Արշակ Վռամեան

Արշակ Վռամեան
Ծննդեան անուն	Օննիկ Դերձակեան
Նաեւ յայտնի է իբրեւ	Արշակ Վռամեան
Ծնած է	1871
Ծննդավայր	Պոլիս, Օսմանեան Կայսրութիւն
Մահացած է	17 Ապրիլ 1915(1915-04-17)
Քաղաքացիութիւն	Օսմանեան Կայսրութիւն
Մասնագիտութիւն	Յեղափոխական և քաղաքական գործիչ
Աշխատավայր	Դրօշակ և Հայրենիք
Վարած պաշտօններ	գլխաւոր խմբագիր և Օսմանեան կայսրութեան պատգամաւորներու պալատի անդամ.
Կուսակցութիւն	Հայ Յեղափոխական Դաշնակցութիւն

Արշակ Վռամեան (բուն անունով՝ Օննիկ Դերձակեան, 1871, Պոլիս, Օսմանեան Կայսրութիւն - 17 Ապրիլ 1915(1915-04-17)), հայ ազգային-ազատագրական շարժումի գործիչ, Հայ Յեղափոխական Դաշնակցութեան անդամ։

Կենսագրութիւն

Նախնական կրթութիւնը ստացած է Պոլսոյ Սուրէնեան վարժարանին մէջ, ապա 1889-ին Լեւոն Շանթին հետ մեկնած է Էջմիածին, ուր աւարտած է Գէորգեան Ճեմարանը։ Պոլիս վերադարձին, ռուսական նամակատան մը մէջ նպաստած է շոգենաւերու ուժանակի փոխադրութեան գործին։ Օկիմտա ծածկանունով աշխատակցած է Յովհաննէս Շահնազարի հրատարակած «Հայրենիք»-ին։

10 Օգոստոս 1896-ին մասնակցած է Պանք Օթոմանի գրաւման աշխատանքներուն։ Հետապնդման ենթարկուած է եւ, ամիս մը ռուսական հիւպատոսարանին մէջ պահուըտելէ ետք, ապահոված է պուլկարական անցագիր մը եւ անցած՝ Ֆիլիպէ, ուր զբաղած է հրապարակագրութեամբ։ 1898-ին մեկնած է Ժընեւ, ուր ստանձնած է Հ. Յ. Դաշնակցութեան Արեւմտեան Բիւրոյի գործավարութիւնը եւ միաժամանակ աշխատակցած՝ «Դրօշակ»-ին։ Անցնելով Ամերիկա, գործօն կերպով մասնակցած է շրջանին մէջ Դաշնակցութեան կազմակերպական կառոյցի ստեղծման աշխատանքներուն, խմբագրելով Պոսթըն-ի «Հայրենիք»-ը։

1907-ին վերադարձած է Կովկաս եւ Սահմանադրութեան հռչակման ատեն, հանրային գործերու պատասխանատուութեամբ կ՛երթայ Վան ու ապա կը վերադառնայ Պոլիս, աշխատակցելով «Ազատամարտ»-ին։ 1908-ին, երիտթուրքերու յեղաշրջումէն ետք, ընտրուած է Օսմանեան Խորհրդարանի երեսփոխան։ 4 Ապրիլ 1915-ին զոհ գացած է դաւադրութեան մը Վանի մէջ։

Աղբիւրներ

• Թէոդիկ, Յուշարձան ապրիլ տասնմէկ, Կ․ Պոլիս, 1919, «Արզուման» հրատարակչատուն Archived 2020-07-04 at the Wayback Machine.