Պօղոս Շահմելիքեան

Պօղոս Շահմելիքեան;
Ծնած է	1945
Ծննդավայր	Պէյրութ, Լիբանանի Հանրապետութիւն
Մահացած է	8 Օգոստոս 2019
Մահուան վայր	Լոս Անճըլըս, Ամերիկայի Միացեալ Նահանգներ
Ազգութիւն	Հայ
Կարողութիւն	գրող
Ամուսին	Ազնիւ
Երեխաներ	Անդօ

Պօղոս Շահմելիքեան (1945 Պէյրութ, Լիբանան - 7 Օգոստոս 2019 Լոս Անճըլըս, Ամերիկայի Միացեալ Նահանգներ^[1]) Լիբանանահայ երաժիշտ, գրող, յօդուածագիր, գիրքերու հեղինակ։

Կենսագրութիւն

Պօղոս Շահմելիքեան ծնած է Պէյրութի Աշրաֆիէ թաղամասը, ապա կանուխ պատանեկութեան տարիներուն փոխադրուած են Պուրճ Համուտ: Յաճախած է Նշան Փալանճեան ճեմարան, իսկ երկրորդականի վերջին երեք տարիները՝ Մխիթարեան վարժարան, ուրկէ շրջանաւարտ եղած է:

Բացառիկ սէր ունեցած է հայ գրականութեան, առաւելաբար արեւմտեան գրականութեան, նոյն ժամանակ՝ երաժշտութեան: Ճեմարանին մէջ բախտաւոր եղած է ունենալու Մուշեղ Իշխանի եւ Գառնիկ Բանեանի նման ուսուցիչներ, որոնք իր մէջ արթնցուցած են հայ գրականութեան սէրը: Այդ մէկը նաեւ կու գայ իր ընտանիքէն: Ընթերցասէր ընտանիքի մէջ հասակ առած է:

1981ին հաստատուած է Լոս Անճելըս, ուր որոշ շրջան մը կը շարունակէ երաժշտական ասպարէզը՝ ընկերակցելով գաղութի զանազան հայ երգիչներու, իսկ աւելի ուշ, երբ ընտանիք պիտի կազմէր, որոշեց հրաժարիլ այնքան սիրած երաժշտական ասպարէզէն:

Մահացաւ 7 Օգոստոս 2019-ին Լոս Անճըլըսի մէջ^[1]։ Աւելի քան մէկ շաբաթ առաջ ենթարկուած էր սիրտի ծանր կաթուածի, որուն պատճառով փոխադրուած էր հիւանդանոցը, ուր քանի մը օրէ ի վեր մահ ու կենաց պայքար կը մղէր:

Գրական գործունէութիւն

Ան հեղինակ է երկու հատորներու` «Յիշատակներ. անցած օրեր» (հայերէնով) եւ «ճամբորդութիւն յիշողութեան մէջ»:

2012ին իր երաժշտական կեանքի յուշերը հաւաքեց հատորի մը մէջ՝ «Յիշատակներ… Անցած Օրեր» գունաւոր նկարներով հարուստ, 220 էջերէ բաղկացած իսկական գիրքի մը:

«Յիշատակներ. անցած օրեր» (հայերէնով), որուն անգլերէն թարգմանութիւնը կատարած է Ամերիկայի Օհայօ նահանգը հաստատուած Վահէ Աբելեանը:

2018ին Մեծի Տանն Կիլիկիոյ կաթողիկոսութեան «Ռիչըրտ եւ Թինա Գարօլան» հիմնադրամէն լոյս տեսած «ճամբորդութիւն յիշողութեան մէջ» հատորը, որուն գինեձօնը 13 Յունիս 2019ին տեղի ունեցաւ «Ազդակ»ի «Փիւնիկ» սրահին մէջ՝ «Ազդակ»-ի խմբագրութեան եւ Համազգայինի գիր ու գրականութեան մասնաճիւղին կազմակերպութեամբ:

Five Fingers խումբ

Five Fingers-ին Պօղոս Շահմելիքեան հետ մնացած է 12 երկար տարիներ, մինչ այդ աշխատակցած է շատ մը նուագախումբերու եւ հայ երգիչներու հետ, սակայն այդ բոլորը ժամանակաւոր էին: Ընդամէնը՝ քանի մը նուագ եւ, բնականաբար, շատ աւելի նուազ յիշատակներ ունի այդ նուագախումբերուն կամ երգիչներուն հետ:

Five Fingers-ը եղած էր իմ հիմնական խումբը, որուն վրայ այնքա՜ն քրտինք թափած եմ: Տակաւին դպրոցական պատանիներ էինք, բոլորս՝ անփորձ: Փորձած ենք միասնաբար նուաճումներ արձանագրել: Արձանագրած ենք բազմաթիւ ձայնապնակներ: Միասնաբար երգեր յօրինած ենք, միասին ճամբորդած ենք, տեսած ենք լաւ ու վատ օրեր: Յաջողութիւններու կողքին, ունեցած ենք նաեւ ձախողութիւններ: Լաւ յիշատակներու կողքին, ունեցած ենք յուսախաբութիւններ եւ դժուար օրեր: Իրարու հետ միշտ համակարծիք չենք եղած: Կռուած ու հաշտուած ենք, սակայն եղած ենք լաւ ընկերներ եւ ներկայիս, հակառակ անոր, որ աշխարհի չորս կողմը ցիր ու ցան եղած ենք, տակաւին իրարու հետ կապի մէջ ենք եւ մեր բարեկամութիւնը կը շարունակենք: Պօղոս Շահմելիքեան

Մամուլի աշխատակից

Պօղոս Շահմելիքեան «Ասպարէզ»ի եւ «Ազդակ»ի աշխատակից էր:

6 տարի անընդմէջ Պօղոս Շահմելիքեան ուրախութեամբ արտադրած, ստեղծագործած, պրպտած ու «Ազդակ»ին վստահած է իր միտքին, հոգիին ու սիրտին արգասիքները, իսկ «Ազդակ»ը իր կարելիութեան սահմաններուն մէջ, միշտ փորձած է գուրգուրանքով, բծախնդրութեամբ եւ ուշադրութեամբ վերաբերիլ հետեւողական կերպով իրեն ուղարկուած յօդուածներուն հետ, որոնք ունեցած են ընթերցողներու լայն խաւ մը, որ սիրած է գրութիւններուն նիւթերը, հեղինակին պարզ ու հաղորդական ոճը, իրական կեանքին առնչուած ըլլալը, տողերուն մէջ թաքնուած սրամտութիւնները, երգիծական ակնարկութիւնները, մարդոց ցաւերն ու հոգերը, ուրախութիւններն ու անմոռանալի պահերը, աւանդութիւններն ու կեանքը ամբողջ:

Պօղոս Շահմելիքեանի մահով կիսատ մնաց վերջերս «Ազդակ»-ի մէջ լոյս տեսնել սկսած անոր «Լիբանանեան օրագրութիւն» յօդուածաշարքը: