Քոլոնա հնավայր, Էղինա

Քոլոնա հնավայր, Էղինա
Բնակավայր
	Քոլոնա հնավայր, Էղինա
	Αρχαιολογικός χώρος της Κολώνας
	Քոլոնա հնավայր, Էղինա, Սարոնիքոս ծոց
Երկիր	Յունաստան

Քոլոնա հնավայր, Էղինա (յուն․՝ Αρχαιολογικός χώρος της Κολώνας). կը գտնուի Սարոնիքոս ծոցի Էղինա կղզիին հիւսիս-արեւմտեան մասը, Էղինա քաղաքի նաւահանգիստին մօտակայ բլրակին վրայ։ Ծանօթ իր հնադարեան բնակավայրով (Ք․Ա․ 2600 - 2500), Աքրոփոլիսով, ինչպէս նաեւ Ափոլոնաս աստուծոյ Դորեան ոճի տաճարով (Ք․Ա․ 6-րդ դար)։

Տեղեկութիւններ

Բլուրը Քոլոնա (իտալ․՝ Colonna) անուանած են վենետիկցի նաւաստիներ, որովհետեւ Ափոլոնաս տաճարին սիւները (քոլոնա՝ κολώνα=սիւն) իրենց ճանապարհին ուղղութեան կ՛ օգնէին։ Կը գտնուի Էղինա քաղաքին շատ մօտ․ նաւահանգիստէն 10՛ ոտքով դէպի ձախ։ Հնադարեան պաշտամունքի եւ մշակոյթի կեդրոնէն պահպանուած կարեւոր հնագիտական նիւթերէն գլխաւորը Ափոլոնաս տաճարէն մնացած 8 մեթր բարձրութեամբ սիւնն է։ Հնագիտական պեղումները յայտնաբերած են նախապատմական շրջանէն, Միկինեան շրջանէն, ինչպէս նաեւ տարբեր ժամանակաշրջաններու զանազան կառուցումներ․ պարիսպներ, աշտարակներ, ջաղացքներ, ջրատարներ, Ափոլոնասի տաճարը, Փոսիտոնաս, Տիմաթրա, Արթեմիս, Տիոնիսոս եւ Էքաթի աստուածներուն տաճարներու հետքեր, Խորհրդարանը, Էաքիօ, Աթալիօ, Թատրոնը, Մարզարանը եւ դամբաններ։

Պատմական ակնարկ

Հնադարեան բնակավայրի առաջին հետքերը կը թուագրուին ըլլալ Նոր Քարէ Դարի ժամանակաշրջանէն։ Այնուհետեւ կը զարգանան նախապատմական բնակավայրեր՝ Ք․Ա․ 3-րդ եւ 2-րդ հազարամեակ։ Ք․Ա․ 12-րդ դարէն մինչեւ Ք․Ա․ 10-րդ դար շրջանը կը դադրի գործածուիլ իբրեւ բնակավայր։ Ապա վայրը կրկին իբրեւ բնակավայր կը գործածուի, իսկ պաշտամունքի տաճարներ կը սկսին կառուցուիլ Ք․Ա․ 8-րդ դարուն։

Ք․Ա․ 7-րդ դարուն, սրբավայր կը դառնայ՝ աստուածներուն վայրը։ Նոյն շրջանին Աքրոփոլիսին դերը կ՛ ունենայ։ Ք․Ա․ 6-րդ դարասկիզբին կը կառուցուին զանազան տաճարներ եւ սրբավայրը կը բարգաւաճի։

Գ․ դարուն բարբարոս ցեղերու յարձակումներէն պաշտպանուելու համար, տաճարներու հսկայ քարերը կ՛ օգտագործուին նոր ամրացումներու համար։ Քրիստոնէութեան մուտքէն ետք, պահպանուած կառոյցները կը գործածուին ուրիշ գործունէութիւններու համար (օրինակ՝ Զ․ դարուն Ափոլոնասի տաճարը իբրեւ եկեղեցի) եւ մինչեւ 1000 թուականին իբրեւ բնակավայր։ Ծովէն եկող յարձակումներէն պաշտպանուելու համար, բնակիչները կը լքեն Քոլոնա վայրը եւ կ՛ ուղուին կղզիին կեդրոնը՝ Փալէոհորա։

1921-էն մինչեւ 1954, 1966 - 1992 եւ 1994-էն ասդին կանոնաւոր հերթականութեամբ կատարուած հնագիտական պեղումները, յայտնաբերած են նախապատմական քաղաքը, յունահռոմէական պարիսպը, ինչպէս նաեւ Քրիփթոս Լիմին (թաքուն նաւահանգիստը)․ կը գտնուի հնավայրին արեւելեան ծովեզրին։