Աշտարակ (թերթ)

«Աշտարակը» Խորհրդային Հայաստանի մէջ լոյս տեսնող շրջանային թերթ էր։ Եղած է ՀԿԿ Աշտարակի շրջկոմի, ժողովրդական դեպուտատներու շրջանային եւ քաղաքային խորհուրդներու օրգանը։ Լոյս տեսած է նաեւ «Այգեգործ կոլխոզնիկ» (1931-1935 թթ.) «Այգեգործ կոլտնտեսական» (1956-1962 թթ.) եւ «Արագած» (1963-1972 թթ.) անուններով։ Հրատարակուած է 31 Հոկտեմբեր 1931-էն ընդհուպ մինչեւ Խորհրդային Հայաստանի փլուզման տարիները եւ նոյնիսկ քանի մը տարի անկախ Հայաստանի գոյութեան սկզբնական տարիները' 90-ականներու կէսը։ Լոյս տեսած է հիմնականին Երեքշաբթի, Հինգշաբթի եւ Շաբաթ օրերուն։ Լուսաբանած է Աշտարակի շրջանի տնտեսական, մշակութային եւ քաղաքական կեանքը։ Թերթը տպագրուած է ՀՍՍՀ հրատպետկոմի Աշտարակի շրջհրատի տպարանին մէջ։ Անոր երկարամեայ խմբագիրը եղած է Կ. Ս. Նիկողոսեանը։ Թերթին մէջ աճած են ու իրենց ստեղծագործական ուղին հարթած գրողներ Վարդգէս Պետրոսեանը, Ժիրայր Նորայրի Աւետիսեանը, Գէորգ Էմինը, Մուշեղ Գալշոյեանը, Արեւշատ Աւագեանը, Ղուկաս Սիրունեանը եւ այլք։

Հանրապետութեան մէջ համարուած է լաւագոյն տպագիր օրգաններէն մէկը։ Թերթի գործունէութեան մէջ առանցքային դեր ունեցած է խմբագրի երկարամեայ տեղակալ, ճանաչուած լրագրող, երգիծաբան Նորայր Զորեանը, որու ջանքերով թերթը յայտնի դարձած է Քարաբաղնիս երգիծական էջով։ Տարբեր տարիներ թերթին մէջ աշխատած են նաեւ Արտաւազդ Նազարեանը, Սերժ Մանուկեանը, Առաքել Ջրաղացպանեանը, Նորայր Ղոնաղչեանը, Վահան Ամատունին, Համլեթ Միքայէլեանը, Նուէր Ինջիղուլեանը, Սաթենիկ Զորեանը, Միշա Ոսկանեանը եւ այլք։ Հիմնականին խմբագրութիւնը ունեցած է իր առանձին շէնքը' Աշտարակ քաղաքի կեդրոնը Գր. Գրիգորեան փողոցի համար 146 հասցէին վրայ։

1988-ի տուեալներով թերթը ունեցած է 6000 տպաքանակ, տպագրուած է օֆսէթ եղանակով։

Այս յօդուածի նախնական տարբերակը կամ անկէ մաս մը վերցուած է Հայկական Սովետական Հանրագիտարանէն, որուն նիւթերը հրատարակուած են` Քրիէյթիվ Քամմընզ Նշում–Համանման տարածում 3.0 (Creative Commons BY-SA 3.0) թոյլատրագրի ներքոյ։