Ղազախական ԽՍՀ դրօշ

Ղազախական ԽՍՀ դրօշ
Տեսակ	երկրի շրջանի դրօշ
Իրաւասութեան տարածք	Ղազախական ԽՍՀ
Յարաբերութիւն	2:1
Ընդունուած է	24 Յունուար 1953

Ղազախական ԽՍՀ-ի դրօշ, 1937 թուականի Սահմանադրութեամբ հաստատուեցաւ Ղազախական ԽՍՀ-ի պետական դրօշը։ Ան կարմիր գոյնի դրօշ մըն էր՝ 2։1 երկարութիւն-լայնութիւն յարաբերակցութեամբ։ Դրօշաձողին մօտ գտնուող վերին ձախ անկիւնին մէջ պատկերուած էին ոսկեգոյն մուրճն ու մանգաղը, իսկ անոնց կողքին ոսկեգոյն տառերով գրուած էր «Ղազախական ԽՍՀ»^[1]։ Սկզբնական շրջանին գրութիւնը կատարուած էր ղազախերէնի լատինատառ այբուբենով։

10 Նոյեմբեր 1940 թուականին, ղազախերէնի այբուբենին՝ կիրիլեան գրի անցնելէն ետք, դրօշին վրայի գրութիւնը համապատասխանաբար փոփոխուեցաւ^[1]։

24 Յունուար 1953-ին, Ղազախական ԽՍՀ Գերագոյն խորհուրդի նախագահութեան հրամանագրով հաստատուեցաւ նոր պետական դրօշը։ Ան եւս կարմիր գոյնի էր՝ 2։1 երկարութիւն-լայնութիւն յարաբերակցութեամբ։ Վերին ձախ անկիւնին մէջ պատկերուած էին ոսկեգոյն մուրճն ու մանգաղը, որոնց վերեւ կը գտնուէր ոսկեգոյն եզրագիծով կարմիր հնգաթեւ աստղ մը։ Դրօշին ստորին բաժինով կ՚անցնէր բաց կապոյտ հորիզոնական շերտ մը, որուն լայնութիւնը կը կազմէր դրօշին ընդհանուր լայնութեան 2/9-ը։ Շերտը տեղադրուած էր այնպէս, որ դրօշին ստորին եզրէն կը բաժնուէր դրօշին լայնութեան 1/9-ին հաւասար կարմիր գօտիով^[1]։