Թիթեռնիկներուն Հովիտ (Ռոտոս)

Թիթեռնիկներուն Հովիտ
Հովիտ
	Թիթեռնիկներուն Հովիտ
	Κοιλάδα των Πεταλούδων
Երկիր	Յունաստան
Շրջան	Ռոտոս (կղզի)

Թիթեռնիկներու Հովիտ (յուն․՝ Κοιλάδα των Πεταλούδων), Ռոտոս, հարաւ-արեւելեան Էգէական ծով, Յունաստան։ Natura 2000 (GR 4210006) բնապահպանման ենթակայ շրջան․ Panaxia Quandripunctaria թիթեռնիկին ամառուան ապաստարանն է։

Հակիրճ տեղեկութիւններ[Խմբագրել | Խմբագրել աղբիւրը]

Թիթեռնիկներուն Հովիտը կը գտնուի Ռոտոս քաղաքէն 26 քլ․հիւսիս-արեւմուտք, Փարատիսի եւ Թէոլողոս գիւղերուն միջեւ։ Հովիտը կը ճեղքէ Փելեքանոս գետը։ Անոր հարաւը կը գտնուի Բնագիտութեան թանգարանը, ուր Ռոտոսի կենդանաբանական եւ բուսական աշխարհէն նմուշներ կը ցուցադրուին, ինչպէս նաեւ աշխարհի չորս ծագերէն թիթեռնիկներու տեսակներ։

Հովիտին բարձրագոյն կէտին վրայ կը գտնուի Փանաղիա Քալոփեթրաս վանքը։ Այցելուն հոն կը հասնի հետեւելով բլուրն ի վեր կառուցուած մասնաւոր արահետին, որ կ՛ անցնի ծառերու, փոքրիկ ջրվէժներու, փայտէ կամրջակներու եւ պզտիկ լճակներու ընդմէջէն։

Պատմական ակնարկ[Խմբագրել | Խմբագրել աղբիւրը]

1928-ին իտալացի փրոֆեսոր Ալեսանտրօ Քիճի կը յայտնաբերէ թիթեռնիկին կենսաբանական տեսակը։ 1957-ին երբ հազարաւոր թիթեռնիկներու հաւաքուիլը հանրութեան կը ծանօթացուի, հովիտը կ՛ առնէ իր այսօրուան անունը՝ Թիթեռնիկներուն Հովիտ։

Panaxia Quadripunctaria թիթեռնիկ[Խմբագրել | Խմբագրել աղբիւրը]

Բնապահպանումի ենթակայ Թիթերնիկներուն Հովիտը Panaxia Quandripunctaria թիթեռնիկին (վերջին տարիներուն կը կոչուի նաեւ Euplagia Quadripunctaria) ամառուան ապաստարանն է (Յունիսէն - Սեպտեմբեր)։ Ան օրուան ընթացքին ծառերուն բուներուն վրայ կը հանգչի։

Նկարագրութիւն[Խմբագրել | Խմբագրել աղբիւրը]

Թիթեռնիկը երբ ծառերուն վրայ կը հանգչի, համաչափ եռանկիւնի ձեւ ունի։ Առջեւի թեւերը սեւ-սրճագոյն են ճերմակ-դեղին գիծերով։ Ետեւի թեւերը կարմրագոյն են չորս նշաններով։ Կը սնանի ծառերուն նեքթարով եւ ջուրով։

Կեանքը[Խմբագրել | Խմբագրել աղբիւրը]

Panaxia Quadripunctaria թիթեռնիկը մէկ տարի կ՛ապրի եւ կեանքի վերջաւորութեան հարիւրէ աւելի հաւկիթ կ՛ ածէ (Սեպտեմբերի սկիզբէն մինչեւ վերջը)։ Անոր աճման չորս քայլերն են՝ հաւկիթ, թրթուր, հարսնեակ եւ միջատ։

Անոր կեանքը վտանգուած է մարդու գործունէութենէն եւ կլիմայական փոփոխութիւններէն։