Սթարպաքս
Սթարպաքսը ամերիկեան մեծ ընկերութիւն մը, որ կազմուած է սրճարաններու եւ սրճապատրաստման վաճառատուներու ցանցէ։
Անոր կեդրոնական գրասենեակը կը գտնուի Սիէթըլ, Ուաշինկթընի նահանգին մէջ։
Սթարպաքսը հիմնուած է 1971-ին՝ Ճերի Պալթուինի, Զեւ Սիկըլի եւ Կորտըն Պոուքըրի կողմէ Սիէթըլի Փայք Փլէյս Մարքէթին մէջ։
Սկիզբը, ընկերութիւնը կը զբաղէր սուրճի հատիկի վաճառքով։ Հետագային, Հաուըրտ Շուլցի ղեկավարութեամբ, անիկա կը վերածուի սրճարանի մը, ուր կը մատուցուին էսպրեսսօ ըմպելիքներ։
Շուլց կը դառնայ գործադիր տնօրէնը 1986-2000 թուականներուն եւ կ'առաջնորդէ Սթարպաքսի արագ տարածումը՝ Ամերիկայի արեւմտեան ափին վրայ[1]։
Նոյեմբեր 2022-ի տուեալներով՝ ընկերութիւնը ունէր 35,711 վաճառատուն՝ ամբողջ աշխարհի տարածքին, որոնցմէ 15,873-ը կը գտնուէր Միացեալ Նահանգներուն մէջ։
Ամերիկայի վաճառատուներուն 8,900-ը ուղղակի ընկերութեան ենթակայ էր, իսկ մնացեալները՝ արտօնագիրով։
Սթարպաքսը այսօր աշխարհի ամէնէն մեծ սրճարանային ցանցն է։ Ան տեղ գտած է «Ֆորչուն 500» ցուցակին մէջ 120-րդ դիրքով եւ «Ֆորպէս Կլոպալ 2000» ցուցակին մէջ 303-րդ դիրքով (ըստ 2022-ի վիճակագրութիւններուն)[2]։
Սթարպաքս մեծ ազդեցութիւն կ'ունենայ «սուրճի երկրորդ ալիք» կոչուած մշակոյթի տարածման մէջ։
Սթարպաքսի վաճառատուները կը մատուցեն տաք եւ պաղ ըմպելիքներ, սուրճի հատիկներ, արագ սուրճ, էսպրեսսօ, կաթնեղէն, թէյեր, հիւթեր, ֆրափուչինօ ըմպելիքներ, ինչպէս նաեւ խմորեղէն եւ նախաճաշ։ Կան նաեւ եղանակային կամ միայն որոշ շրջաններուն յատուկ առաջարկներ։
Բազմաթիւ երկիրներու մէջ վաճառատուները կը տրամադրեն նաեւ անլար համացանցի (Wi-Fi) ծառայութիւն։
Ընկերութիւնը տարիներու ընթացքին բախած է որոշ քննադատութիւններու, իր գործելաձեւերուն պատճառով։ Սակայն, միաժամանակ Սթարպաքսը ձեռք բերած է հաւատարիմ յաճախորդներ եւ արժէքաւոր վաճառանիշ[3]։