Սենտուիչ

Սենտուիչ (անգլ.` sandwich), սնունդ, որ կը պատրաստուի հացի երկու շերտերով, որոնց միջեւ կը դրուի մէկ կամ քանի մը կտոր կերակուրի տեսակներ։

Բրիտանական եւ ամերիկեան խոշոր քաղաքներու մէջ սենտուիչը ամէնօրեայ սնունդի անբաժանելի մաս է։ Աշխարհի բազմաթիւ քաղաքներու մէջ սենտուիչ վաճառող խոշոր ընկերութիւններ կան, որոնցմէ ամէնէն յայտնիներէն են` Մըք Տօնըլտզ, Սապուէյ, Պըրկըր Քինկ եւ այլն։

ԱՄՆ-ի մէջ կը պատրաստուին սենտուիչներու տարբեր տեսակներ, օրինակ Շիքակոյի մէջ սենտուիչը կը պատրաստեն իտալական միսով, Ֆիլատէլֆիայի մէջ կը պատրաստեն միսով եւ պանիրով, իսկ Լոս Անճըլըսի մէջ ֆրանսական սոուսով։

Սենտուիչները ճաշի յայտնի տեսակ մըն են, որոնք կը տանին աշխատանքի, դպրոց կամ զբօսանքի (փիքնիքի) վայրեր՝ որպէս փաթեթաւորուած ճաշի մաս։

Հացը յաճախ կը պատուի մածուկներով, ինչպէս՝ մայոնեզ կամ մանանեխ, անոր համն ու կազմուածքը բարելաւելու համար, բայց կարող է մատուցուիլ նաեւ պարզ («չոր»)։ Բացի տան մէջ պատրաստուելէ, սենտուիչները լայնօրէն կը վաճառուին նաեւ տարբեր մանրածախ խանութներու մէջ եւ կարող են մատուցուիլ տաք կամ պաղ։ Թէեւ աղի սենտուիչները կը կազմեն մեծամասնութիւնը, քաղցր սենտուիչները կը կազմեն իրենց առանձին խումբը։

«The Wall Street Journal» թերթը զայն նկարագրած է իբրեւ Բրիտանիոյ «ամէնամեծ նպաստը խոհարարութեան մէջ»^[1]։

Անուան Ստուգաբանութիւն

Բառը կը ծագի Սենտուիչ կոմսութեան անունէն (կը գտնուէր հարաւ-արեւելեան Անգլիոյ մէջ)։ Ըստ աւանդութեան 18-րդ դարուն ապրած Սենտուիչի կոմսը՝ Ճոն Մոնթեկիւն խաղամոլ էր եւ անոր խոհարարը յօրինած է «Սենտուիչը»՝ բարակ հացի մէջ դրուած մսեղէն եւ բանջարեղէն, որպէսզի կոմսը կարենայ թէ՛ սնուիլ եւ թէ՛ ալ շարունակել թղթախաղը։ Կոմսութեան անուան նախնական ձեւը՝ «Sandwicæ»-ը կը նշանակէ «աւազոտ նաւահանգիստ» կամ «աւազոտ շուկայ»։