Երան Գույումճեան

Երան Գույումճեան
Ծննդավայր	Պէյրութ
Ուսումնավայր	Պէյրութի Ամերիկեան Համալսարան
Մասնագիտութիւն	գրագէտ, Խմբագիր, հրապարակախօս, թարգմանիչ

Երան Գույումճեան ծնած է Պէյրութ, Լիբանան: Գրող, խմբագիր, հրապարակագիր, թարգմանիչ, ազգային-հաս. գործիչ, «Ազատ Խօսք» Ելեկտրոնային Անկախ Պարբերաթերթի խմբագիր:

Կենսագրութիւն

Երան Գույումճեան ծնած է Պէյրութ, Լիբանան բնիկ կիլիկեցի Գրիգոր եւ Պերճուհի Կերթմէնեաններու ընտանիքին մէջ։ Նախնական կրթութիւնը ստացած է Հայ Կաթողիկէ Ս. Ընտանիք (St. Famille, այժմ՝ Ս. Հռիփսիմեանց) վարժարանին մէջ։ Ապա յաճախած է Հ.Բ.Ը.Մ.-ի Դարուհի Յակոբեան աղջկանց երկրորդական վարժարանը եւ զայն աւարտած Պատուոյ յիշատակութեամբ: Համալսարանական կրթութիւնը ստացած է Պէյրութի Ամերիկեան համալսարանին մէջ (A.U.B.), հետեւելով ուսողութեան ճիւղին (Mathematics):

Այնուհետեւ, ամուսնութեան բերումով, տեղափոխուած է Կիպրոս: Հեռակայ կարգով, իր ուսումնառութիւնը շարունակած է, հետեւելով Լոնտոնի համալսարանի Փիլիսոփայութեան դասընթացքներուն՝ հինգ տարի անընդմէջ, որուն աւարտին՝ յաջողութեամբ յանձնած է համապատասխան քննութիւններ՝ արժանանալով Փիլիսոփայութեան Պսակաւոր Արուեստից (BA Honours in Philosophy) տիտղոսին:

Իր հետաքրքրութիւնները ուսման այս բնագաւառէն ներս զինք մղած են թարգմանութիւններ կատարելու եւ պատրաստելու արեւմտեան փիլիսոփայութեան նուիրուած թարգմանական գործերու հատոր մը (հայերէնով), որ ցարդ կը մնայ անտիպ:

Չորս քերթողագիրքերու գինեձօնը

Երան Գույումճեանի չորս ժողովածուներուն շնորհահանդէս-գինեձօնը տեղի ունեցաւ Չորեքշաբթի, 30 Սեպտեմբեր 2020-ին, երեկոյեան ժամը 7:00-ին, Նարեկ վարժարաններու ամփիթատրոնին մէջ, հովանաւորութեամբ Կիպրոսի Թեմի Կաթ. Փոխ. Գերաշնորհ Տէր Խորէն Արք. Տողրամաճեանի, նախագահութեամբ կիպրահայ համայնքի Պետ. Ներկ. Տիար Վարդգէս Մահտեսեանի եւ նեկայութեամբը կիպրահայ գրասէր հանրութեան:

Երան Գույումճեանի բանաստեղծութեանց երեք հատորները եւ քառեակներու ժողովածուն, «խորանին առջեւ խաչաձեւ ճարճատող չորս մոմերու պէս»: Լոյսին ընծայելով մէկը միւսին ետեւէն բանաստեղծուհի Երան Գույումճեանան իր անտիպ հունձքը՝ «Հոգւոյս հեւքին հետ», իբրեւ «բանաստեղծուհիին հեւքը կամ արագ շնչառութիւնը», «Հայերգութիւն», իբրեւ «հայրենիքին եւ հայերէնին նկատմամբ ամբարուած անսահման սէր», «Լուսէ անուրջներ» ժողովածուն, իբրեւ «լուսաւոր եւ լուսաշող երազներ» եւ «Քառեակներ» ժողովածուն, իբրեւ «խոհի եւ յոյզի, միտքի եւ պատկերի միաձուլում»:

Միութենական եւ կրթական գործունէութիւն

Երան Գույումճեանի միութենական, մշակութային եւ կրթական գործունէութիւնը կ'ընդգրկէ հետեւեալ պաշտօնները.

1979-1982՝ Հ.Բ.Ը.Մ.-ի Նիկոսիոյ Մասնաժողովի Գործադիր վարչութեան Ատենադպիր:

1982-1992՝ Նոյն Մասնաժողովի Մշակութային Մարմնի Ատենապետ:

1986-1996 եւ 2006-2010՝ Նարեկ Վարժարաններու Հոգաբարձութեան Ատենադպիր:

2010-2014՝ Նարեկ Վարժարաններու Հոգաբարձութեան Խորհրդական:

1989-1999՝ Մելգոնեան Կրթական Հաստատութեան Հոգաբարձութեան Ատենադպիր:

Խմբագրական աշխատակցութիւն

1997-2003՝ «Փարոս» ամսաթերթի Գլխաւոր Խմբագիր:

2003-2011՝ «Ազատ Ձայն» ամսաթերթի Գլխաւոր Խմբագիր:

2011-էն մինչ օրս՝ «Ազատ Խօսք» ելեկտրոնային ամսաթերթի Խմբագիր:

Մշակութային եւ հասարակական մասնակցութիւն

Երան Գույումճեան գործօն եւ պատասխանատու մասնակցութիւնը ունեցած է Ղարաբաղի օգնութեան Կիպրոսի Յանձնախումբի, Հայաստան Համահայկական Հիմնադրամի Յանձնախումբի, Հայաստանի Պետական Քրիստոնէացման 1700-ամեակի Յանձնախումբի աշխատանքներուն, Մելգոնեանի կազմակերպած տարեկան Հայ Մշակոյթի Շաբաթներուն եւ այլ գրական-գեղարուեստական ձեռնարկներուն:

Խորհրդաժողովներու մասնակցութիւն

Երան Գույումճեան Մասնակցած է եւ իր խօսքը ներկայացուցած է հետեւեալ Խորհրդաժողովներուն.

Կանանց Խորհրդաժողովին՝ 1987-ին, Երեւան:

-Հայաստան-Սփիւռք Ա. Խորհրդաժողովին՝ 1999-ին, Երեւան:

-Հայաստան-Սփիւռք Բ. Խորհրդաժողովին՝ 2002-ին, Երեւան:

-Լրագրողներու Համաժողովին՝ 2003-ին, Սլովաքիա:

-Լրատուամիջոցներու Ղեկավարներու Համաժողովին՝ 2008-ին, Ծաղկաձոր

-Լրատուամիջոցներու Համահայկական Համաժողովին՝ 2012-ին, Աղաւնաձոր:

-Հայաստան-Սփիւռք 5-րդ Համաժողովի շրջագիծէն ներս կայացած Լրատուամիջոցներու Համաժողովին՝ 2014-ին, Երեւան:

Շքանշան եւ գնահատագիր

23 Սեպտեմբեր 2014-ին արժանացած է Սփիւռքի Նախարարութեան կողմէ շնորհուած «Մայրենիի Դեսպան» շքանշանին եւ համապատասխան Վկայականին:

11 Յունիս 2017-ին՝ արժանացած է Քալիֆորնիոյ Մաշտոց Գոլէճին շնորհած «Distinguished Professor of Armenian Studies» ակադեմական տիտղոսին:

Ն.Ս.Օ.Տ.Տ. Արամ Ա. Հայրապետի 2019 տարին, ՀԱՅ ՄԱՄՈՒԼԻ ՏԱՐԻ հռչակման առիթով, Ուրբաթ, 11 Հոկտեմբեր 2019-ին, Կիպրոսի Թեմի Կաթողիկոսական Փոխանորդ՝ Գերշ. Տ. Խորէն Արքեպիսկոպոս Տողրամաճեան Կիպրոսի Թեմի անունով յուշանուէր ստացաւ ելեկտրոնային «Ազատ Խօսք» կայքի խմբագիր՝ Տիկին Երան Գույումճեան

Աղբիւրներ

• Ազատ Խօսք - Ելեկտրոնային Անկախ Պարբերաթերթ
• Զրոյց-Քննարկում` «Հայատառ Մամուլին Դիմագրաւած Խնդիրները» Նիւթին Շուրջ
• ԺՈՂՈՎՈՒՐԴԻ ՄԸ ՀՈՂԻ ՄԸ ԵՒ ԴԱՏԻ ՄԸ ՄԱՍԻՆ
• Հայ մամուլի տարուան տօնակատարութիւն Կիպրոսի Ազգային Առաջնորդարանին մէջ
• ՀԱՅԵՑԻ ԿՐԹՈՒԹԻՒՆԸ ԱԶԳԱՅԻՆ ՌԱԶՄԱՎԱՐՈՒԹԻՒՆ Է Archived 2020-09-27 at the Wayback Machine.

Տես նաեւ

• Փարոս (ամսաթերթ, արեւմտահայերէն)