Ծովային Խոտեր
![](http://upload.wikimedia.org/wikipedia/commons/thumb/b/b7/Floridian_seagrass_bed.jpg/220px-Floridian_seagrass_bed.jpg)
Ծովային խոտերը ծաղիկ տուող բոյսեր են, որոնք կ'ապրին ջուրին մէջ: Գոյութիւն ունին տեսակաւոր ծովային խոտեր, եւ կարգ մը խոտեր նոյնիսկ խոտերու չեն նմանիր: Անոնք կրնան ունենալ շատ տարբեր ձեւերով եւ չափերով տերեւներ, կան հաւկթաձեւ տերեւներ կամ ժապաւէնի նման:
Ծովային այս խոտերը երբեմն կը նմանցուին բնական միջավայրի ճարտարագէտներու, որովհետեւ անոնք մասամբ կը ստեղծեն իրենց անձնական բնակավայրը: Իրենց տերեւներուն շնորհիւ` անոնք կը դանդաղեցնեն հոսանքները, իսկ իրենց արմատներուն շնորհիւ` կը կայունացնեն ծովերու խորքը:
![](http://upload.wikimedia.org/wikipedia/commons/thumb/7/78/Cymodocea_nodosa.jpg/220px-Cymodocea_nodosa.jpg)
![](http://upload.wikimedia.org/wikipedia/commons/thumb/4/4b/Syringodium_isoetifolium_ployant_sous_la_houle.jpg/220px-Syringodium_isoetifolium_ployant_sous_la_houle.jpg)
Այս խոտերը շատ կարեւոր են, որովհետեւ անոնք կը հայթայթեն սնունդ եւ ապաստան` բազմաթիւ անասուններու: Ծովային մարգագետիններու մէջ կարելի է հանդիպիլ` կարիդոսներու, խեչափառներու, ծովաստղերու, ծովային խխունջներու, ձիաձուկերու[1]: Բազմաթիւ անասուններ կը պահուըտին ծովային մարգագետիններուն մէջ: Անոնք կը խուսափին զիրենք որսացող այլ անասուններէ, ինչպէս` շանաձուկերէն:
Ծովային մարգագետինները կարեւոր են, որովհետեւ հոն կը մեծնան փոքրիկ ձուկերը եւ կարիդոսները` ովկիանոսին մէջ լողալ համարձակելէ առաջ: