Մեսրոպեան Վարժարան (Լիբանան)
Հայ Կաթողիկէ Մեսրոպեան Բարձրագոյն վարժարանը կը գործէ Պէյրութի հայահոծ արուարձանին՝ Պուրճ Համուտի մէջ, Լիբանան։ Հիմնադրուած է 1939-ին, որպէս նախակրթարան, հրամանով Տանն Կիլիկիոյ Կաթողիկէ Հայոց Կաթողիկոս Գրիգոր Պետրոս ԺԵ. Աղաճանեանին։ Վարժարանի առաջին պատասխանատուներն էին հայր Պօղոս Արիս եւ հայր Պօղոս Պզտիկեան։ 1973-ին վարժարանը ունեցաւ իր աւարտական բաժանամունքը, որ յաջորդեց միջնակարգի բացման՝ 1962-ին։
Մեսրոպեան Վարժարանին կից կը գործէ Արուեստից Վարժարանը, հիմնադրուեցաւ հայր Եղիա Եղիայեանի կողմէ, 1983-ին։ Ան վերակազմաւորուեցաւ եւ արդիականացաւ 1993-ին։
1939 թուականէն հաշուած, Մեսրոպեանը ունեցած է աւելի քան 10,000 աւարտական։ Մեսրոպեան վարժարանը 2001-2014 տարիներուն հրատարակած է Մեսրոպեան Լրաբեր աշակերտական ամսագիրը։ 2014-ին սկսաւ գործել Մեսրոպեան Լրաբեր աշակերտական պլոկը, ուր կը ներկայացուին աշակերտներու գրական-գեղարուեստական եւ ուսումնասիրական գործերը։