Բերանի խոռոչ

Բերան, մարսողական ուղիին սկզբնական բաժինը, որուն միջոցով մարմինին մէջ մուտք կը գործեն ուտելիք-կերակուր, հեղուկ-ջուր, օդ եւ տեսակաւոր օտար մարմիններ։

Բնական պայմաններու մէջ, օդը կ'ուղղուի դէպի խռչափող (larynx), շնչափող (trachea), ապա թոքեր:

Ուտելիքները եւ հեղուկները կ'ուղղուին դէպի ըմբան (pharynx), որկոր (esophagus), ապա ստամոքս, իսկ օտար մարմիններ կրնան ուղղուիլ երկու ուղղութեամբ ալ։

Բերանը անմիջական կապակցութեան մէջ է շրջապատին հետ, որովհետեւ շրթունքները բաց են. անիկա կը բացուի դէպի որկոր՝ ըմբանի միջոցով. քիմքը (palate) իր ոսկրային եւ մկանային բաժիններով կը կազմէ բերանի վերի պատը եւ կամ առաստաղը, լեզուն եւ ծնօտը (mandible) կը կազմեն անոր վարի պատը եւ կամ ստորոտը, իսկ այտերու մկանները եւ անոնց մակերեսային թաղանթը կը կազմեն բերանի երկու կողմի պատերը։

Ամբողջ բերանը ծածկուած է խլնաթաղանթով (mucosa) մը, որ հարուստ է մանր լորձնքաբեր գեղձերով։

Բերանին մաս կը կազմեն՝ լեզուն, լինտերը, ատամները, շրթունքները, նշիկները (tonsil) եւ ենթալեզուային լորձնքային գեղձերը (sublingual glands)։

Բերանի միջոցով մարդիկ կ'ուտեն, կը ծամեն, կը կլլեն, կը շնչեն, կը խօսին եւ կ'երգեն։

Խօսիլ բերանի հիւանդութիւններու մասին՝ կը նշանակէ խօսիլ շրթունքներու, քիմքի, լինտերու, ատամներու, լեզուի, բերանի խլնաթաղանթի եւ ենթալորձնքաբեր գեղձերու հիւանդութիւններու մասին։