-tsitsani-me-ti-ninou
- ↑ 2,0 2,1 Bibliothèque nationale de France data.bnf.fr: open data platform — 2011.
- ↑ «Ժամեր թաքուն կը դիտեմ քեզ»
- ↑ Գաղտնիքս քեզի պիտի ըսեմ
- ↑ «Տղուն գլուխը կերար»
- ↑ «Սիրած աչքերուս համար»
- ↑ «Արմենիքա» յունալեզու պարբերաթերթ․ Կիլիկիոյ, Սիսի, Իզմիրի տեղահանումը – Ասատուր Էպէյեանը կը խօսի Մարիքա Նինուին մասին (յունարէն)
- ↑ 8,0 8,1 «Պոնտոս Լուրեր – 23/2/2019, Այսօրուան նման մեռաւ հայազգի Էվանկելիա Ադամեանը, ծանօթ՝ Մարիքա Նինու անունով․ տեսերիզ (յունարէն)»։ արխիւացուած է բնօրինակէն-էն՝ 2020-01-30-ին։ արտագրուած է՝ 2020-04-22
- ↑ Մարիքա Նինու․ սիրահարուած, յամառ եւ փայլուն․ Խարալամպիա Փնեւմադիքու, greekschannel(յունարէն)
- ↑ 10,0 10,1 Այսօրուան պէս Մարիքա Նինուն մեկնեցաւ, Անտոնիս Պոսքոյիդիս, 23-2-2016(յունարէն)
- ↑ 11,0 11,1 Անկախ Լրատուութիւն – Մարիքա Նինու, ռեպեթիքոյի առասպելը, 23-2-2020 (յունարէն)
- ↑ Տարօրինակ աղջիկ մը 17-12-2009, Մարիաննա Ծիանծի(յունարէն)
- ↑ 13,0 13,1 «Vintage Story, Մարիքա Նինուին վաղահաս մահը, 23-3-2016, Փանոս Սավոփուլոս (յունարէն)»։ արխիւացուած է բնօրինակէն-էն՝ 2017-02-10-ին։ արտագրուած է՝ 2020-04-22
Արտաքին յղումներ
[Խմբագրել | Խմբագրել աղբիւրը]- Ռեպեթիքօ (անգլերէն)
- Վասիլիս Ցիցանիս(անգլերէն)
- Վասիլիս Ցիցանիս(յունարէն)
- ΕΡΤ - Կիները ռեպեթիքոյին մէջ(յունարէն)
- Մարիքա Քոթոփուլի(յունարէն)
- Սալամինայի նաւային խարիսխը(ֆր.)
- Մանոլիս Խիոթիս(անգլերէն)
- Եաննիս Փափաիոանու
- Ղիորղոս Միցաքիս(յունարէն)
- Վասիլիս Ցիցանիս(անգլերէն)
- Սոթիրիա Պելու(ֆր.)
- էղալէօ(յունարէն)
- Գոստաս Ֆերիս(ֆր.)
- Մանոս Խածիտաքիս(յունարէն)
- Փիրէային տղաքը(յունարէն)
- Փիրէային տղաքը՝ երգը, կ' երգէ Մելինա Մերքուրի(յունարէն)
- Երբեք Կիրակի օր(յունարէն)
- Աթիք(յունարէն)