Ապագայ (թերթ)

Պատկանելիութիւն	ԹՄՄ, ՌԱԿ
Լեզու	Հայերէն, Անգլերէն, Ֆրանսերէն
Քաղաք	Մոնրէալ
Երկիր	Գանատա
Քոյր թերթեր	Ազգ (Հայաստանի Հանրապետութիւն), Պայքար (Պոսթոն), Նոր Աշխարհ (Աթենք), The Armenian Mirror Spector (Watertown, Massachusetts), Սարտարապատ (Պուէնոս Այրես), Զարթօնք (Պէյրութ)
Կայքէջ	https://abakanews.org
Կաղապար:Ubl

«Ապագայ», ազգային, մշակութային, հասարակական եւ քաղաքական շաբաթաթերթ։ Ան հրատարակութիւնն է Մոնթրէալի Թէքէեան Մշակութային Միութեան (ԹՄՄ ): Որպէս ՌԱԿ-ի պաշտօնաթերթ, թերթը կը հետեւի եւ կը ցոլացնէ Ռամկավար Ազատական Կուսակցութեան սկզբունքները: Հիմնադրուած է1975 թուականին, Մոնրէալի մէջ, Գանատա։ Ան կը հանդիսանայ Գանատայի առաջին եռալեզու շաբաթաթերթը:

Կը ծանօթացնէ գանատահայ գաղութի եւ սփիւռքի առօրեային, կը ներկայացնէ Հայաստանը՝ իր ներքին եւ արտաքին խնդիրներով։ Գրական բաժնին մէջ կը տպագրէ հայ գրողներու գործեր։

Հիմնուած է ԹՄՄ-ի եւ ՌԱԿ-ի կարկառուն դէմքերէն՝ բազմավաստակ գիտնական, գանատաբնակ Դոկտ. Արշաւիր Կէօնճեանի (այժմ՝ Թէքէեան Մշակութային Միութեան Ամերիկայի եւ Գանատայի Կեդրոնական վարչութեան ատենապետ) ջանքերով, որ մինչեւ օրս կը տնօրինէ անոր անխափան լոյս ընծայումը: Թերթի հիմնադիրներէն եղած են Երուանդ Ազատեան, Տոքթ. Յարութիւն Արզումանեան եւ Վահէ Քէթլի: «Ապագայ»ի առաջին թիւը լոյս տեսած է 13 Սեպտեմբեր 1975-ին: Նախ լոյս տեսած է միայն հայերէն, իսկ 1979-էն սկսեալ նաեւ անգլերէն եւ ֆրանսերէն բաժիններով: Սկզբնական տարիներուն ունեցած է տասներկու հայերէն էջեր ապա անոր վրայ աւելցուած է երկուքական էջով անգլերէն եւ ֆրանսերէն էջեր։

«Ապագայ»-ն ունեցած է մանկական եւ պատանեկան ամսական յաւելուած մը՝ «Փունջ», ինչպէս նաեւ կրկնակի էջերով բացառիկներ ամէն տարեգլուխին:

Նախնական տարիներուն խմբագիրները եղած են՝ Արսէն-Նուպար Սամուրեան, Երուանդ Փափազեան, Մկրտիչ Նալպանտեան, Վահան Գոչունեան, Տոքթ. Յարութիւն Արզումանեան: Վահէ Քէթլին եւ Նիքոլ Փափազեան-Հերնանտեզ (ֆրանսերէն բաժին):

«Ապագայ» շաբաթաթերթը 2010 թուականէն ի վեր կը հրատարակուի նաեւ ԹՄՄ-ի կայքէջին վրայ (www.tekeyanmontreal.ca) PDF դրութեամբ:

«Ապագայ»ի խմբագրատունը կը գտնուին Թէքէեան Կեդրոնին մէջ (825 Manoogian, Saint-Laurent, Qc H4NZ5):

Ապագայ շաբաթաթերթը եղած է նաեւ հրատարակչատուն, որ լոյս ընծայած է զանազան գիրքեր:

«Ապագայ Առցանց» լուրերը (Abaka News online)

«Ապագայ Առցանց» լուրերը (Abaka News online) համաշխարհային լրատու ծառայութիւն մըն է, որ կը տրամադրուի աշխարհատարած իր ընթերցողներուն: Ան կանոնաւոր կերպով կ’ամբողջացնէ «Ապագայ» տպագիր տարբերակը: Արդարեւ, առցանց (online) հրատարակութիւնը որ տրամադրելի է բոլորին, կենսունակ է եւ տեւականօրէն կը թարմանայ հայութիւնը հետաքրքրող վերջին լուրերով: Եռալեզու՝ հայերէնով, Անգլերէնով եւ Ֆրանսերէնով սպասարկուած ծառայութիւն մըն է ան, որու լուրերը յատկապէս ուղղուած են հայկական աշխարհին:

«Ապագայ»ի եռալեզու էլէքտրոնային online տարբերակը որ կեանքի կոչուած է Սեպտեմբեր 2015-ին, տրամադրելի է abakanews.org հասցէով:

Այժմ անոր տպագիրը լոյս կը տեսնէ 10 էջերէ բաղկացած ծաւալով, անգլերէն ու ֆրանսերէն բաժինները ներառեալ: Վերջին տարիներուն՝ 2012-էն սկսեալ, թերթին գլխաւոր խմբագրի պաշտօնը կը վարէ՝ Պրն. Աւետիս Պագգալեան:

Ծանօթագրութիւններ

Այս յօդուածի նախնական տարբերակը կամ նրա մասը վերցուած է «Հայ Սփյուռք» հանրագիտարանէն, որի նիւթերը թողարկուած են` Քրիեյթիւ Քոմմոնս Նշում–Համանման տարածում 3.0 (Creative Commons BY-SA 3.0) թոյլատրագրի ներքոյ։