Խորէն Մէյխանէճեան
| Խորէն Մէյխանէճեան | |
|---|---|
| Ծնած է | 1937 |
| Ծննդավայր | Հալէպ, Սուրիա |
| Ուսումնավայր | Գէորգեան Հոգեւոր Ճեմարան |
| Մասնագիտութիւն | աստուածաբանութիւն, հոգեբանութիւն, փիլիսոփայութիւն |
Խորէն Մէյխանէճեան (1937, Հալէպ, Սուրիա), հայ երաժիշտ։
Կենսագրական գիծեր
[Խմբագրել | Խմբագրել աղբիւրը]Ծնած է Հալէպ, Սուրիա: Ընտանիքին հետ Հայաստան տեղափոխուած է, երբ ութ տարեկան էր: Իր հայրը մահացած է, երբ ինք նոր պիտի ծնէր, ուստի չէ տեսած իր հայրը եւ տան միակ զաւակն է:
Պզտիկ տարիքէն մօր հետ կը յաճախէին Սուրբ Էջմիածին, որ մեծ ազդեցութիւն ձգած է մանուկ Խորէնին վրայ: Այդ ժամանակ ալ որոշած է, որ հոգեւոր կրթութիւն պիտի ստանայ:
Մէյխանէճեան 1956-1960 թուականներուն յաճախած է Սուրբ Էջմիածինի Հոգեւոր ճեմարանը՝ հետեւելու համար աստուածաբանութեան, իմաստասիրութեան, հոգեբանութեան եւ արուեստներու:
Իր ուսանողական տարիներու ընթացքին ան մէկ տարուայ երաժշտական անհատական դասընթացքներու հետեւած է (տեսութիւն, բազմազանութիւն եւ դաշնաւորում)՝ հոգածութեան ներքոյ Հայ Եկեղեցւոյ սրբազան երաժշտութեան հռչակաւոր վարպետ եւ Կոմիտաս Վարդապետի երաժշտութեան մասնագէտ տքթ. Ռոպերթ Աթայեանի:
Սուրբ Էջմիածնի Հոգեւոր ճեմարանին մէջ իր դասընթացքներու աւարտումէն ետք, Խորէն Մէյխանէճեան ընդունուած է Երեւանի Կոմիտասի անուան երաժշտանոցը, ուր ուսանող եղած է Թաթուլ Ալթունեանի:
1965 թուականին ան ստացած է երաժշտական ղեկավարութեան եւ խմբերգային երգեցողութեան մագիստրոսի աստիճանը: Այս աստիճանը ստանալէ առաջ, 1961-էն սկսեալ, Խորէն առանձնաշնորհումը վայելած է երկրորդ խմբավարը հանդիսանալու Հայաստանի Պետական ակադեմական երգչախումբին, որ այն ատեն կը ղեկավարէր Յովհաննէս Չեքիճեանը:
Յովհաննէս Չեքիճեան, իբրեւ խմբավար, երաժիշտ, նոյնպէս մեծ ազդեցութիւն ձգած է անոր վրայ: Ակադեմական երգչախումբին հետ միասին աշխարհի զանազան երկիրներու մէջ համերգներ ունեցած են:
1975-1979-ին ան վերադարձած է Կոմիտասի անուան երաժշտանոցը, ուր ստացած է երկրորդ մագիստրոսի աստիճան մը, որպէս օփերայի եւ նուագախմբային ղեկավար:
Խմբավար Խորէն Մէյխանէճեան իր գործունէութենէն ամբողջ երեք տարիներ նուիորած է Խորէնեան պատարագի երգչախմբայինեւ երգեհոնի նուագակցութեան յօրինման, որ յաջողութեամբ պսակուած է: 1984 թուականին Ամենայն Հայոց Վազգէն Ա. Կաթողիկոսի Սրբատառ կոնդակով պաշտօնապէս վաւերացուեցաւ Խորէնեան Պատարագը եւ գործածութեան մէջ դրուեցաւ հայոց եկեղեցիներու մէջ[1][2]:
Բացի ասկէ, խմբավար Մէյխանէճեան դաշնաւորած է ծիսական ուրիշ շարականներ եւ հրատարակած է յօդուածներ՝ երաժշտական մեթոտաբանութեան մասին:
1991 թուականին Մոսկուայի կառավարութիւնը անոր շնորհած է Գերազանց ուսուցչապետի երաժշտական տիտղոսը:
Խորէն Մէյխանէճեան ԱՄՆ ժամանած է Տ. Խաժակ Արքեպիսկոպոս Պարսամեանի առաջարկով եւ իբրեւ առաքելութիւն որդեգրած է Սուրբ Պատարագի երգերու եւ շարականներու ճշգրիտ մեկնաբանութիւնը ուսուցանել Հայց. Առաքելական Եկեղեցւոյ Հիւսիսային Ամերիկայի Արեւելեան թեմի տարածքին վրայ[1]:
Խորէնեան պատարագը հրատարակուած է 1999 թուականին՝ Հայ Եկեղեցւոյ դպրաց դասերու ընկերակցութեան կողմէ, հրատարակուած է նաեւ Նիւ Եորքի մէջ:
2007 թուականին լոյս տեսած է երաժիշտ Խորէն Մէյխանէճեանի ստեղծագործութիւններու ժողովածոն՝ «Կեանքիս երգերը» խորագրով: Անոր մէջ ընգրկուած են խմբերգներ, մշակումներ, հեղինակային երգեր, նաեւ՝ հոգեւոր եւ աշխարհիկ ստեղծագործութիւններ: Խորէն Մէյխանէճեանը հեղինակն է նաեւ Գէորգեան ճեմարանի օրհներգի երաժշտութեան[2]:
Ծանօթագրութիւններ
[Խմբագրել | Խմբագրել աղբիւրը]- ↑ 1,0 1,1 «Khoren Meikhanedjian – Institute of Armenian Sacred Music» (en-US)։ արխիւացուած է բնօրինակէն-էն՝ 2024-02-25-ին։ արտագրուած է՝ 2024-07-05
- ↑ 2,0 2,1 «40-ԱՄԵԱԿ՝ ԽՈՐԷՆԵԱՆ ՊԱՏԱՐԱԳԻ. ՀԱՅԿԱԿԱՆ ԵՐՐՈՐԴ ՍՈՒՐԲ ՊԱՏԱՐԱԳԸ ԵՒ ԱՆՈՐ ՍՏԵՂԾՄԱՆ ՊԱՏՄՈՒԹԻՒՆԸ»։ www.jamanak.com։ արտագրուած է՝ 2024-07-05