Պասքէթպոլ

Jump to navigation Jump to search
Rašić lays up.jpg
Պասքէթտպոլի տրիպլինկներու ցուցադրում

Պասքէթպոլ կամ Կողովագնդակ (անգլBasket-կողով եւ Ball-գնդակ բառերէ), խմբային մարզաձեւ է, որ կը մտնէ ողիմպիական խաղերու ծրագիրին մէջ։ Իրարու դէմ կը մրցին երկու խումբեր, իւրաքանչիւրին մէջ՝ 5 պասքէթպոլիստ։ Խաղին նպատակը հակառակորդ խումբի զամբիւղին մէջ գնդակը նետելն է[1]:

Պատմութիւնը[Խմբագրել | Խմբագրել աղբիւրը]

Ծագում[Խմբագրել | Խմբագրել աղբիւրը]

Խաղը հիմնադրուած է 1891-ին՝ ԱՄՆ-ու Մասաչուսէթս նահանգի Սփրինկֆիլտի քոլէճի ֆիզիքական դաստիարակութեան ուսուցիչ Ճէյմս Նէյսմիթի (1861-1939) կողմէ։ Իբրեւ դպրոցի ֆութպոլի մարզիչ, անոր տրուեցաւ յանձնարարական ստեղծել փակ դահլիճի մէջ տեղի ունեցող հետաքրքիր խաղ մը, որով ուսանողները կրնան զբաղիլ ձմրան ամիսներուն։

Նէյսմիթ ընտրեց երկու դեղձի կողովներ եւ մեխեց խաղահրապարակի պատշգամին։ Զամբիւղներու բարձրութիւնը թելադրուեցաւ պատշգամի բարձրութեամբ։ Այս բարձրութիւնը այնքան ճիշդ էր, որ անիկա երբեք չփոխուեցաւ։ Առաջին խաղերը խաղացուած են ֆութպոլի գնդակով, եւ իւրաքանչիւր նետումէ ետք գնդակը հանուած է զամբիւղի մէջէն աստիճանի օգնութեամբ։

Խաղի Առաջին Կանոնները[Խմբագրել | Խմբագրել աղբիւրը]

Խաղի առաջին կանոնները տպագրուած են «Եռանկիւնի» ամսագիրին մէջ 1892-ի Յունուարին «Նոր խաղ» վերնագիրով։

Խաղին մէջ այժմ գործող հիմնական կանոններն են.-

  • Գնդակը կրնայ երթալ ամէն ուղղութեամբ՝ մէկ կամ երկու ձեռքով։
  • Գնդակը կարելի չէ հարուածել բռունցքով։
  • Խաղացողը չի կրնար վազել գնդակով։
  • Գնդակը պէտք է պահել միայն ձեռքերու մէջ. մարմինը պէտք չէ օգտագործել։
  • Գնդակը կրնայ փոխանցել բոլոր ուղղութիւններով մէկ կամ երկու ձեռքով։
  • Միաւոր կը հաշուըուի այն ժամանակ, երբ գնդակը կը նետուի եւ կը մնայ զամբիւղի մէջ։
  • Երբ գնդակը խաղադաշտէն դուրս կու գայ, անիկա պէտք է մտցուի խաղադաշտ նոյն տեղէն հինգ վայրկեանի ընթացքին։
  • Խաղի տեւողութիւնը 4x10 վայրկեան է, եւ երկու վայրկեան ընդմիջում երկու խաղակէսերու միջեւ։
  • Խաղադաշտին մէջ գտնվող մրցավարը պէտք է պահէ խաղի հաշիվը, թէ ո՞ր խումբին պէտք է տալ գնդակը, երբ անիկա դուրս եկած է դաշտի սահմաններէն։
  • Խաղի 40 վայրկեաններու ընթացքին աւելի շատ արդիւնաւէտ նետում կատարած խումբը կը ճանչցուի յաղթող։ Հաւասարութեան պարագային կ'աւելացուի լրացուցիչ ժամանակ՝ որոշելու յաղթող կողմը։

Խաղադաշտը[Խմբագրել | Խմբագրել աղբիւրը]

Կը խաղան 28x15 մեթր չափերու հարթ, ուղղանկիւն հրապարակի վրայ, որուն խմբային կողմերուն վրայ կը գտնուին հենարաններու ամրացուած զամբիւղները։

Գնդակը[Խմբագրել | Խմբագրել աղբիւրը]

Խաղի համար օգտագործուող գնդակի շրջագիծը 75-78 սմ է, իսկ զանգուածը՝600-650 կրամ: Անիկա աւելի մեծ ու աւելի ծանր է, քան վոլիպոլի եւ ֆութպոլի գնդակները։

Խաղի Կանոնները[Խմբագրել | Խմբագրել աղբիւրը]

Խումբերէն իւրաքանչյիրը բացի մեկնարկային 5 խաղացողներէն ունի նաեւ պահեստայիններ, որոնց մարզիչները կրնան խաղահրապարակ մտցնել ցանկացած ժամանակ՝ առանց սահմանափակումներու։ Պասքէթպոլի խաղը բաղկացած է 2 խաղակէսէ, որոնցմէ իւրաքանչիւրն ալ՝ 2 քառորդէ։ Մէկ քառորդը կը տեւէ 10-12 վայրկեան, օրինակ Միացեալ Նահանգներու մէջ՝ Պասքէթպոլի Ազգային Կազմակերպութեան մէջ կը խաղան չորս 12 վայրկեաննոց քառորդներ, իսկ Եւրոպայի և աշխարհի միւս բոլոր երկիրներուն մէջ չորս 10 վայրկեաննոց քառորդներ։ Եթէ գնդակը զամբիւղ կը նետուի խաղային իրադրութենէն, ապա խումբը կը շահո 2 կէտ, վեցմեթրանոց գիծէն դուրս կատարուած նետումէն՝ 3 կէտ, իսկ տուգանային նետումէն՝ 1 կէտ։ Եթէ պասքէթպոլիստը ունի բաւականին բարձր հասակ եւ աթլեթիզմ, ապա ան կրնայ մխրճել օղակի մէջ, որ կը կոչուի տանք:

  • Գնդակը խաղի մէջ կը մտցուի եզրագիծէն։ Խումբերէն իւրաքանչիւրը կրնայ անիկա իր մօտ պահել առաւելագոյնը 24 վայրկեան։ Եթէ լրացած է 24 վայրկեանը եւ խումբը տակաւին գնդակը նետած չէ դէպի զամբիւղ, ապա անիկա կ'անցնի հակառակորդ խումբին։
  • Եթէ տուեալ խումբը անցած է մրցակիցի կիսադաշտ, ապա իրաւունք չունի ետ վերադառնալ իր սեփական կիսադաշտ, իսկ յարձակումը սկսելէ ետք պէտք է 8 վայրկեանէն աւելի չմնայ սեփական կիսադաշտին վրայ։
  • Գնդակը բռունցքով կամ ոտքով հարուածել կարելի չէ։

Պասքէթպոլիստներու Դիրքերը[Խմբագրել | Խմբագրել աղբիւրը]

  • Խաղարկող (1-ին համար), սովորաբար խումբի ամենաարագավազ պասքէթպոլիստն է, որ պէտք է ճիշդ կազմակերպէ յարձակումը եւ համոզուած ըլլայ, որ գնդակը ճիշդ ժամանակին ճիշդ մարդուն փոխանցած է։
  • Յարձակող պաշտպան (2-րդ համար), յարձակման ժամանակ կը կատարէ հեռահար նետումներ, իսկ պաշտպանութեան մէջ կը փորձէ փակել հակառակորդի լաւագոյն խաղացողը։
  • Թեթեւ յարձակող (3-րդ համար), արագ կերպով կը փորձէ կէտ ապահովել, իսկ պաշտպանութեան մէջ աշխուժօրէն կը փնտրէ անդրադարձի ու խլման կարելիութիւնները չձգել։
  • Ծանր յարձակող (4-րդ համար), կը փորձէ աւելի մօտէն կէտ բերել, իսկ պաշտպանութեան մէջ օղակի տակ կը կանգնի կամ ալ կը փորձէ հակառակորդի ծանր յարձակողը պահել։
  • Կեդրոնական (5-րդ համար), խումբի մեծագոյն եւ ամենաբարձրահասակ պասքէթպոլիստն է։ Կ'օգտագործէ իր ուժը օղակի մօտ կէտ ապահովելու համար։

Լիկաներ[Խմբագրել | Խմբագրել աղբիւրը]

Աշխարհի շատ անկիւններու մէջ այսօր կան բազմապիսի պասքէթպոլային լիկաներ։ Այնուամենայնիւ, ամէնէն յայտնի եւ ամէնէն աթլեթիկ պասքէթպոլիստներով հարուստ լիկան կը համարուի Հիւսիսային Ամերիկայի մարզական առաջնութիւններու մեծ քառեակի մաս կազմող Պասքէթպոլի Ազգային Կազմակերպութեան (անգլերէն՝ National Basketball Association, NBA

Հայաստանի մէջ կը գործէ Հայաստանի Պասքէթպոլի Ֆետերասիոնը, որ ՖԻՊԱ Եւրոպայի անդամ է։

Առողջապահութիւն[Խմբագրել | Խմբագրել աղբիւրը]

Պասքէթպոլը կը զարգացնէ եւ կ'ամրապնդէ յենաշարժողական ապարատը, կը բարձրացնէ շնչառական եւ սրտանոթային համակարգերու գործնական կարելիութիւնները, կը բարելաւէ տեսողական, շարժողական, անդաստակային վերլուծիչներու աշխատանքը, շարժումներու համաձայնեցումը, կը մեծցնէ ընդհանուր ֆիզիքական դիմացկունութիւնը, իսկ առանձնայատկութիւններու շնորհիւ անիկա մատչելի է երիտասարդներու (սովորաբար մինչեւ 36-38 տարեկան) համար։

Խաղի տարրերը կարելի է սորվեցնել 10-12 տարեկաններուն, իսկ յատուկ մարզումները կը սկսին 12-14 տարեկաններուն։ Ըստ տարիքային խումբերու (երեխաներ, պատանիներ եւ աղջիկներ), իբրեւ կանոն, մրցումներու մասնակցիլ կ'արտօնուի մշտական մարզումներէ 1-1,5 տարի ետք։ Ցած դպրոցական տարիքի երեխաներու եւ պատանիներու պարապմունքներու ընթացքին կը սահմանափակուին խաղի տեւողութիւնը, խաղահրապարակի չափերը, զամբիւղի բարձրութիւնը, գնդակի քաշը, կը կանոնակարգուի մրցումներու քանակը։

Վնասուածքներ[Խմբագրել | Խմբագրել աղբիւրը]

Ամէնէն յաճախ հանդիպող վնասուածքներէն են սալճարդը, սրունքաթաթային յօդի գերձգուածութիւնը, մատներու յօդախախտումները եւ այլն, որոնց կանխման համար նշանակութիւն ունին խաղահրապարակի ճիշդ կառուցումն ու բարեկարգ պահելը, խաղի կանոններու պահպանումը, ծնկակապերը եւ առանց կրունկի (աւելի յարմար է ռետինէ ներբաններով) կօշիկները։ Պասքէթպոլի պարապմունքներու ժամանակ անհրաժեշտ է բժշկական հսկողութիւն։ Խաղի տարբերակները (գնդակը զամբիւղ նետելը եւ այլն) կ'օգտագործուին բուժական ֆիզիքական բաժինին մէջ:

Ծանօթագրութիւններ[Խմբագրել | Խմբագրել աղբիւրը]

  1. Մ. Իսպիրյան, Մարզանունների բացատրական բառարան, Երևան, «Հայաստան», 1984, էջ 21

Արտաքին Յղումներ[Խմբագրել | Խմբագրել աղբիւրը]