Հայկազուն Նաճարեան
| Հայկազուն Նաճարեան | |
|---|---|
| Ծնած է | 1952 |
| Ծննդավայր | Հալէպ, Սուրիա |
| Մասնագիտութիւն | արքեպիսկոպոս |
Հայկազուն Արք․ Նաճարեան (աւազանի անունով՝ Վրէժ, 1952, Հալէպ, Սուրիա), Հայ արքեպիսկոպոս։
Կենսագրական գիծեր
[Խմբագրել | Խմբագրել աղբիւրը]Ծնած է Հալէպ։ 1959-1964 թուականներուն յաճախած է Պէյրութի Վահան Թէքէեան վարժարանը, 1964-1967 թուականներուն՝ Պէյրութի ՀԲԸՄ-ի Յովակիմեան-Մանուկեան միջնակարգ դպրոցը: 1967 թուականին ընդունուած է Մայր Աթոռ Սուրբ Էջմիածնի Գէորգեան հոգեւոր ճեմարան, զոր աւարտած է 1973 թուականին: Նոյն տարին Գէորգեան ճեմարանին մէջ պաշտպանած է «Մխիթար Գօշ. Մեկնութիւն Երեմիա մարգարէի» նիւթով աւարտաճառը: Այնուհետեւ 1973-ին Ս. Էջմիածնի մէջ՝ ձեռամբ Տ. Յուսիկ Արք. Սանթուրեանի, ձեռնադրուած է սարկաւագ, իսկ 1975-ին՝ Լոնտոնի Ս. Սարգիս եկեղեցւոյ մէջ ձեռնադրուած է կուսակրօն քահանայ՝ ձեռամբ Տ. Ներսէս Արք. Պոզապալեանի:
1973-1974 թուականներուն պաշտօնավարած է Մայր Աթոռ Ս. Էջմիածնի մէջ՝ իբրեւ կաթողիկոսարանի քարտուղար:
1974-1975 թուականներուն ուսանած է Քենթըրպըրիի Ս. Օգոստինոսի դպրոցը՝ Հովուական աստուածաբանութիւն, 1975-1978 թուականներուն՝ Լոնտոնի Քինկզ քոլէճի մէջ՝ ստանալով Պսակաւոր աստուածաբանութեան (BD) աստիճան:
1978-1979 ուսանած է Սկովտիոյ Ս. Անտրիւզի անուան հիմնարկին մէջ:
1979-1981 թուականներուն եղած է Լոնտոնի Ս. Պետրոս եկեղեցւոյ հոգեւոր հովիւը, իսկ 1981-1986 թուականներուն պաշտօնավարած է իբրեւ Գէորգեան Հոգեւոր ճեմարանի փոխտեսուչ եւ Նոր կտակարանի ու Ընդհանուր եկեղեցւոյ պատմութեան դասախօս:
1983 թուականին «Վանական շարժման սկզբնաւորութիւնը Հայաստանի մէջ» նիւթով պաշտպանած է վարդապետական թէզ եւ Օշականի մէջ ստացած վարդապետական գաւազան՝ ձեռամբ Տ. Ներսէս Արք. Պոզապալեանի:
1986 թուականին «Ս. Բարսեղ Կեսարացիի կանոնները» նիւթով պաշտպանած է ծայրագոյն վարդապետութեան թէզ եւ նոյն թուականին՝ ձեռամբ Տ. Ներսէս Արք. Պոզապալեանի, Օշականի մէջ ստացած է գաւազան:
1986-1988 թուականերուն երջանկայիշատակ Գարեգին Ա. Ամենայն Հայոց Կաթողիկոսի տնօրինութեամբ նշանակուած է ԱՄՆ-ի Արեւելեան թեմի առաջնորդական փոխանորդ, 1988-1991 թուականներուն՝ Նիւ Ճըրզիի Ս. Ստեփանոս եկեղեցւոյ հոգեւոր հովիւ, իսկ 1991-1995 թուականներուն՝ կրկին ԱՄՆ-ի Արեւելեան թեմի առաջնորդական փոխանորդ:
1992 թուականին ընդունուած է Քոլոմպիայի համալսարան եւ Պատմութեան մագիստրոսի (MA) աստիճանով աւարտած՝ 1993 թուականին:
1995-1999 թուականներուն Ն.Ս.Օ.Տ.Տ. Գարեգին Ա. Ծայրագոյն Պատրիարք եւ Ամենայն Հայոց Կաթողիկոսի տնօրինութեամբ ստանձնած է Գէորգեան հոգեւոր ճեմարանի տեսուչի պաշտօնը, դասաւանդած՝ Նոր կտակարան:
2000-2002 թուականներուն եղած է Տալլասի Ս. Սարգիս եկեղեցւոյ հոգեւոր հովիւ, իսկ 2002-2007 թուականներուն Ֆիլատելֆիոյ Ս. Սահակ-Ս. Մեսրոպ եկեղեցւոյ հոգեւոր հովիւ:
2002-2010 թուականներուն պաշտօնավարած է իբրեւ ԱՄՆ-ի Արեւելեան թեմի առաջնորդական փոխանորդ, այնուհետեւ 2010 թուականին նշանակուած է Կեդրոնական Եւրոպայի[1] եւ Շուէտի հայրապետական պատուիրակ:
2011 թուականի Նոյեմբերի 6-ին Գարեգին Բ. Ամենայն Հայոց Կաթողիկոսի ձեռամբ ձեռնադրուած է եպիսկոպոս[2]:
2019 թուականին, Ամենայն Հայոց կաթողիկոս Գարեգին Բ.-ի Սիտնի եւ Մելպուռն այցելութեան կատարած ատեն, արքութեան տիտղոս շնորհած է Աւստրալիոյ եւ Նոր Զելանտայի առաջնորդ Հայկազուն եպս. Նաճարեանին` զայն վերանուանելով «Բարձրաշնորհ Տէր Հայկազուն Արքեպիսկոպոս Նաճարեան»: [3]
Ծանօթագրութիւններ
[Խմբագրել | Խմբագրել աղբիւրը]- ↑ «Հաղորդագրութիւն. Նիւ Սաութ Ուէյլզի Էքիւմէնիք Խորհուրդը(ՆՍՈԷՔ) Կը Ճանչ»։ Aztag Daily - Ազդակ Օրաթերթ (Armenian Daily Newspaper based in Lebanon) (en-US)։ 2020-04-29։ արտագրուած է՝ 2025-01-16
- ↑ «Տ. ՀԱՅԿԱԶՈՒՆ ԵՊՍԿ. ՆԱՃԱՐԵԱՆ. «ԵԹԷ ԾՆՈՂՔԸ ԻՐ ԲԱՐՁՐՈՒԹԵԱՆ ԳԻՏԱԿՑՈՒԹԵԱՆ ՎՐԱՅ ՉԷ, ԲՆԱԿԱՆԱԲԱՐ ԶԱՒԱԿԸ ՕՏԱՐ ՄԻՋԱՎԱՅՐԻ ՄԷՋ ԿԸ ՄՆԱՅ ԵՒ Կ՚ՕՏԱՐԱՆԱՅ»»։ www.jamanak.com։ արտագրուած է՝ 2025-01-16
- ↑ «Գաղութէ Գաղութ»։ Aztag Daily - Ազդակ Օրաթերթ (Armenian Daily Newspaper based in Lebanon) (en-US)։ 2019-03-07։ արտագրուած է՝ 2025-01-16