Վահան Նաւասարդեան

Jump to navigation Jump to search
Վահան Նաւասարդեան
Ծնած է 29 Նոյեմբեր 1886
Ծննդավայր Շուշի
Վախճանած է 24 Յունիս 1956
Վախճանի վայրը Գահիրէ
Ազգութիւն Հայ
Երկեր Բօլշեւիզմը եւ Դաշնակցութիւնը, Գահիրէ, 1949, Գաղափարների ոգին (Հ. Յ. Դ. ապակէդրոնացումի առիթով), Գահիրէ, 1951, Հ. Յ. Դաշնակցութեան անելիքը, Գահիրէ, 1924, Նեղուցները (Վոսփոր եւ Դարդանել): Թրքական ջրուղիները եւ Հայ դատը, Գահիրէ, 1947:
Մասնագիտութիւն քաղաքական գործիչ

Վահան Նաւասարդեան (29 Նոյեմբեր 1886, Շուշի - 24 Յունիս 1956), գաղափարախօս, հրապարակախօս եւ քաղաքական գործիչ, Հայ Յեղափոխական Դաշնակցութեան անդամ։

Կենսագրութիւն[Խմբագրել | Խմբագրել աղբիւրը]

Վահան Նաւասարդեան 1898-ին յաճախած է Արցախի Թեմական դպրոցը, իսկ 1904-ին՝ Պաքուի Ռէալականը։ 1907-ին Փեթերսպուրկի համալսարանին մէջ հետեւած է հասարական գիտութեան եւ բարձրագոյն ուսումը ստացած է Ս. Փեթերսպուրկի համալսարանին մէջ՝ վկայուելով Տնտեսագիտութեան բաժանմունքէն։ իսկ 1910-ին մասնակցած է կուսակցական-քարոզչական աշխատանքներու Շուշիի, Պաքուի եւ Թիֆլիսի մէջ։ 1905-ին կ՛ընտրուի երիտասարդ պատգամաւոր, մասնակցելու համար Էջմիածնի մէջ գումարուած Ամենայն Հայոց կաթողիկոսութեան Ազգային ընդհանուր ժողովին, որուն կը նախագահէ Սիմոն Զաւարեան[1]: Այդ ժողովին, Նաւասարդեան կ՚ունենայ բոցաշունչ ելոյթը ցարական իշխանութեան հակահայ քաղաքականութեան դէմ։ Ժողովի պատգամաւորները կը գնահատէն իրեն, բայց ցարական ոստիկանութիւնը կ՚արձակէ ձերբակալման հրամանագիր մը եւ ան կը ստիպուի փատուստի դիմել։

1913-1917 տարիներուն կը դառնայ ուսուցիչ եւ դասախօս նախ՝ Շուշի, ապա՝ Գէորգեան ճեմարանին մէջ Գարեգին Եպիսկոպոսի հրաւէրով։

Ս. Փեթերսպուրկէն կը վերադառնայ Պաքու ու կը սկսի իր կազմակերպական աշխատանքներուն եւ կ՚աշխատակցի Թիֆլիսի «Հորիզոն»-ին ապա՝ Ալեքսանդրապոլի «Յառաջ»-ին։ Միաժամանակ աշխատակցած է Պաքուի՝ «Արեւ»-ին եւ Շուշիի «Ապառաժ»-ին։

Կովկասեան ռազմաճակարտի վերաշխուժացման կարիքը տեսնելով Ռուսական յեղափոխութեան հետեւանքով, ան իր ներդրումը կ՚ունենայ փոխարինելու ռուս զինուորներու դիրքերը հայ կամաւորական ուժերուն հետ։ Ան կ՚ընտրուի Ալեքսանդրապոլի (Գիւմրի) Քաղաքական Վարչութեան։ Երբ Քաղաքական Վարչութեան նախագահ, Ալեքսանդր Խատիսեան, կը կանչուի Թիֆլիս ան կը ստանձնէ այդ պատասխանատուութիւնը։ Ան իր ներդրումը կ՚ունենայ Ղարաքիլիսայի հերոսամարտի կազմակերպման մէջ։

Հայաստանի անկախութեան կերտումէն ետք, իրեն կը վստահուի Թիֆլիսի ՀՅԴ-ի «Հորիզոն պաշտօնաթերթ»ի խմբագրութիւնը, որ շատ մեծ պատասխանատուութիւն էր որովհետեւ նորակառուց երկիրը ունէր լուրջ կազմաւորման խնդիրներ։ Թիֆլիսի ոստիկանութիւնը կը սկսի իրեն հետապնդել երբ հայ-վրացական զօրքերու միջեւ պատերազմ սկսաւ եւ ան կը ստիպուի թաքստոցէն վարել հայ- վրացական հաշտութեան բանակցութիւնները։

Կ՚ընտրուի Հայաստանի Խորհրդարանի պատգամաւոր եւ կը փոխադրուի Երեւան։ Իբր պատգամաւոր իր մասնակցութիւնը կը բերէ արտագին դիւանագիտական աշխատանքներու ծիրէն ներս, կեդրոնանալով Հայ-ռուսական բանակցութիւններու շրջագիծին վրայ։

1920-ի կ՚աշխատի ռազմաճակատի կազմակերպման ու ամրապնդման աշխատանքներուն հետ հայ-թրքական պատերազմի ընթացքին։ Հայաստանի խորհրդայնացումէն ետք, Նաւասարդեան կ՚որոշէ հեռանալ։ Սակայն, վրացական սահմանը անցնելու ժամանակ կը ձերբակալուի եւ Երեւանի մէջ կը բանտարկուի։ Կը յաջողի բանտէն փախուստ տալ եւ կարճ ժամանակ կը գործէ Պոլիս, իսկ 1923-ին վերջնականապէս կը հաստատուի Գահիրէ, Եգիպտոս։

Գահիրէի մէջ կը խմբագրէ «Յուսաբեր» օրաթերթը, որ ՀՅԴ-ի անպաշտօն օրկան եղած է, եւ շուրջ քառորդ դար ՀՅԴ Բիւրոյի անդամ կ՚ըլլայ։

24 Յունիս 1956-ին վաղ առաւօտեան անակնկալ անհանգստութեամբ հիւանդանոց կը փոխադրուի եւ կը մահանայ։

Երկերը[Խմբագրել | Խմբագրել աղբիւրը]

  • Նաւասարդեան Վահան, Բոլշեւիզմը եւ Դաշնակցութիւնը, Գահիրէ, 1949, 673 էջ:
  • Նաւասարդեան Վահան, Գաղափարների ոգին (Հ. Յ. Դ. ապակէդրոնացումի առիթով), Գահիրէ, 1951, 230 էջ:
  • Նաւասարդեան Վահան, Խորհրդային քաղաքականութիւնը Հայկական հարցում, Փարիզ, 1938, 55 էջ:
  • Նաւասարդեան Վահան, Հ. Յ. Դաշնակցութեան անելիքը, Գահիրէ, 1924, 288 էջ:
  • Նաւասարդեան Վահան, Հ. Յ. Դաշնակցութեան լիկվիդացիան (բօլշեւիզմի սնանկութեան առթիւ), Գահիրէ, 1924, 187 էջ:
  • Նաւասարդեան Վահան, Հ. Յ. Դաշնակցութեան քաղաքական ուղին, Գահիրէ, 1925, 179 էջ:
  • Նաւասարդեան Վահան, Հայաստանի անկախութիւնը (տեսական հիմնաւորման թռուցիկ ակնարկ), Ժընեւ, 1924, 56 էջ:
  • Նաւասարդեան Վահան, Նեղուցները (Վոսփոր եւ Դարդանել): Թրքական ջրուղիները եւ Հայ դատը, Գահիրէ, 1947, 472 էջ:

Աղբիւրներ[Խմբագրել | Խմբագրել աղբիւրը]

Ծանօթագրութիւններ[Խմբագրել | Խմբագրել աղբիւրը]