Պէյրութի Պրիսթոլ Պանդոկը (Ֆր.Le Bristol ) շքեղ պանդոկը կը գտնուի Լիբանանի Վերտուն շրջանի, Մատամ Քուրի փողոցի վրայ: Լիբանանի երբեմնի ամենէն շքեղ եւ խորհրդանշական պանդոկներէն մէկը եւ անբաժան մէկ մասն է Լիբանանի ժամանակակից պատմութեան եւ ժամադրավայրը քաղաքական աւագանիին, հիւրընկալելով շքեղ հարսանիքներ եւ ընկերային այլ ձեռնարկներ:
Արեւմտեան Պէյրութը շէնցնող պանդոկներու հոյլին կը պատկանէր Պրիսթոլ՝ 50էն 70ական թուականներուն իր մերձակայքը գտնուող Ալքազար եւ քիչ մը անդին՝ ծովեզերքին վրայ իշխանավայել կանգնած Սեն Ժորժ պանդոկներու կողքին:
Պէյրութի Պրիսթոլ Պանդոկը որ կը պատկանէր Լիբանանի ամենէն հարուստ ընտանիքներէն՝ Տումէթ ընտանիքին, 1951ին բացաւ իր դռները:[1]
Պէյրութի Պրիսթոլ Պանդոկը նաեւ կը գտնուի դիմացը այն շէնքին ուր իսրայէլացի գործակալներ 1973-ին սպանեցին պաղեստինցի երեք պատասխանատու ղեկավարներ, որուն հետեւանքով օրուան կառավարութիւնը հրաժարեցաւ:
Հակառակ 15 տարիներու Լիբանանեան արիւնալի եւ կործանարար քաղաքացիական պատերազմին պանդոկը բաց պահած էր իր դռները:
Ան զոհը դարձաւ Լիբանանի տնտեսական թնճուկ-տագնապին որուն վրայ եկած էր աւելնալու Քորոնա ժահրի բարդութիւնը:
Պանդոկին վերջնական փակման յայտարարութիւնը կատարուեցաւ 22 Ապրիլ 2020-ին: Պէյրութի Պրիսթոլ Պանդոկը իր դռները վերջնականապէս պիտի փակէ Ապրիլ ամսուան վերջաւորութեան եօթանասուն տարուան գոյութենէ ետք:
Պէյրութի Պրիսթոլ Պանդոկը հիւրընկալած է աշխարհահռչակ անձնաւորութիւններ, որոնց կարգին Իրանի շահը եւ իշխանուհի Սուրայան, Մոնաքոյի Ալպերթ իշխանը: Առաւել ըլլալով Սէուտական Արաբիոյ թագաւոր Ապտալլա Պըն Ապտիւլ Ազիզը եւ Ֆրանսայի նախագահ Ժագ Շիրաքը իջեւանած են հոն: Արաբական աշխարհի ամենատաղանդաշատ եւ սիրուած ժողովրդային բանաստեղծ Նիզար Քապպանին յաճախ այցելած է Պրիսթոլ պանդոկը:
Պէյրութի Պրիսթոլ Պանդոկը նշանաւոր դարձած էր իր պարասրահովներով, փակ լողաւազանով եւ Լիբանանի առաջին սառցադաշտով:
Ոճը՝ միաձուլումն էր արեւելեան եւ արդիական ճարտարապետութեան:
Պանդոկը նախագծուած է ֆրանսացի (interior designer) կառոյցի Ներսի ձեւաւորման հեղինակ հնարիչ Ժան Ռոյէրի կողմէ: [2]
