Շահէ Քէշիշեան

Շահէ Քէշիշեան;
Ծնած է	1 Սեպտեմբեր, 1970
Ծննդավայր	Հալէպ, Սուրիա
Քաղաքացիութիւն	Հայաստան
Ազգութիւն	Հայ
Կրօնք	Առաքելական
Կարողութիւն	Հոգեւոր դպրաց դաս: Մարզական եւ Թատերական բնագաւարներ
Մասնագիտութիւն	Երաժիշտ, խմբավարական եւ օփերային մեներգեցողութեան բաժիններ
Աշխատավայր	Գեղարուեստական ղեկավար եւ խմբավար:

Շահէ Քէշիշեան (1 Սեպտեմբեր 1970): Երաժիշտ, գեղարուեստական ղեկավար եւ խմբավար:

Կենսագրութիւն

Շահէ Քէշիշեանի հօրն ու մօր կողմը արմատներով Քիլիսէն են: Հայրը՝ Յովհաննէս, մայրը՝ Զարմինէ, բայց անձնաթուղթով՝ Մարի, ծնած են Հալէպ:

Քեշիշեանները շատ աւելի ուշ իմացած են, որ խորը արմատներով Սասունցի են Իշխանեան մականունով (ինչ որ իշխանական տոհմէ սեռած): Իշխանեան Տոհմի սերունդէն Շահէ Քէշիշեանի մեծ հայրը քահանայ ձեռնադրուած եւ ուղարկուած է Քիլիս, որպէս հոգեւոր հովիւ, եւ այդպէս իր սերունդը կոչուած է քիլիսցի եւ մականունով՝ Քէշիշօղլուլար, եւ յետոյ Քէշիշեան:

Շահէ Քէշիշեանի կեանքի անկիւնադարձային անցումը եղաւ, երբ 2012-ի ամրանը ՀՀ սփիւռքի նախարարութեան կազմակերպած «ԻՄ ՀԱՅԱՍՏԱՆ» համահայկական երգչախմբային փառատօնին մասնակցեցաւ Հալէպի ՀԲԸՄ-ՀԵԸ-ի «Սպենդիարեան» երգչախումբով, որմէ յետոյ պատերազմի պատճառով յետադարձ ճանապարհը փակուեցաւ եւ ան ընտանիքով հաստատուեցաւ Հայաստան:

Դեռ շատ նպատակներ ունիմ, բայց որոշումս հաստատ է. թԷկուզ ոչ այնքան լաւ ֆինանսական պայմաններով, բայց ապրիլ միայն Հայաստանի մէջ։ Ես երաժիշտ եմ, իմ հոգԵւոր տարածքն այստեղ է, որովհետԵւ իմ ականջիս մշտապԷս Նարեկացի կը հնչէ»:

- Շահէ Քէշիշեան

2011-ին, Հայաստանի Հանրապետութեան Նախագահի հրամանագրով՝ Շահէ Քէշիշեանին շնորհուած է ՀՀ քաղաքացիութիւն:

Կրթութիւն

Շահէ Քէշիշեան իր նախնական եւ երկրորդական կրթութիւնը ստացած եւ յաջողութեամբ աւարտած է 1988-ին Հալէպի ՀԲԸՄ-ի Լազար Նաճարեան-Գալուստ Կիւլպէնկեան կեդրոնական վարժարանը:

1982-1988 տարիներուն աշակերտած, աւարտած ապա դասաւանդած է՝ (1988-1990) Հայ Առաքելական Սուրբ Եկեղեցւոյ Քրիստոնէական դաստիարակութեան կիրակնօրեայ դպրոցի կեդրոնական բաժնին մէջ:

1988-1999 տարիներուն ուսանած եւ աւարտած է Հալէպի համալսարանի համակարգչային ճարտարագիտութեան ծրագրաւորման բաժինը:

2000-2005 տարիներուն ուսանած է Երեւանի Կոմիտասի անուան պետական երաժշտանոցի օփերային մեներգեցողութեան բաժինը՝ յաջողութեամբ աւարտելով Պսակաւոր արուեստի տիտղոսը (Master's degree)։

2001-2006 տարիներուն ուսանած է Երեւանի Կոմիտասի անուան պետական երաժշտանոցի խմբավարական բաժինը՝ յաջողութեամբ աւարտելով Պսակաւոր արուեստի տիտղոսը (Master's degree), իսկ 2009-ին նոյն բաժնի Յետ-ընթացաւարտը (Post-graduates studies-Aspirantura):

2017-ին եւս մէկ անգամ ընդունուեցաւ ուսանելու, Երեւանի Կոմիտասի անուան պետական երաժշտանոց, այս անգամ մասնագիտանալու Օփերային եւ Սիմֆոնիք խմբավարութեան բաժինը, որը եւ նախտեսուած է աւարտել 2020-ին։

Գործունէութիւնը Հալէպի մէջ

Հասարակական գործունէութիւն

Շահէ Քէշիշեան ծաւալուն աշխատանք տարած է Հալէպի Հայ համայնքի հոգեւոր, մշակութային եւ հասարակական կեանքէն ներս: Ան զանազան յօդուածներ գրած է Հալէպի մշակութային կեանքին շուրջ՝ Հալէպի Բերիոյ թեմի ազգային առաջնորդարանի «Գանձասար» եւ Հ.Բ.Ը.Մ.-ի «Հայեացք» պարբերականներու մէջ:

1976-2007 ծառայած է Հալէպի Սուրբ Քառասնից մանկանց Մայր եկեղեցւոյ մէջ որպէս ուրարակիր դպիր, այնուհետեւ հրաւիրուած է գլխաւորելու եւ ղեկավարելու Սուրբ Գրիգոր Լուսաւորիչ եկեղեցին (2007-2012):

1988-1993 ծառայած է Ճինիշեան բարեսիրական հաստատութեան ամառային ճամբարին` որպէս պատասխանատու:

1989-1990 նախագահած է Հալէպի հայ համալսարանականներու միութիւնը:

1991-1993 ծառայած է Հայ Կաթողիկէ Եկեղեցւոյ «Հաւատք եւ լոյս» հոգեւոր խնամքի կեդրոնին մէջ, ուր աշխատած է մտաւոր եւ մարմնային արատներ ունեցող թերաճ եւ յատուկ կարիքներով երեխաներու հետ:

1989-1994 եղած է ՀԲԸՄ-ՀԵԸ-ի Ուսանողական յանձնախումբի անդամ, որու ընթացքին 1989-ին երկար տարիներու ընդհատումէ ետք յանձնախումբի ջանքերով վերականգնուեցաւ միութեան Սպենդիարեանի անուան երգչախումբը (եւ Շահէ Քէշիշեան հետագային ղեկավարած է այն (2007-2012), իսկ (1997-1999) որպէս երաժշտական յանձնախումբի անդամ:

2007-2012 Շահէ Քէշիշեան Հալէպի մէջ շարունակաբար աշխատած է երաժշտական բնագաւարին մէջ որպէս՝

ՀԲԸՄ-ՀԵԸ «Սպենդիարեան» երգչախումբի գեղարուեստական ղեկավար եւ խմբավար:
ՀԲԸՄ ՀԵԸ «Արամ Խաչատուրեան» երաժշտական դպրոցի տնօրէն եւ ուսուցիչ:
Համազգային հայ կրթական եւ մշակութային միութեան «Բարսեղ Կանաչեան» երաժշտական դպրոցի ուսուցիչ:
Հայ Առաքելական Սուրբ Գրիգոր Լուսաւորիչ եկեղեցւոյ դպրապետ եւ խմբավար:
Հոգեւոր երգերու եւ Սուրբ Պատարագի երգեցողութեան ուսուցիչ Հալէպի Ազգային Սահակեան վարժարանի 4-րդ, 5-րդ, 6-րդ դասարաններու աշակերտներու համար:

Այլ բնագաւառներու մէջ

Շահէ Քէշիշեան տարիներ շարունակ իր աշխուժ մշակութային գործունէութեամբ մասնակից դարձած է Հալէպահայ մարզական եւ թատերական եռուզերին:

1983 –1994 տարիներուն մարզուած եւ խաղցած է ՀԵԸ-ի պասքեթպոլի խումբին մէջ՝ (Սուրիական լիկայի առաջին դասի մարզական ակումբ):

1995-1999 տարիներուն ՀԲԸՄ-ՀԵԸ-ի Պետրոս Ադամեան թատերախումբի հետ բեմ բարձրացած է բազմաթիւ ներկայացումներով, ուր շատ անգամ ունեցած է գլխաւոր հերոսի դերակատարութիւններ:

Շահէ Քէշիշեան տարբեր բնագաւարներու մէջ ասպարէզ ընդունելով՝

1992-2006 աշխատած եւ համագործակցած է գեղանկարիչ Վիգէն Շարոյեանի Հալէպի «Շարոյեան» համակարգչային տիզայնի եւ տպագրութեան ընկերութեան հետ որպէս գլխաւոր համակարգչային կատարող:

1990-1991 ուսումնական տարեշրջանին Բերիոյ թեմի ուսումնական խորհուրդի կողմէ նշանակուած է Սուրիոյ՝ Թէլ Ապիատ գիւղի ազգային «Խորէնեան» վարժարանի տնօրէն:

Երաժշտական ասպարէզ Հայաստանի մէջ

Շահէ Քէշիշեան կ՛աշխատի երաժշտական ոլորտի մէջ մնալով

2004-2005 երգած է Երեւանի «Սանկտուս» վոքալ քառեակի մէջ «թենոր»:

2012-էն ի վեր Երեւանի Բարսեղ Կանաչեանի անուան արուեստի դպրոց` որպէս խմբավար եւ ուսուցիչ:

2013-էն ի վեր Հայաաստանի Պետական Ակադեմական երգչախումբի երգիչ (թենոր) (գեղարուեստական ղեկավար՝ Յովհաննէս Չեքիճեան):

2013 –2016 տարիներուն Sistema Armenia ծրագիրի երգչախումբի ղեկավար:

2017-էն ի վեր Երեւանի «Այբ» Աւագ դպրոցի տղաներու երգչախումբի ղեկավար-ուսուցիչ:

2018-էն ի վեր Երեւանի Արաբկիրի Սուրբ Խաչ եկեղեցւոյ խմբավար:

Հիմնադիր, ղեկավար եւ խմբավար

«Սուրբ Նորավանք» երգչախումբի հիմնադիր եւ ղեկավար

2005-2006 Շահէ Քէշիշեան Երեւանի մէջ ստեղծած եւ ղեկավարած է «Սուրբ Նորավանք» երգչախումբը:

«Զանգակներ» նուագախումբի գեղարուեստական ղեկավար եւ խմբավար

2005–էն ի վեր եւ առ այսօր Շահէ Քեշիշեան կը ղեկավարէ իւրատեսակ «Զանգակներ» նուագախումբը որպէս գեղարուեստական ղեկավար եւ խմբավար:

Զանգակներէն իւրաքանչիւրը մէկ նոթա կը նուագէ: Ընդհանուր առմամբ՝ ատոնք կը համապատասխանեն դաշնամուրի 4 օքթավին: Երաժիշտներէն իւրաքանչիւրը 2 ձեռքով միաժամանակ 2 նոթա կրնայ նուագել, բայց ընթացքին նաեւ կը փոխուին զանգակները: «10-12 երաժիշտ ունինք: Կախուած ստեղծագործութեան բարդութենէն՝ երբեմն քանի մը հոգի անգործ կը մնայ, երբեմն ալ 12 հոգին բաւարար չ'ըլլար եւ այն ժամանակ ես ալ կը նուագեմ»:

- Շահէ Քէշիշեան

Ես նոր չէ, որ կը ծանօթանամ Հայաստանեան իրականութեանը։ Քիչ չէ, տասը տարի այստեղ ապրած, ուսանած, աւարտելէն յետոյ երկու տարի ալ փորձած եմ մնալ։ «Զանգակներ» նուագախումբը ես ուսանողական տարիներուս ստեղծած եմ։

- Շահէ Քէշիշեան

«ՈՎՍԱՆՆԱ» երգչախումբի գեղարուեստական ղեկավար եւ խմբավար

2013-էն ի վեր Շահէ Քէշիշեան կը ղեկավարէ «ՈՎՍԱՆՆԱ» երգչախումբը որպէս գեղարուեստական ղեկավար եւ խմբավար:

Անդամակցութիւն

2009 թուականին, Քէշիշեան դարձած է ՀԲԸՄ-ի վեթերան անդամ: 2016-էն ի վեր, ան անդամ է Հայաստանի Հանրապետութեան Նախագահի երիտասարդական մրցանակի դասական երաժշտութիւն եւ մեներգեցողութիւն անուանակարգի յանձնաժողովին:

Պարգեւներ

18 Սեպտեմբեր 2012-ին ՀՀ Նախագահի հրամանագրով Հայաստանի Հանրապետութեան անկախութեան 21-րդ տարեդարձի կապակցութեամբ, հայրենիք-սփիւռք կապերու ամրապնդման, ինչպէս նաեւ հայապահպանութեան գործի մէջ ներդրած նշանակալի աւանդի համար պարգեւատրուեցաւ «Մովսէս Խորենացի» շքանշանով:

Պատկերասրահ

Շահէ Քէշիշեան հիմնած է եւ առ այսօր կը ղեկավարէ իւրատեսակ «Զանգակներ» նուագախումբը որպէս գեղարուեստական ղեկավար եւ խմբավար: Լուսանկարներ՝ Համերգ՝ կազմակերպութեամբ տիկին Ռիթա Սարգիսեան, Երեւան, Արամ Խաչատրեան տուն-թանգարան, Նոյեմբեր 2014 թուական:
Շահէ Քէշիշեան հիմնած է եւ առ այսօր կը ղեկավարէ Արարատեան Հայրապետական թեմի իւրատեսակ «Զանգակներ» նուագախումբը որպէս գեղարուեստական ղեկավար եւ խմբավար: Երեւան, Քաֆեսճեան Արուեստի կեդրոնի միջոցառումներու սրահ (Կասկադ) 5 Մայիս, 2013 թուական:

Աղբիւրներ