Քանատայի Բնութեան Թանգարան

Քանատայի Բնութեան Թանգարան
Տեսակ	բնագիտական թանգարան
Երկիր	Քանատա
Տեղագրութիւն	Օթաուա
Վայր	Victoria Memorial Museum Building?
Հասցէ	240 McLeod Street և 240 Rue McLeodK2P 2R1
Հիմնադրուած է	1912
45°24′46″N 75°41′20″W
Կայքէջ	nature.ca

Քանատայն Բնութեան Թանգարան (ֆրանսերէն՝ Musée Canadien de la Nature), նախապէս՝ Ազգային Բնագիտական Թանգարան (ֆրանսերէն՝ Musée National des Sciences Naturelles), Քանատայի բնութեան պատմութեան ազգային եւ բնագիտական թանգարան Օթաուայի մէջ, Օնթարիօ: Թանգարանին չորս հիմնական հաւաքածոները սկսած են կազմուիլ 1856-ին Քանատայի երկրաբանական ուսումնասիրութեան ծիրին մէջ եւ այժմ կը ներառեն շուրջ 14,6 միլիոն նմուշ՝ բուսաբանութիւն, հանքաբանութիւն, հնաբանութիւն եւ կենդանաբանութիւն ոլորտներով:

Թանգարանը փոխկապակցուած է Քանատայի Թանգարաններու Դաշինքին, Քանատայի Ժառանգութեան Տեղեկատուական Ցանցին, Արքթիկի Բնական Պատմութեան Թանգարաններու Դաշինքին, Քանատայի Բնական Պատմութեան Թանգարաններու Դաշինքին եւ Քանատայի Վիրթուալ Թանգարանին:

Պատմութիւն

Կանուխ Շրջանի Թանգարանը (1856–1968)

Բնութեան Քանատական Թանգարանի հիմնադրութիւնը կը պարտինք 1842-ին Մոնրէալի մէջ հաստատուած «Քանատայի Երկրաբանական Հետախուզութիւն» (GSC) կազմակերպութեան հաւաքածոներուն: 1856-ին Քանատա Նահանգի Օրէնսդիր Ժողովը օրէնք մը որդեգրեց, որ արտօնեց GSC-ին թանգարան մը հիմնել՝ ցուցադրելու համար իր երկրաբանական եւ հնագիտական դաշտային հետազօտութիւններու ընթացքին յայտնաբերուած նմոյշները. թանգարանը սկզբնապէս հաստատուեցաւ Մոնրէալի մէջ: 1877-ին թանգարանի առաքելութիւնը պաշտօնապէս ընդլայնուեցաւ՝ ընդգրկելու համար արդի կենդանական եւ բուսական աշխարհի ուսումնասիրութիւնը, ի հաւելումն մարդկային պատմութեան, լեզուներու եւ աւանդոյթներու:

1881-ին թանգարանը Մոնրէալէն տեղափոխուեցաւ Օթաուայի կեդրոնը. թէեւ նոր շէնքի տարածութիւնը շուտով անբաւարար դարձաւ, ինչ որ մղեց «Քանատայի Թագաւորական Ընկերակցութիւն»ը 1896-ին դիմելու դաշնակցային կառավարութեան՝ թանգարանին համար նոր շէնք մը կառուցելու պահանջով: Նոր շէնքի նախնական ծրագիրները պատրաստուեցան 1899-ին, սակայն շինարարական աշխատանքները սկսան միայն 1906-ին: Յաջորդ տարին թանգարանի կառավարումը ստանձնեց Ելեւմտից (Լեռնային արդիւնաբերութեան) Նախարարութիւնը, եւ անոր առաքելութիւնը պաշտօնապէս ընդլայնուեցաւ՝ ընդգրկելու համար մարդաբանական ուսումնասիրութիւններ: Թանգարանի նոր շէնքը՝ «Վիքթորիա Յուշահամալիր»ը (Victoria Memorial building), ամբողջացաւ 1910-ին, թէեւ հանրութեան առջեւ իր դռները բացաւ միայն 1912-ին: 1927-ին Ելեւմտից Նախարարութեան թանգարանային բաժինը վերանուանուեցաւ «Քանատայի Ազգային Թանգարան»՝ պաշտօնապէս անջատուելով GSC-էն:

Ազգային Թանգարանի կառավարումը Ելեւմտից Նախարարութենէն փոխանցուեցաւ Հարստութիւններու եւ Զարգացման Նախարարութեան 1950-ին: 1956-ին թանգարանը բաժնուեցաւ երկու ճիւղերու. մէկը կեդրոնացած էր բնական պատմութեան, իսկ միւսը՝ մարդաբանութեան վրայ: Թանգարանի առաքելութիւնն աւելի ընդլայնուեցաւ, երբ Քանատայի Ազգային Թանգարանը 1958-ին ստանձնեց «Քանատական Պատերազմի Թանգարան»ի կառավարումը: 1964-ին պատմութեան բաժանմունք մը հաստատուեցաւ թանգարանի մարդաբանութեան ճիւղին մէջ:

Ցուցադրութիւն

Ցուցանմուշները եւ հիմնական հաւաքածոները տեղակայուած են Օթաուայի Վիքթորիա յուշահամալիրի շէնքին մէջ։ Թանգարանը ունի ութ մշտական պատկերասրահ.

• Բրածոներու պատկերասրահ՝ ներկայացուած են հոյամողէզներու եւ ծովային սողուններու կմախքներ, անոնց բնաշխարհներու եռաչափ կազմութիւնները (diorama) եւ անոնց ոչնչացման պատճառները:
• Երկրի պատկերասրահ՝ ներկայացուած են հանքանիւթեր եւ ժայռեր։ Տարբեր ձեւաչափերու ներկայացումներով կը բացատրուի երկրաբանական ուժերու կողմէ երկիր մոլորակի ձեւաւորումը:
• Կաթնասուն կենդանիներու պատկերասրահ՝ ներկայացուած են Քանատայի վայրի կենդանիները՝ ներառեալ հիւսիսամերիկեան գորշ արջեր, բեւեռային արջեր, պիզոն, որմզդեղն, քարիպու, երկճղի անթիլոփ եւ քուկար:
• Ջրային պատկերասրահ՝ ներկայացուած է կապոյտ կէտի կմախք, ցուցադրութիւն՝ ծովային եւ քաղցրահամ ջրային միջավայրերուն մէջ յայտնաբերուած կեանքի մասին:
• Թռչուններու պատկերասրահ՝ ներկայացուած են քանատական թռչուններու 450 տեսակ, մուլդիմետիա փորձառութիւններ եւ ինտերակտիւ ցուցադրութիւններ:
• Կենդանի բնութիւն՝ կենդանի միջատներ, սարդակերպեր, լորձնեակ:
• Քարէ պատի պատկերասրահ՝ բնագիտութեան վերաբերեալ արուեստի եւ լուսանկարներու փոփոխուող ցուցադրութիւն:
• Քանատայի այգիներու բնապատկերներ՝ բացօթեայ բուսաբանական ցուցահանդէս, որ կը ներկայացնէ Քանատայի երեք տարբեր էքոհամակարգներ ներկայացնող գօտիներ` Արքտիքական թունտրա, պորէալ անտառներ եւ խոտածածկ մարգագետիններ:

Բնական ժառանգութեան Փակ

Քէպէք նահանգի Կատինօ քաղաքին մէջ գտնուող Բնական ժառանգութեան Փակը բացուած է 1997-ին: Թանգարանին վարչական գործողութիւններու եւ ընդարձակ հետազօտական հնարաւորութիւններու եւ հաւաքածոներու համար յատկացուած է 76 հեկտար տարածք: Փակը հասարակութեան համար բաց չէ, բացառութեամբ ամէնամեայ Open House-ին, որու ընթացքին կը ցուցադրուի 14,6 միլիոն նմուշ, կը ներկայացուին հետազօտական աշխատանքներ: Գրադարանը, սակայն, բաց է այցելուներու համար:

Պատմութիւն

Քանատայի Բնութեան Թանգարանի արմատները կու գան 1842-ին ձեւաւորուած Քանատայի Երկրաբանական Հետազօտութեան Ընկերութենէն: Մօտ 150 տարի ետք՝ 1 Յուլիս 1990-ին, թանգարանը խորհրդարանական որոշումով դարձաւ Crown Corporation։ Այս որոշումը կարեւոր իրադարձութիւն էր թանգարանին պատմութեան մէջ։ Crown Corporation կարգավիճակի հետ թանգարանը ունեցաւ նոր անուն եւ ընդլայնուած լիազօրագիր. «Քանատայի բնութեան թանգարանի նպատակն է Քանատայի եւ աշխարհի մէջ ընդլայնել, տարածել բնական աշխարհին հանդէպ հետաքրքրութիւնը, գիտելիքը, յարգանքը՝ ստեղծելով, պահպանելով եւ զարգացնելով բնական պատմութեան նմուշներու հաւաքածոն՝ ցոյց տալով բնական աշխարհը եւ անկէ բխող գիտելիքը»:

Քանատայի Ազգային Բուսագիրքը

Քանատայի Ազգային Բուսագիրքը տեղակայուած է Քանատայի Բնութեան Թանգարանին մէջ։ Քանատայի երկրաբանական եւ բնական պատմութեան հետազօտական բոյսերու հաւաքածոները պաշտօնապէս ներառուած են թանգարանին մէջ, 1882-ին:

Արտաքին յղումներ

• Քանատայի Բնութեան թանգարանի պաշտօնական կայք