Մեթանա

Մեթանա
Թերակղզի
	Մեթանա
	Μέθανα
	Մեթանա թերակղզի
Երկիր	Յունաստան
Երկրամաս	[[Պելոպոնես, Յունաստան]]
Բնակչութիւն	1 967 մարդ
Կը գտնուի ափին	Սարոնիքոս ծոցին
Պաշտօնական կայքէջ	methana.gr

Մեթանա (յուն․՝ Μέθανα), Մեթանա թերակղզին կը գտնուի Պելոպոնեսի հիւսիս-արեւելեան մասը, Սարոնիքոսի ափին։ Թերակղզին ծանօթ է իր ջերմային լոգարաններով եւ Քամենի Հորա գիւղը գտնուող Քամենի Վունօ հրաբուխով։ Բնակչութեան թիւն է 1 967։

Ընդհանուր տեղեկութիւններ

Տարածութիւնն է 44 քլ․²։ Պելոպոնեսին կապուած է 300 մեթր լայնք ունեցող նեղուցով մը։ Համաչափ եռանկիւնի նմանող բոլորաձեւ թերակղզի է։ Անոր երեք ծայրամասերուն կը գտնուին յաջորդաբար Փանաղիա կամ Քրասոփանաղիա հրուանդանը (արեւմուտք), Այիոս Եորղոս հրուանդանը (հիւսիս-արեւելք) եւ Փունտա հրուանդան (հարաւ-արեւմտեան)։

Մեթանային բարձրագոյն գագաթն է Հելոնա (740 մ․) եւ շրջապատուած է համապատասխան բարձրութեամբ գագաթներով՝ 713 մ․, 700 մ․ եւ 692 մ․։

Հրաբխային գործունէութիւն

Մեթանան կը գտնուի Էգէականի հրաբխային գօտիին հիւսիս-արեւմտեան ծայրը եւ Սուսաքիին, Էղինային ու Փորոսին հետ կը կազմեն Սարոնիքոսի հրաբխային խումբը։ Մեթանան կը բաղկանայ 32 հրաբխային գմբեթներով։

Անոր ընդծովեայ հիւսիս-արեւմեան մասին՝ 1,5 - 2 քլ․ հեռաւորութեամբ եւ 143 մ․ խորութեամբ, 1987-ին յայտնաբերուած է Փաֆսանիաս հրաբուխը (12քլ²․ տարածութիւն) 6 հրաբխային գմբեթներով։ Հրաբերանի խորութիւնն է 300 մ․։ Փաֆսանիաս եւ Մեթանա թերակղզիին միջեւ 62 մ․ խորութեամբ կը գտնուի փոքրիկ հրաբխային գմբեթ մը։

Ջրաջերմական

Մեթանայի հրաբխային գործունէութեան հետեւանքն է ներկայիս թերակղզիին տարածքին երեք ծրջաններու մէջ գտնուին երկրաջերմական ջերմուժի աղբիւրներ․ առաջինը՝ Լութրա (հարաւ), երկրորդը՝ Այիոս Նիքոլաոս (հիւսիս) եւ երրորդը՝ Լութրա դու Փաֆսանիա կամ Փալէա Լութրա (հիւսիս-արեւելք)։

Բուսական աշխարհ

Վայրի թերակղզի է, ցիր ու ցան ծառերով, գլխաւորաբար՝ շոճիներ, մաթուզենիներ, կանանչ կաղնիներ ու մացառներ։ Քամենի Հորա (այսինքն՝ այրած քաղաք) գիւղին սրճագոյն հրաբխային ժայռերը գրեթէ ամբողջութեամբ մերկ են, տեղ տեղ միայն կը գտնուին հալեպեան եղեւնիի խումբեր եւ քանի մը ծառեր։

Թերակղզիին վրայ արձանագրուած են 620 բոյսի տեսակ, որոնցմէ 30-ը Յունաստանի տեղայատուկ են։

Մեթանայի տարածքին կը մշակուին ձիթենի, որթատունկ եւ նշենի։

Մեթանա քաղաքապետութիւն

Մեթանայի քաղաքապետութիւնը բաժնուած է չորս համայնքներու․ համապատասխան գիւղերով-

Քունուփիցա (Քունուփիցա, Այիոս Եորղոս, Այիոս Նիքոլաոս, Մաքրիլոնկոս, Փալէա Լութրա)
Քիփսելի (Քիփսելի, Այի Թէոտորի)
Լութրոփոլի Մեթանոն (Մեթանա, Տրիցայիքա)
Մեղալոհորի (Մեղալոհորի, Վաթի, Քամենի Հորա, Մեղալօ Փոթամի)

Պատմական ակնարկ

Թերակղզին առաջին բնակավայրը՝ Վաթի գիւղին մօտերը, ստեղծուած է Ք․Ա․ 1500 - 1300։ Յայտնաբերուած են բաւական հնագիտական յուշարձաններ եւ իրեր, ինչպէս օրինակ՝ Փալէոքասթրօ Աքրոփոլիս եւ լայն գահ մը։ Ք․Ա․ 4-րդ դարավերջին, Մեթանա ունեցած է իր դրամը։ Ք․Ա․ 425-ին Պելոպոնեսեան Պատերազմին ընթացքին, Աթէնք թերակղզին կը գրաւէ եւ անոր նեղուցը կը պարսպապատէ։ Ք․Ա․ 3-րդ դարուն Մեթանա կը գտնուի Սփարթիին հովանին տակ։ Այնուհետեւ թերակղզիին պատմութիւնը կը հետեւի Պելոպոնեսի պատմութեան։