Շուշմայ

շուշմայի հատիկներ

Շուշմայի հատիկները Ծայրագոյն Արեւելքի մէջ ունէին խորհրդանշական իմաստ եւ կը նկատուէին երկարակեցութեան գրաւական։

Ներկայիս եւս ունին  բժշկական բազմաթիւ եւ բազմապիսի յատկութիւներ ու յատկանիշներ։

Շուշմային սննդական արժէքը

Շուշմայի հունտերը կը պարունակեն 55% իւղ, 21% փրոթէին, քալսիում, քիչ քանակով «Ի» եւ «Տ» կենսանիւթ։

Հարուստ է հակաօքիստաններով:

Պարունակած «Տ» ֆաքթորը կը բարձրացնէ արեան մածուցիկութիւնը։

Մեծ քանակութեամբ ֆիթոէսթրոժէն կը պարունակէ, որ շատ անհրաժեշտ է կանանց դաշտանադադարի շրջանին: Կը նուազեցնէ քոլեսթերոլը, կը պարունակէ լիկնին, որ ունի հակաքաղցկեղային յատկութիւն:

Շուշման շատ իւղ կը պարունակէ, անոր 100 կրամը մօտաւորապէս 900 քալորի ունի:

Շուշմայի սերմերը շատ հարուստ են քալսիումով, օգտակար են ոսկրային հիւանդութիւններու եւ կոտրուածքներու պարագային: Կան տարբեր գոյներու շուշմաներ՝ սեւ, սրճագոյն, ոսկեգոյն, սպիտակ:

Սպիտակ շուշման պահել սառնարանը։

Դեղահատերու ձեւով սեւ սերմերու իւղը կ'ամրացնէ մազերը եւ եղունգները:

Հում վիճակի մէջ

Բոյսը

5-էն 10 կրամ շուշմայի հատիկ լաւապէս ծամել՝

• Ստամոքսային եւ աղիքային անհանգստութիւններու պարագային,
• մօր կաթը խթանելու եւ քանակը աւելցնելու համար,
• դաշտանի անկանոնութիւններու պարագային,
• մազերու գոյնը սեւցնելու համար,
• տեսողութեան խանգարումներու պարագային:

Իբրեւ թէյ

Երկու թէյի դգալ շուշմայի հատիկ թեթեւ մը ճզմել, գաւաթ մը ջուր աւելցնել եւ եռացնել 10-20 վայրկեան: Օրական 2-3 գաւաթ խմել առանց քամոցէ անցընելու։

• Մազերու գոյնին համար 2-էն երեք շաբաթ,
• տեսողութեան խանգարումներու պարագային,
• մօր կաթը խթանելու գամար,
• դաշտանի անկանոնութեան պարագային:

Իբրեւ ձէթ (իբրեւ քսուք)

• Մորթային հիւանդութիւններու (մասնաւորաբար ճեղքուածքի) պարագային,
• պայթած պեներու պարագային,
• այրուածքներու վրայ (աղի պաղ ջուրով լուալէ ետք),
• գանկին վրայ՝ հերաթափութիւնը կեցնելու համար,
• գիշերային չոր հազի պարագային, հանգիստ քնանալու համար ապուրի դգալ մը շուշմայի կամ ձիթապտուղի մաքուր ձէթ մեծ օգուտ կրնայ ունենալ. եթէ հազը շարունակուի՝ ի հարկին կարելի է երկրորդ դգալ մը եւս խմել:

Իբրեւ կաթիլ

Շուշմային ծաղիկը

• Բորքոքած եւ ցաւող ականջներուն մէջ՝ մէկ-երկու կաթիլ գաղջ  ձէթ կաթեցնել.
• Երբ ականջին ներքնամասը թեթեւ մոմակալած մաշկով մը պատուած է, ձէթը կը կակուղցնէ մոմակալած մաշկը, որմէ ետք աւելի հեշտ կ'ըլլայ մաքրել զայն ջուրով.
• տեսողութեան զանազան խանգարումներու պարագային. այս նպատակին համար օգտագործել լաւագոյն որակի շուշմաձէթ (MITOKU Toasted Sesame Oil):

Շուշմաձէթ՝ կոճապղպեղի հիւթով

Այս խառնուրդը, իբրեւ քսուք, կարելի է օգտագործել յատկապէս հետեւեալ պարագաներուն`

• Հերաթափութիւնը կասեցնելու եւ թեփերու պարագային,
• օգտակար է յատկապէս մկանային յօդացաւերու եւ դէմքի ջղացաւերու համար,
• շատ ազդու է զանազան գլխացաւերու պարագային,
• այս խառնուրդը մեծապէս օգտակար է նաեւ ականջի բորբոքումներու համար այն աստիճան, որ անոր մէկ կաթիլն ագամ  կրնայ հանդարտեցնել բորբոքումը։

Աղբիւրներ

• Ճիշդ Անունդ՝ Առողջ Կեանք, Բժշկուհի Գոհար Վարդանեան- Քէշիշեան, էջ 123