Սթաւրոս Քսարխաքոս

Սթաւրոս Քսարխաքոս; Σταύρος Ξαρχάκος
Ծննդեան անուն	Սթաւրոս Քսարխաքոս
Ծնած է	14 Մարտ 1939
Ծննդավայր	Աթէնք
Քաղաքացիութիւն	Յունաստան
Ազգութիւն	յոյն
Ուսումնավայր	Ճուլիարտ Վարժարան
Մասնագիտութիւն	քաղաքական գործիչ, երգահան, խմբավար և երաժիշտ
Վարած պաշտօններ	Յունաստանի Խորհրդարանի երեսփոխայ և Եւրոպական Խորհրդարանի անդամ
Կուսակցութիւն	«Նոր Ժողովրդավարութիւն»
Ամուսին	Իրօ Սայիա

Սթաւրոս Քսարխաքոս (յուն․՝ Σταύρος Ξαρχάκος, Աթէնք 14 Մարտ 1939)․ միջազգային համբաւի արժանացած յոյն յօրինող, խմբավար եւ քաղաքական գործիչ։ Կը սեպուի նորագոյն շրջանի յունական արուեստական եւ ժողովրդային երգերու նշանաւոր յօրինողներէն մէկը։ Յօրինած է երգեր 42-է աւելի ձայնապնակներու համար, երաժշտութիւն 21 ժապաւէններու համար եւ 15՝ հեռասփռման արտադրութիւններու համար։ Ինչպէս նաեւ երաժշտութիւն յօրինած է յունական հին ողբերգութեան համար, տրամաներ եւ միջազգային պալէներ։

Նուագահանդէսներ կատարած է Յունաստանի հին ու նոր թատրոններուն մէջ, Ֆրանսայի, Իրոտու Ադիքու Օտէոնին մէջ, Աթէնքի Մեղարօ Մուսիքիս սրահին մէջ, Փաթրասի հռոմէական թատրոնին մէջ, Յունաստանի Ազգային Քնարերգակ թատրոնի բեմէն (Εθνική Λυρική Σκηνή), Նիու Եորքի Քարնըկի Հոլ Carnegie Hall սրահին մէջ, եւ այլուր։

11 Յունուար 1965-ին, Քսարխաքոս կու տայ իր առաջին նուագահանդէսը Աթէնքի «Քենտրիքոն» հանդէսասրահին մէջ, ներկայութեամբ Յունաստանի վարչապետին՝ Եորղոս Բաբանտրէուին։

Մասնաւորաբար ներկայացուցած է Մանոս Խածիտաքիսին եւ Միքիս Թէոտորաքիսին (2011, 2019, 2020), Վասիլիս Ցիցանիսին (2014), Եանիս Ռիցոսին, Մարքոս Վամվաքարիսին (2019, 2020), Նիքոս Քսիլուրիսին (2022) գլուխ գործոցները։

Գործակցած է յոյն եւ օտար հռչակաւոր անձնաւորութիւններու եւ արուետագէտներու հետ, ինչպէս օրինակ՝ Խոսէ Քարերաս (2001, ուր Քսարխաքոս կը խմբավարէ Վիեննայի սիմֆոնիք նուագախումբը), Միքիս Թէոտորաքիս, Լեֆթերիս Բաբատոբուլոս, Մելինա Մերքուրի, Նանա Մուսխուրի, Իաքովոս Քամպանելիս, Մարիա Ֆարանտուրի, Մանոլիս Միցիաս, Նիքոս Կացոս, Սթամաթիս Քոքոթաս, Աղնի Պալցա, Ալքիստիս Բրոթոփսալթի եւ ձեռնարկած է նուագահանդէսներ։

Կենսագրութիւն

Առաջին տարիներ

Սթաւրոս Քսանխաքոս ծնած է Աթէնք, իսկ ծագումը Պելոպոնեսի Մանի շրջանէն է։ Մեծնալով Աթէնքի թաղամասի մը մէջ, ուր արուեստը կը զարգանար, ազդուած է եկեղեցական երաժշտութենէն, յունական ժողովրդային եւ ռեպեթիքօ երգերէն, ինչպէս նաեւ եւրոպական երգերէն որոնք կը լսուէին ձայնասփիւռէն։ Աւարտած է Աթէնքի Երաժշտանոցը եւ ուսումը շարունակած է Փարիզ, ինչպէս նաեւ Նիու Եորքի Ճիւլիարտ Դպրոցը (Juilliard School)։ Մեծ մայրը կիթառ կը նուագէր եւ կը դառնայ Քսարխաքոսին երաժշտութեան խթաններէն մէկը․ երկուքը միասին կ՛երգէին օփերայի արիաներ եւ «քանթադես» (Serenade)։ Փոքր տարիքէն ցոյց կու տայ երաժշտութեան հանդէպ սէրը եւ դաշնակի ու թաւջութակի դասերու կը հետեւի։

1958-ին Քսարխաքոս կ՛արձանագրուի Աթէնքի Երաժշտանոցը եւ 1968-ին, երբ արդէն համբաւ կը ստանար իր յօրինումներով, կ՛որոշէ ուսումը Փարիզ շարունակել եւ կ՛աշակերտէ Նանտիա Պուլանժէի մօտ (գլխաւոր ֆրանսուհի երաժշտագէտ եւ մանկավարժ) մինչեւ 1973։

1978-ին, կը փափաքի ուսումնասիրել դասական երաժշտութեան արուեստը եւ ընկալել «արմոնիա»ն, յօրինումը եւ խմբավարութիւնը։ Լէոնարտ Պերնշթայն կը դրդէ զայն (նամակագրութեամբ կապ հաստատած էին) ուսումը շարունակել Նիու Եորքի Ճիւլիարտ Դպրոցը, ինչպէս նաեւ կը ծանօթացնէ Քիմոն Ֆրայըրին՝ միջազգային համբաւի արժանացած թարգմանիչ, բանասէր եւ ակադեմական։ Նիու Եորք կը խմբավարէ քաղաքին սիմֆոնիք նուագախումբը։

Ասպարէզին առաջին տարիներուն, հռչակ կը ստանայ իբր շարժապատկերի եւ թատերագրութեան երաժշտութիւն յօրինող։

Ասպարէզ

1961-ին Ճէյն Արտենի «The party» թատերագրութեան երաժշտութիւնը կը յօրինէ։

1963-ին, հազիւ 24 տարեկան, Վասիլիս Եորիադիսին «Կարմիր լապտերները» Τα κόκκινα φανάρια ֆիլմին երաժշտութիւնը կը յօրինէ․ «Աբոնի զոյի» Άπονη ζωή եւ «Ֆթոխոլոյիա» Φτωχολογιά երգերը կը մեկնաբանէ Ղրիղորիս Պիթիքոցիս, իսկ «Բարաբոնօ» Παράπονο երգը կը մեկնաբանէ Ծենի Քարեզին։ Այդ երգերը Լեֆթերիս Բաբատոբուլոսի բանաստեղծութիւններն են եւ մեծ յաջողութիւն կ՛արձանագրեն։

1964-ին ամերիկեան ABC հեռատեսիլի կայանին համար կը յօրինէ «Մելինային Յունաստանը» Η Ελλάδα της Μελίνας վաւերագրական ժապաւէնին երաժշտութիւնը (Մելինան, Մելինա Մերքուրին է)։

1965-ին կը յօրինէ «Մոտերնա Սթախթոբութա» Μοντέρνα Σταχτοπούτα ֆիլմին երաժշտութիւնը։ «Դիբլոբենիես» Διπλοπενιές ֆիլմին համար կը յօրինէ «Մաթիա վուրքոմենա» Μάτια βουρκωμένα, «Սթու Օթոնա թա խրոնիա» Στου Όθωνα τα χρόνια եւ «Մէ թի քարդիա» Με τι καρδιά երգերը․ ֆիլմը կը ներկայացուի Սան Սեպասթեան (San Sebastián International Film Festival) եւ Քանի (Festival de Cannes) փառատօներուն «Dancing The Sirtaki» տիտղոսով եւ կը ճամբորդէ մինչեւ Ճափոն, Անգլիա եւ Ֆրանսա։ Յաջորդ տարին, ձայնապնակը կը հրապարակուի անգլերէն լեզուով․ կը մեկնաբանեն Ղրիղորիս Պիթիքոցիս, Վիքի Մոսխոլիու եւ Սթամաթիս Քոքոթաս։ 1966-ին կը հրապարակուի «Ի Էլաս խորիս էրիբիա» Η Ελλάς χωρίς ερείπια ձայնապնակը, իր անտիպ երաժշտութեամբ եւ Միքիս Թէոտորաքիսին երգերով։ Մանոս Խածիտաքիսին եւ Միքիս Թէոտորաքիսին հետ կը պայքարին զինուորական բռանատիրական վարչակարգին կողմէն պարտադրուած արուեստի գրաքննադատութեան դէմ։

1968-ին կը յօրինէ «Քորիցիա սթոն իլիօ» Κορίτσια στον Ήλιο ֆիլմին երաժշտութիւնը, որ Սելանիկի Շարժապատկերի փառատօնին կը ստանայ 4 մրցանակներ, որոնցմէ մին՝ երաժշտութեան մրցանակը։ Ֆիլմը 1969-ին թեկնածու է Golden Globe Award for Best Foreign Language Film-ին։ Նոյն տարին կը հրապարակուի ռեպեթիքօ երաժշտութեան վրայ իր առաջին փորձը, Μάρκος ο δάσκαλός μας տիտղոսով, որ կը ներփակէ Մարքոս Վանվաքարիսին 12 երգերը, սակայն իր տեսանկիւնէն յօրինուած։

1972-ին Նանա Մուսխուրիին «Սբիթի մու սբիթաքի մու» Σπίτι μου σπιτάκι μου ձայնապնակին համար կը յօրինէ երաժշտութիւնը 5 երգերու, յենուած Նիքոս Կացիոսին բանաստեղծութիւններուն վրայ։ Նոյն տարին «Լիսիսթրաթի» (Արիսթոֆանեան հին կատարերգութիւն) ֆիլմին երաժշտութիւնը կը յօրինէ։

1973-ին «Ազգերու վաճառականները» Οι έμποροι των εθνών (գործ՝ Ալեքսանդրոս Բաբադիամանտիսի) հեռատեսիլի ժապաւէնաշարին, երաժշտութիւնը կը յօրինէ։ Հոն է որ առաջին անգամ կը լսուի Նիքոս Քսիլուրիսին մեկնաբանութեամբ «Իթանէ միա ֆորա» Ήτανε μία φορά երգը։ Նոյն տարին Իաքովոս Քամպանելիսին «Մեր մեծ կրկէսը»Το μεγάλο μας τσίρκο թատերականին երաժշտութիւնը կը յօրինէ։ Թատերականը Յունաստանի զինուորական բռանատիրական վարչակարգին կողմէն ապօրինի կը համարուի եւ բոլոր դերակատարները կը հալածուին։ Ժողովրդավարական կարգերու հաստատումէն ետք, 1974, Քսարխաքոս կը յօրինէ «Ուխտաւորութիւն» Προσκύνημα Բրոսքինիմա երգը։

1973-ին Բազմարուեստի համալսարանին մէջ մեկնաբանող Նիքոս Քսիլուրիսին հետ երգելով զօրավիգ կը կանգնին ուսանողներուն զինուորական բռնատիրական վարչակարգին դէմ տարած պայքարին։

1974-ին կը հրապարակուին «Նին քէ այի» Νυν και αεί ձայնապնակը․ կը մեկնաբանեն Վիքի Մոսխոլիու եւ Նիքոս Տիմիթրաթոս եւ «Սիլողի» Συλλογή ձայնապնակը Նիքոս Քսիլուրիսին մեկնաբանութեամբ։

Մղուած դասական երաժշտութեան հանդէպ ունեցած իր սէրէն, Քսարխաքոս գործեր կը յօրինէ սիմֆոնիք նուագախումբի համար․ գլխաւորներն են՝ «Քիրա Բանայիա» Κυρά-Παναγιά (1969) սիմֆոնիք բանաստեղծութիւնը, «Դաշնակի նուագահանդէս» Κοντσέρτο για πιάνο (1971), «Էնդոփսիս» Ένδοψις (1979, Եորղոս Սեֆերիսի բանաստեղծութիւն), «Յիշողութիւններ» Αναμνήσεις (1982)։

Նիու Եորքէն վերադառնալով, 1983, կը յօրինէ «Ռեպեթիքօ» ֆիլմին երաժշտութիւնը եւ կ՛արժանանայ Սելանիկի ֆիլմի փառատօնին երաժշտութեան մրցանակին։ Նոյն տարին The dark side of the Sun ժապաւէնաշարին երաժշտութիւնը կը յօրինէ (ժապաւէնաշարը BBC արտադրութիւն է եւ դարձուած է Ռոտոս կղզիին մէջ)։

1986-ին կը յօրինէ «Անուշ հայրենիք» Γλυκιά πατρίδα ֆիլմին երաժշտութիւնը։ Ֆիլմին բեմադրիչն է Միխալիս Քաքոյեանիս եւ նիւթը կը վերաբերի Չիլիին եղելութիւններուն բռնատիրական վարչակարգին ընթացքին։ Նոյն տարին մեծօ-սոբրանօ Աղնի Պալցա կը մեկնաբանէ «Շոգեկարգները որ գացին» Թա թրենա բու ֆիղան - Τα τραίνα που φύγαν երգը, որ կը ներառնուի Songs my country taught me ձայնապնակին մէջ։ Աղնի Պալցային հետ գործակցութեան իբրեւ արդիւնք, Քսարխաքոս նուագահանդէսներ կը կատարէ Աւստրիոյ, Ճափոնի, Ա․Մ․Ն․ եւ Գերմանիոյ գլխաւոր թատերասրահներուն մէջ։

1988-ին Աթէնքի «Բալաս» թատերասրահին մէջ, Քսարխաքոսին խմբավարած նուագահանդէսին կը մեկնաբանեն Եորղոս Տալարաս եւ Տիմիթրա Ղալանի, իսկ նոյն տարին կը հրապարակուի իր «Սինաւլիա» Համերգ - Συναυλία ձայնապնակը։

1989-ին, առաջին եւ վերջին անգամը կ՛ըլլայ երբ կը գործակցի Մանոս Խածիտաքիսին եւ Միքիս Թէոտորաքիսին հետ Աթէնքի Ողիմպիական Մարզադաշտին մէջ տրուած հսկայ նուագահանդէսին։ Քսարխաքոս նուագահանդէսին գրեթէ ամբողջ տեւողութեան կը խմբավարէ, իսկ Միքիս Թէոտորաքիս երգեր կը մեկնաբանէ։

1991-ին կը հրապարակուի «Թո քաթա Մարքոն» Το κατά Μάρκον իր ձայնապնակը․ բանաստեղծութիւն՝ Նիքոս Կացիոս եւ կը մեկնաբանէ Եորղոս Տալարաս։ 1994-ին, անգամ մը եւս կը գործակցի Նանա Մուսխուրիին հետ, երբ կը յօրինէ «Աղաբի ինէ զոյի» Սէրը կեանք է - Αγάπη είναι ζωή ձայնապնակին երաժշտութիւնը (երգին բանաստեղծութիւնը գրած են Նիքոս Կացիոս եւ Մանոս Խածիտաքիս)։ Նոյն տարին ռեպեթիքոյի պատմութիւնը ներկայացնող «Աման ամին» Αμαν-Αμήν թատերագրութեան երաժշտութիւնը կը յօրինէ։

1994-ին Նիու Եորքի Adelphi համալսարանի Վարդապետ (ուսումնական բարձրագոյն տիտղոս) կը հռչակուի։

1995-ին կը հիմնէ Յունական Երաժշտութեան Ազգային Նուագախումբը Κρατική Ορχήστρα Ελληνικής Μουσικής (ΚΟΕΜ) եւ կը դառնայ անոր գեղարուեստական տնօրէնը։ Այնուհետեւ կը յօրինէ անթիւ երգեր, պալէի, թատրոնի եւ ժապաւէններու երաժշտութիւններ, եւայլն։

1996-ին, Ֆրանսայի Compiegne Կայսերական թատրոնին մէջ Ֆետերիքօ Կարսիա Լորգային «LLanto por Ignacio Sanchez Mejias» ներկայացուած բանաստեղծութեան երաժշտութիւնը կը յօրինէ․ բեմադրիչն է Փիեռ Ժուրտան։ Նոյն տարին, Պերլինի Օփերային մէջ կը կատարէ նուագահանդէս, ուր կը մասնակցի Յունական Երաժշտութեան Ազգային Նուագախումբը։

1998-ին, Աթէնքի Ենադիոս Գրադարանին հետ գործակցաբար, Քսարխաքոս Նիու Եորքի Carnegie Hall սրահին մէջ կը խմբավարէ Յունական Երաժշտութեան Ազգային Նուագախումբը եւ կը ներկայացնէ«Ode Poreias- Ode for Journey» գործը։

1999-ին Իրոտու Ադիքու Օտէոնին մէջ Վասիլիս Ցիցանիսին մահուան 15-ամեակին առթիւ կը խմբավարէ «Կախարդական իրիկուններ» Νύχτες Μαγικές գործը։ Հոն, Քսարխաքոս կը ներկայացնէ 25 երգեր իր խմբանուագագրութեամբ։ Նոյն տարին, Մեթէորա ժայռին ստորոտին եւ լիալուսնի պայծառութեան տակ, Քսարխաքոս, ներշրչուած Վոլֆկանկ Ամատէուս Մոցարթին կիսաւարտ Ռեքվիէմէն կը խմբավարէ «Ռեքվիէմ-Գիշեր եւ լոյս» Ρέκβιεμ - Νύχτα και Φως նուագահանդէսը, որուն կը մասնակցին նաեւ Լիթուանիոյ Ազգային Սիմֆոնիք նուագախումբը եւ Ֆիլիբուբոլիի, Լիթուանիոյ եւ Պելկրատի երգչախումբերը։ Նուագահանդէսը Յունաստանի, Ֆրանսայի եւ Պելճիքայի գործակցութեան արդիւնքն է։

2000-ին, Իրոտու Ադիքու Օտէոնին մէջ Քսարխաքոս կը ձեռնարկէ Միքիս Թէոտորաքիսին ծննդեան 75-ամեակին առթիւ նուագահանդէսը եւ կը խմբավարէ Յունական Երաժշտութեան Պետական Նուագախումբը։ Նոյն տարին, երկու նուագահանդէսներ կը ներկայացնէ Compiegne Կայսերական թատրոնին մէջ․ առաջինին կը ներկայացնէ «Le visiteur» գործը եւ երկրորդը կը ձօնէ Միքիս Թէոտորաքիսին։

2004-ի 28րդ Ողիմպիական խաղերուն (28րդ) բացման երաժշտութիւնը կը յօրինէ «Թօ զէպէքիքօ տօը Տիա» (Το ζεϊμπέκικο του Δία) տիտղոսով։ 2005-ին եւ 2006-ին նախագահն է Հելլենական Մշակոյթի Հիմնարկութեան (HFC, յուն․՝ Ελληνικό Ίδρυμα Πολιτισμού)։ Նոյն տարին Էվրիփիտիսին «Թրոադես» հին ողբերգրութեան երաժշտութիւնը կը յօրինէ եւ գործը կը ներկայացուի Էբիդաւրոսի հին թատրոնին մէջ, եւ անկէ ետք գործը «կը ճամբորդէ» Թուրքիա եւ կը ներկայացուի Տրոյի հին թատրոնին մէջ։

2005-2006 Յունական Մշակոյթի Հիմնարկութեան վարչութեան նախագահութիւնը կը վարէ։

2006-ին կը նուագակագրէ Միքիս Թէոտորաքիսին «Էրիմիա» Ερημιά ձայնապնակը․ բանաստեղծութիւն՝ Լեֆթերիս Բաբատոբուլոս, կը մեկնաբանեն Մարիա Ֆարանտուրի եւ Մանոլիս Միցիաս։

2008-ին յաջորդաբար Աթէնքի Մեղարօ Մուսիքիս համերգասրահին մէջ եւ Փաթրասի հռոմէական թատրոնին մէջ կը խմբավարէ նուագահանդէսներ, որոնց հասոյթը կը տրամադրէ «Ի Աղաբի» Η Αγάπη բարեսիրական միութեան։

2009-ին Յունաստանի Ազգային Քնարերգակ Թատրոնին բեմէն կը ներկայացնէ «Սիրանօ եւ Ռոքսանի» իր օփերան, գործակցութեամբ Քոպիէնի (Compiègne) Կայսերական Թատրոնին։ Նոյն տարին, Իրոտու Ադիքու Օտէոնին մէջ Աղնի Պալցային հետ կը գործակցին եւ հանդէս կու գան «Հայրենիքիս երգերը» Τα τραγούδια της πατρίδας μου նուագահանդէսով։

2011, «Միասին երեխային համար» Μαζί για το παιδί բարեսիրական գործողութեան համար Յունաստանի տարածքին նուագահանդէսներ կը կատարէ, ինչպէս նաեւ Իրոտու Ադիքու Օտէոնին մէջ։ Այս նուագահանդէսներուն կը ներկայացնէ Խածիդաքիսին, Թէոտորաքիսին եւ իր երգերը։

2012-ին Թեսաղոնիկէի, Աթէնքի եւ Յունաստանի մնացեալ մեծ քաղաքներուն կը ներկայացնէ Իաքովոս Քամպանելիսին «Մեր մեծ կրկէսը» Το μεγάλο μας τσίρκο նուագահանդէսը։

2013-ին, Մելինա Մերքուրիին յիշատակին նուագահանդէս մը կը կատարէ։

2014-ին ձմեռը, «Մանա մու Էլաս» ներկայացումին ընդմէջէն Վասիլիս Ցիցանիսին յիշատակին կը ձօնէ նուագահանդէսներ Յունաստանի տարածքին, ինչպէս նաեւ Իրոտու Ադիքու Օտէոնին մէջ։ Նոյն տարին «Greece for a Lifetime» տիտղոսով նուագահանդէս կը ձեռնարկէ Նիու Եորքի Carnegie Hall սրահին մէջ, ուր երգեր կը մեկնաբանեն Սթամաթիս Քոքոթաս եւ Իրօ Սայիա։

30 Սեպտեմբեր 2014-ին Աթէնքի նշանաւոր Իրոտու Ադիքու Օտէոնին մէջ փառաւոր նուագահանդէսով, որուն տիտղոսն է «Հելլաս (Յունաստան), մայրս» կը տօնէ իր երաժշտութեան ասպարէզին յիսնամեակը։

2015-ին կը նուագագրէ Եանիս Ռիցոս բանաստեղծին «Η σονάτα του σεληνόφωτος» բանաստեղծութիւնը եւ կը ներկայացնէ զայն Իրոտու Ադիքու Օտէոնին մէջ։ Երգերը Մարիլենան կը մեկնաբանէ։

2016-ին, իր բարեսիրական գործունէութիւններու բնագրէն ներս, Քալիմարմարոյի մէջ կը ձեռնարկէ հսկայ նուագահանդէս մը։ Կը մասնակցին հանրածանօթ յոյն երգիչներ ու երգչուհիներ։

2017-ին Սիրոսի մայրաքաղաք Էրմուփոլիսին մէջ Քսարխաքոս կը հիմնէ «ΕΝ ΧΟΡΔΑΙΣ & ΟΡΓΑΝΟΙΣ» երաժշտական դպրոց Մարքոս Վամվաքարիսին յիշատակին։

2017-2018 երկամեակին, կը գործակցի Ալքիսթիս Բրոթոփսալթիսին հետ եւ նուագահանդէսներով հանդէս կու գան Յունաստանի տարածքին, ինչպէս նաեւ Իրոտու Ադիքու Օտէոնին (Աթէնք) մէջ։

2019-ին եւ 2020-ին Իրոտու Ադիքու Օտէոնին (Աթէնք) մէջ, ինչպէս նաեւ Յունաստանի տարածքին «5 λαϊκές μορφές με τρόπον εντόνως ερωτικό» նիւթով նուագահանդէսներ կը ձեռնարկէ, որոնց ընթացքին կը ներկայացնէ Վասիլիս Ցիցանիսի, Մանոս Խածիտաքիսի, Միքիս Թէոտորաքիսի եւ իր գործերէն նմուշներ։

2021-ին, Յունաստանի ազատագրութեան 200-ամեակին տօնակատարութիւններուն ընթացքին, Քսարխաքոս կը պատրաստէ եւ Իրոտու Ադիքու Օտէոնին (Աթէնք) մէջ կը ներկայացնէ նուագահանդէս մը «Թելի արեթի քէ թոլմի․․․ թօ թրաղուդի» Θέλει αρετή και τόλμη … το τραγούδι նիւթով, յարասելով Անդրէաս Քալվոս գլխաւոր բանաստեղծին խօսքերը։

2022-ին Յունաստանի տարածքին կը կատարէ նուագահանդէսներ եւ նոյն տարուան Սեպտեմբերին՝ Նիքոս Քսիլուրիսին ձօնուած նուագահանդէս մը Իրոտու Ադիքու Օտէոնին մէջ։

2023-ին Աթէնք-Էփիդաւրոս փառատօնին ծիրէն ներս Իրոտու Ադիքու Օտէոնին (Աթէնք) մէջ երկու ընկերային-քաղաքական նուգահանդէսներով հանդէս կու գայ։ Նոյն տարին Սեպտեմբերին, Իրոտու Ադիքու Օտէոնին մէջ «Ռեպեթիքօ» իր յօրինումը կը ներկայացնէ, անոր ստեղծումէն 40 տարի ետք։

Յունուար 2024-ին, Աթէնքի Մեղարօ Մուսիքիս համերգասրահին մէջ, երկու sold out նուագահանդէսներու, կը ներկայացնէ «Ռեպեթիքօ»ն։

3 եւ 5 Յունուար 2025-ին, Սիրոսին Ափոլոն թատրոնին մէջ, Քսարխաքոս երկու sold out նուագահանդէսներ կը կատարէ։ Այդ նուագահանդէսներուն ան հանդէս կու գայ Սիրոսին ΕΝ ΧΟΡΔΑΙΣ & ΟΡΓΑΝΟΙΣ երաժշտական (իր հիմնած) դպրոցին աշակերտներուն հետ։

Քաղաքական գործունէութիւն

1989-ին կ՛ընտրուի Աթէնքի քաղաքապետութեան Մշակոյթի փոխ-քաղաքապետ։ Նոյն տարին կ՛ընտրուի Յունաստանի Խորհրդարանի անդամ, սակայն պաշտօնէն կը հրաժարի 1990-ին։

2000 - 2004 կ՛ընտրուի Եւրոպական Խորհրդարանի անդամ։

Անձնական կեանք

Երեք անգամ ամուսնացած է․ 1970-ին գեղանկարիչ Մարղարիթա Պաքոբուլուին հետ, 2005-ին։ 2015-էն ի վեր ամուսնացած է երգչուհի Իրօ Սայիային հետ, որուն հետ ունին երկուորեակներ (աղջիկ մը ու մանչ մը) ծնած Նոյեմբեր 1, 2016ին։ Իսկ ամուսնութենէն դուրս զաւալ մը ունեցած է 1970-ին։

Պարգեւներ

10 Յուլիս 2024-ին, Յունաստանի Նախագահ տիկին Սաքելարոբուլու կը պարգեւատրէ Սթաւրոս Քսարխաքոն իր տարած գործունէութեան համար։

^[3] ^[4] ^[5] ^[6] ^[7] ^[8] ^[9] ^[10] ^[11] ^[12] ^[13] ^[14] ^[15] ^[16] ^[17] ^[18] ^[19] ^[20]

Ծանօթագրութիւններ

[''(unspecified_title)''<span_class="wef_low_priority_links">_—_[[:d:Q477089|Յունաստանի_Խորհրդարան]].</span><div_style="display:none"><a_href="https://wikidata.org/wiki/Track:Q477089"></a></div>-1] (unspecified title) — Յունաստանի Խորհրդարան.
<a href="https://wikidata.org/wiki/Track:Q477089"></a>

[<span_class="wikidata_cite_citetype_Q8513_citetype_Q35127"_data-entity-id="Q85301215">[[:d:Q85301215|Members_of_the_European_Parliament]],_[[:d:Q85301215|Членове_на_Европейския_парламент]],_[[:d:Q85301215|Diputados_al_Parlamento_Europeo]],_[[:d:Q85301215|Poslanci_Evropského_parlamentu]],_[[:d:Q85301215|Medlemmer_af_Europa-Parlamentet]],_[[:d:Q85301215|Mitglieder_des_Europäischen_Parlaments]],_[[:d:Q85301215|Euroopa_Parlamendi_liikmed]],_[[:d:Q85301215|Βουλευτές_του_Ευρωπαϊκού_Κοινοβουλίου]],_[[:d:Q85301215|Députés_au_Parlement_européen]],_[[:d:Q85301215|Feisirí_Pharlaimint_na_hEorpa]],_[[:d:Q85301215|Zastupnici_u_Europskom_parlamentu]],_[[:d:Q85301215|Deputati_al_Parlamento_europeo]],_[[:d:Q85301215|Eiropas_Parlamenta_deputāti]],_[[:d:Q85301215|Europos_Parlamento_nariai]],_[[:d:Q85301215|Az_Európai_Parlament_képviselői]],_[[:d:Q85301215|Il-Membri_tal-Parlament_Ewropew]],_[[:d:Q85301215|Leden_van_het_Europees_Parlement]],_[[:d:Q85301215|Posłowie_do_Parlamentu_Europejskiego]],_[[:d:Q85301215|Deputados] Members of the European Parliament, Членове на Европейския парламент, Diputados al Parlamento Europeo, Poslanci Evropského parlamentu, Medlemmer af Europa-Parlamentet, Mitglieder des Europäischen Parlaments, Euroopa Parlamendi liikmed, Βουλευτές του Ευρωπαϊκού Κοινοβουλίου, Députés au Parlement européen, Feisirí Pharlaimint na hEorpa, Zastupnici u Europskom parlamentu, Deputati al Parlamento europeo, Eiropas Parlamenta deputāti, Europos Parlamento nariai, Az Európai Parlament képviselői, Il-Membri tal-Parlament Ewropew, Leden van het Europees Parlement, Posłowie do Parlamentu Europejskiego, Deputados ao Parlamento Europeu, Deputații în Parlamentul European, Poslanci Európskeho parlamentu, Poslanci Evropskega parlamenta, Euroopan parlamentin jäsenet, Europaparlamentets ledamöter
<a href="https://wikidata.org/wiki/Track:Q85301215"></a><a href="https://wikidata.org/wiki/Track:Q109657939"></a>

[3] reekdiscography․ Սթաւրոս Քսարխաքոս(յունարէն)

[4] 85 տարի Քսարխաքոս(յունարէն)

[5] Սթաւրոս Քսարխաքոս․ Ռեօեթիքօ, 40 տարի ետք, 17-18/1/2024(յունարէն)

[6] Սթաւրոս Քսարխաքոս, պատուոյ Վարդապետ կը կոչուի(յունարէն)

[7] Յունաստանի նախագահը կը պարգեւատրէ Սթաւրոս Քսարխաքոս, 10-7-2024(յունարէն)

[8] Յունաստանի Խորհրդարան - Սթաւրոս Քսարխաքոս խորհրդարանի անդամ(յունարէն)

[9] Քսարխաքոս կ՛ամուսնանայ Իրօ Սայիային(յունարէն)

[10] Քսարխաքոս կրկին հայր կը դառնայ․ 2-11-2016(յունարէն)

[11] Սթաւրոս Քսարխաքոս կը խմբավարէ «ΕΝ ΧΟΡΔΑΙΣ & ΟΡΓΑΝΟΙΣ»(յունարէն)

[12] Քսարխաքոս Յունաստանի տարածքին նուգահանդէսներ կը կատարէ․ Էղինա կղզին, 12-10-2024(յունարէն)

[13] Քաթիմերինի․ Քսարխաքոս կը վկայէ․ «դեռ անձկութիւն ունիմ․․»(յունարէն)

[14] Սթաւրոս Քսարխաքոս կը պարգեւատրուի Յունաստանի Նախագահին կողմէն 14-7-2024(յունարէն)

[15] Քսարխաքոս Աթէնքի Իրոտու Ադիքու Օտէոնին մէջ կը ներկայացնէ Ռեպեթիքօ(յունարէն)

[16] 41 տարի ետք, քսարխաքոս Ռեպեթիքօն կը ներկայացնէ , 11-9-2024(յունարէն)

[17] Սիրոս․ Սթաւրոս Քսարխաքոս կը խմբավարէ ΕΝ ΧΟΡΔΑΙΣ & ΟΡΓΑΝΟΙΣ, 11-1-2025(յունարէն)

[18] ΕΝ ΧΟΡΔΑΙΣ & ΟΡΓΑΝΟΙΣ․ Ո՞վ ենք(յունարէն)

[19] Սթաւրոս Քսարխաքոս (անգլերէն)

[20] Քսարխաքոս Խորհրդարանի անդամ (ֆր.)

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]

[19]

[20]