Սումօ (մարտարուեստ)
Սումօն Ճափոնի իշխող մարզանքն է մէջ: Գօտեմարտի տեսակ մը, ընդ որում հակառակորդները կը մրցին կլոր հարթակի վրայ։
Սումօն Ճափոնի մէջ հնարուած է: Յաղթելու համար, պէտք է հակառակորդը շրջանակէն դուրս հրել, կամ շրջանակին մէջ գետին ձգել զայն: Մարզիկին ծանրութիւնը կարեւոր է կարենալ հակառակորդին յարձակումներուն դիմադրելու համար: Չափահաս սումօթօրիները կը կշռեն 130-էն 150 քիլոկրամ:
Խաղին յատուկ արարողութիւններ[Խմբագրել | Խմբագրել աղբիւրը]
Սումօն շատ հին մարզաձեւ մըն է: Ան բազմաթիւ արարողութիւններ ունի: Մարզիկները իրենց զիստերուն կը զարնեն` գէշ ոգիները հեռացնելու համար, եւ գետնին վրայ աղ կը սրսկեն` զայն մաքրելու համար: Փորձէն ետք աշակերտները զիրար կ'ողջունեն իրենց գլուխն ու մարմինը ծռելով` հակառակորդին հանդէպ իբրեւ յարգանք:
Սումօն բիրտ մարզաձեւ մը չէ, ան մարտարուեստ (մարշըլ արթ) մըն է, որ մեծ կեդրոնացումի կը կարօտի: Սակայն նոյնիսկ եթէ զարկերը արգիլուած են, կը պատահի, որ տղաքը յաճախ թեթեւօրէն վիրաւորուին իրարու վրայ յարձակումի կամ ուժգին գետին իյնալու պարագային:
Արհեստավարժ սումօթօրիները ամէն երկու ամիսը անգամ մը ազգային մրցաշարքերու կը մասնակցին: Դասաւորումին ամէնէն բարձր կարգը իւրայատուկ է. ան Եօքոզունա տիտղոսն է: Երբ մարզիկ մը այդ տիտղոսին արժանանայ, ան այլեւս չի կրնար աւելի ցած մակարդակի իջնել: Երբ այլեւս ան չի յաղթեր, Եօքոզունան անձամբ կը քաշուի խաղերէն:
Ճափոնի մէջ սումոյի ախոյեանները մեծ աստղեր են: Ամէն մարդ անոնցմով կը հիանայ եւ անոնց խաւաքարտէ դիմանկարներուն հետ կը նկարուի[1]: