Մարիամ Ծաղիկեան (Գումբասեան)

Մարիամ Ծաղիկեան
Ծնած է	1831
Ծննդավայր	Պոլիս, Օսմանեան Կայսրութիւն
Մահացած է	1909
Քաղաքացիութիւն	Օսմանեան Կայսրութիւն
Մայրենի լեզու	հայերէն
Մասնագիտութիւն	դերասանուհի

Մարիամ Ծաղիկեան (Գումբասեան,1831, Պոլիս, Օսմանեան Կայսրութիւն - 1909), հայ դերասանուհի։

Կենսագրութիւն

Մարիամ Ծաղիկեան (Գումբասեան) ծնած է Պոլիս: Հօր անունն է Գալուստ: Ան առաջին անգամ բեմ կը բարձրանայ 1861-ին: Մարիամ միջակ կարողութեամբ դերասանուհի էր։ Ան փնտռուած դերասանուհի էր, ո՛չ թէ իր տաղանդին համար, այլ դերասանուհիներու հազուագիտ ըլլալուն պատճառով:

Արեւելեան թատրոնի ու Նաումի բեմերուն վրայ ծաղկելէ ետք, ան կը մասնակցի Վարդովեանի խումբին, ստանձնելով մայրական դերեր: Կ'ամուսնանայ Յովհաննէս Պիլէզիքեան-Գումբասեանի հետ ու կ'ունենան դուստր մը (Վերգինէ) եւ մանչ մը (Գրիգոր-Սանատրուկ), որ իր մօր կենսագրութիւնը գրքոյկով մը կը հրատարակէ, ձգտելով ի յայտ բերել մօրը տաղանդը:

Մարիամ Ծաղիկեան սկզբնական շրջանին կը ստանձնէ գլխաւոր դերեր: Գովեստի արժանի է իր յանդգնութիւնը: Այդ օրերուն անտեսելով հասարակութեան կարծիքը բեմ կը բարձրանայ, որպէս դերասանուհի մասնակցելով շարք մը ներկայացումներու: Իր լաւագոյն դերը եղած է Մատամ Պէրնիէն, «Փարիզու Աղքատները» թատերախաղին մէջ:

Մարիամ Ծաղիկեան Հայաստանեայց Եկեղեցւոյ պատկանող առաջին հայուհին եղած է, նկատի ունենալով որ հայ թատրոնի առաջին գործիչները իր օրերուն եղած են հայ կաթողիկէները:

Ան ծերութեան տարիքին կը քաշուի բեմէն: Կը մահանայ 1909-ին Կոստանդնուպոլիս: Իր աղջիկը՝ Վերգինէ Ծաղիկեան, որ կինն էր Գաբրիէլ Թոքաթլեանի, առաջին անգամ բեմ կը բարձրանայ 1875-ին, ստանձնելով փոքր դերեր:

Աղբիւրներ

• «Թատերական Դէմքեր», Նշան Պէշիկթաշլեան, 1969 Անթիլիաս, էջ 1091-1092։