Հրաչուհի Փալանդուզեան

Հրաչուհի Փալանդուզեան
Ծնած է	20 Նոյեմբեր 1951(1951-11-20)
Ծննդավայր	Վարդենիսի շրջան, Հայաստանի Խորհրդային Ընկերվարական Հանրապետութիւն, Խորհրդային Միութիւն
Մահացած է	16 Օգոստոս 2022(2022-08-16) (70 տարեկանին)
Քաղաքացիութիւն	Խորհրդային Միութիւն և  Հայաստան
Ուսումնավայր	Երեւանի Պետական Համալսարան
Մասնագիտութիւն	լրագրող, Խմբագիր և արձակագիր

Հրաչուհի Փալանդուզեան (20 Նոյեմբեր 1951(1951-11-20), Վարդենիսի շրջան, Հայաստանի Խորհրդային Ընկերվարական Հանրապետութիւն, Խորհրդային Միութիւն - 16 Օգոստոս 2022(2022-08-16)), հայ արձակագիր, հրապարակախօս, լրագրող եւ խմբագիր։

Կենսագրական գիծեր

Ծնած է Վարդենիս: 1975-ին աւարտած է Երեւանի պետական համալսարանի բանասիրութեան բաժանմունքի լրագրութեան բաժինը:

Մասնագիտական աշխատանքը սկսած է շրջանային «Այգաբաց» թերթին մէջ (1976-77), ուր հեղինակած է ակնարկներու եւ հրապարակախօսական յօդուածներու բազմաթիւ շարքեր:

Գործունէութիւն

1977 թուականին ընդունուած է Հայկական ձայնասփիւռի սփիւռքի համար հաղորդումներու խմբագրութիւն` վարելով Հայ դատին, Հայոց ցեղասպանութեան, Հայաստան-սփիւռք կապերուն, համազգային այլ հիմնահարցերու վերաբերող հարիւրաւոր հաղորդումներ:

1992-1994 թուականներուն ղեկավարած է «Հանրապետութեան ձայն» ռատիոգործակալութեան հասարակական-քաղաքական բաժինները` ուղիղ եթերով վարելով «Քաղաքական դիմանկար», «Արցախի ժամ» եւ այլ հանրաճանաչ հաղորդաշարերը:

1994-ին ձայնասփիւռէն հեռանալով` աշխատանքի անցած է մամուլի մէջ` «Առաւօտ» օրաթերթ, «Բումերանգ» շաբաթաթերթ, «Երկիր» օրաթերթ:

1998-ին հրաւիրուած է Ռազմավարական եւ ազգային հետազօտութիւններու հայկական կեդրոն` իբրեւ այդ կեդրոնի եւ «Հայեացք Երեւանից» հանդէսի խմբագիր: Մինչեւ 2005 թուականը աշխատակցելով կառոյցին` գրած է տասնեակ յօդուածներ եւ վարած է հարցազրոյցներ, խմբագրած է հայագիտական, քաղաքական, տնտեսագիտական, ընկերային բնոյթի շարք մը մենագրութիւններ, տարեգիրքեր եւ «Տասնամեայ հանրագումար» մեծածաւալ ժողովածուն:

Ան գրած է շարք մը գիրքեր, որոնցմէ է «Քառակուսի գնդակ» քաղաքական վէպը:

2005-2006 թուականներուն աշխատած է Հայաստանի մշակոյթի եւ երիտասարդութեան հարցերու նախարարութեան մէջ` իբրեւ նախարարի խորհրդական:

2007-2013 թուականներուն աշխատած է «Հայաստանի Զրուցակից» երկլեզու շաբաթաթերթին մէջ` իբրեւ հայերէնի բաժինի խմբագիր:

Համագործակցած է Երեւանի պետական համալսարանի դասախօսներուն հիմնած «Ազգային գիտակցութիւն» ակումբին հետ:

2014-ին «Հայաստանի Հանրապետութիւն» օրաթերթը տպագրած է Փալանդուզեանի «Հայեցի հայերէն» յօդուածաշարը` կազմուած լեզուաոճական շուրջ 300 շտկումէ:

Փալանդուզեանի ստեղծագործական կեանքին մէջ առանձնայատուկ տեղ կը գրաւէ Հայոց ցեղասպանութեան թեման, որ բիւրեղացած է բազմաթիւ եղեռնապուրծ հայերու հետ հարցազրոյցներու, ինչպէս նաեւ Ռազմավարական եւ ազգային հետազօտութիւններու հայկական կեդրոնին մէջ վերծանած հարիւրաւոր ձայնագրութիւններու շնորհիւ:

Հայոց մեծագոյն ողբերգութեան եւ պահանջատիրութեան նուիրուած են`

• «Հարսնատես» վէպը,
• «Նոյեմ հարսի դաշոյնը»,
• «Անդրանիկ զօրավարի դիմանկարը»,
• «Վայրի սէր»,
• «Հին ձայնագրութիւն» եւ այլ պատմուածքներ:

Հեղինակին նախասիրութիւններէն մէկնը եղած է նաեւ գրել ասոյթներ, որոնց թիւը անցած է 4 հազարը:

Փալանդուզեան իր կեանքի վերջին շրջանին չէ աշխատած, զբաղած է միայն գրական եւ խմբագրական աշխատանքով: