Ռոպերթօ Քաւալի

Ռոպերթօ Քաւալի; իտալ.՝ Roberto Cavalli
Ծնած է	15 Նոյեմբեր 1940[…]
Ծննդավայր	Ֆլորանս, Ֆլորենցիա, Իտալիոյ Թագաւորութիւն
Մահացած է	12 Ապրիլ 2024 (83 տարեկանին)
Մահուան վայր	Ֆլորանս, Իտալիա
Քաղաքացիութիւն	Իտալիա
Մասնագիտութիւն	նորաձեւութեան ձեւագծող, գործարար և ձեռնարկատէր
Ամուսին	Eva Maria Düringer Cavalli?
Կայքէջ	robertocavalli.com

Ռոպերթօ Քաւալի (15 Նոյեմբեր, 1940, Ֆլորանս, Իտալիա - 12 Ապրիլ, 2024, Ֆլորանս, Իտալիա), նորաձեւութեան իտալացի ձեւագէտ։

Ան նշանաւոր է իր տարաշխարհիկ պատկերներով եւ աւազի տեսք ունեցող ճինզերով։

Կենսագրութիւն

Քաւալի ծնած է Ֆլորանս, Թոսքանա (Իտալիա)։

1979-ին ան կը յայտնաբերէ կաշիի վրայ տպագրութեան համակարգը եւ կը սկսի անով զբաղիլ։ Իր ստեղծածները Փարիզի մէջ կը ցուցադրէ, արժանանալով Հերմեսի եւ Փիեռ Քարտանի գովասանքներուն։

32 տարեկանին Քաւալի կը ներկայացնէ իր համանուն հաւաքածոն Փարիզի «Փրեթ Ա Փորթէ» (Prêt-à-Porter) դահլիճին մէջ։ Այդ հաւաքածոն նաեւ կը ցուցադրուի Ֆլորանսի Փիթթի պալատին մէջ։

Արժանանալով բազում դրական գնահատականներու ան 1972-ին կը ստեղծէ իր առաջին խանութը՝ Ֆրանսայի մէջ։

1980-ին առաջին անգամ կ'ամուսնանայ Եւա Տուրինկըրի հետ։

1994-ին ան Միլանոյի մէջ կը ցուցադրէ իր՝ աւազի տեսք ունեցող նշանաւոր ճինզերը։ Նոյն թուականի Դեկտեմբերին ան կրպակներ («boutique») կը բանայ Սուրբ Բարդողիմէոս կղզիին մէջ։

Իր հիմնական խանութներէն բացի, ան ունի նաեւ այլ գիծ մը՝ «Ճասթ Քաւալի»ն (Just Cavalli), որ կ'արտադրէ տղամարդու եւ կանանց հագուստներ, զարդեղէններ, շպար, ժամացոյցներ, ներքանազգեստներ եւ լողազգեստներ։

2002-ին ան կը բանայ իր առաջին սրճարան-խանութը Ֆլորանսի մէջ, զայն պատկերազարդելով իր ստեղծած անասուններուն պատկերներով։ Նոյն տարին ան կը ստեղծէ մէկ այլ սրճարան կրպակ մը՝ Միլանոյի մէջ։

Ռոբերթօ Քաւալի Միսս Տիեզերք 1977-ին դատական կազմի անդամ էր, ուր կը մասնակցէր իր ապագայ երկրորդ կինը՝ Եւա Տուրինկըրը, որ Աւստրիան կը ներկայացնէր եւ կը զբաղեցնէ երկրորդ հորիզոնականը։

2011-ին անոր հաւաքածոն կը ցուցադրուի «Տը Պրենտըրի» (The Brandery) նորաձեւութեան ցուցադրութեան ընթացքին՝ Պարսելոնայի մէջ^[6]։

Քաւալի ունի հինգ զաւակ՝ երկուքը առաջին, իսկ երեքը երկրորդ ամուսնութենէն^[7]։

18 Յունիս 2013-ին ան կը ստանայ Պատուաւոր Վարպետի վկայական՝ Տոմուս Հիմնարկին (Domus Academy) կողմէ, Միլանօ^[8]։

Ապրանքանիշը (Roberto Cavalli)^[9]

2014 թուականի Յունուարին, Ռոպերթօ Քաւալին իր որդիէն՝ Տանիէլէ Քաւալիէն վերստանձնեց տղամարդոց ստեղծագործական տնօրէնի պաշտօնը՝ սկսելով 2014-ի աշնանային հաւաքածոյէն եւ Մարթին Պալը նշանակեց իր աջ բազուկը։ Նաեւ 2014 թուականի Յունուար 24-ին, Ճանլուքա Պրոցեթին (գործադիր տնօրէն) եւ Քարլօ Տի Պիաճիոն (գործառնական տնօրէն) յայտարարեցին, որ կը հեռանան նորաձեւութեան ապրանքանիշէն։
2014 թուականի Մայիսին Քաւալին մօտեցաւ Ինվեսթքորփ (Investcorp) ներդրումային ընկերութեան՝ Պարսից Ծոցի մէջ, որպէս իր նորաձեւութեան ապրանքանիշի բաժնետոմսերու բոդենցիալ գնորդ։
Շատ առաջատար մոտելներ աշխատած են ապրանքանիշի համար, ներառեալ՝ Ճեսիքա Սթամը, Եւա Ռիքոպոնոն, Լեթիթիա Քասթան, Նաթաշա Փոլին, Մարիաքարլա Պոսքոնոն, Քարէն Էլսոնը, Քարոլինա Քուրքովան եւ Իվան Օլիթան։
Փոլ Սարիճը, որ նախկինին «Acne Studios»-ի ստեղծագործական խորհրդատուն էր, 2017 թուականի Մայիսին Փիթըր Տունտասին յաջորդեց որպէս ապրանքանիշի ստեղծագործական տնօրէն։
2019 թուականին «DAMAC Properties»-ի Հուսէյն Սաճվանին աւարտեց Ռոպերթօ Քաւալի իտալական նորաձեւութեան խումբին ձեռքբերումը։

Քննադատութիւններ

2004-ին Քաւալին կը քննատադեն հնդիկները՝ իրենց հինտու աստուածուհիները իր հագուստներու վրայ պատկերելուն համար։ Ան ներողութիւն կը խնդրէ եւ անմիջապէս կը հեռացնէ պատկերները^[10]։

«Maktab Tarighat Oveyssi Shahmaghsoudi» իսլամական սուֆիզմի դպրոցը կը մեղադրէ Քաւալին իրենց «սուրբ խորհրդանշանը» կրկնօրինակելու եւ իր «Ճաշթ Քաւալի» վաճառանիշին մէջ օգտագործելուն համար^[11]։ Անոնք կը դիմեն «Office for Harmonization in the Internal Market»-ին, սակայն վերջինս դատը անվաւեր կը համարէ, որովհետեւ այդ երկու խորհրդանիշները որեւէ ձեւով նման չէին^[12]։ Այնուամենայնիւ, դպրոցին աշակերտները չեն դադրեցներ իրենց բողոքի շարժումները^[12]^[13]^[14]^[15]^[16]։