«Քելվըն Քլայն»
Քելվըն Քլայն, (Calvin Klein Inc.) ամերիկեան նորաձեւութեան ընկերութիւն մը, որ աշխարհի տարբեր երկիրներու մէջ կը վաճառէ իր անունը կրող արտադրանքները։
Ընկերութիւնը յատկապէս համբաւ ձեռք բերած է 1980-ականներուն՝ իր ներքնազգեստի եւ ճինզի հաւաքածոներուն շնորհիւ։
Անիկա մասնագիտացած է բոլոր սեռերու եւ տարիքային խումբերու համար նախատեսուած հագուստի, ինչպէս նաեւ կաշիէ արտադրանքներու, կենցաղային եւ կենսակերպի պարագաներու, կօշիկներու, տան կահաւորման իրերու, օծանելիքի եւ դիմայարդարման արտադրանքներու, ակնոցներու, զարդեղէնի եւ ժամացոյցներու արտադրութեան եւ վաճառքի մէջ։
Ընկերութեան բարձրակարգ բեմահարթակային նորաձեւութեան բաժինը, որ կը ներկայացնէր Քելվըն Քլայնի ենթանիշներուն ամէնէն բարձր մակարդակը, գործելէ կը դադրի 2019-ին[1]։
Ընկերութիւնը հիմնադրուած է 1968-ին՝ նորաձեւութեան ձեւաւորող Քելվըն Քլայնի եւ իր մանկութեան բարեկամ Պերի Ք. Շուըրցի կողմէ։
2003-ին ընկերութիւնը «PVH Corp.»ի կողմէ կը գնուի 700 միլիոն տոլարով։
Ընկերութեան կեդրոնատեղին կը գտնուի Նիւ Եորքի Միտթաուն Մենհեթըն շրջանին մէջ։
Այսօր անիկա աշխարհի զանազան շուկաներուն մէջ ունի մանրածախ եւ առեւտրական վաճառքներու նշանակալի բաժին[2]։
2013-ին, «PVH» կը գնէ Քելվըն Քլայնի մեծագոյն արտօնագրատէրերէն՝ «Warnaco Group» ընկերութիւնը՝ 2,8 միլիառ տոլարով։ Այս գործարքը կը միաւորէ Քելվըն Քլայնի պաշտօնական հագուստի, ներքնազգեստի, ճինզի եւ մարզական հագուստի շարքերը։ 2022-ին Քելվըն Քլայնի վաճառանիշին ներքոյ ամբողջ աշխարհի մէջ արձանագրուած մանրածախ վաճառքներու ընդհանուր գումարը, ներառեալ արտօնագրատէրերու վաճառքները, կը հասնին 9,3 միլիառ տոլարի։
Պատմութիւն
[Խմբագրել | Խմբագրել աղբիւրը]Վաղ տարիներ
[Խմբագրել | Խմբագրել աղբիւրը]Քելվըն Քլայն մեծցած էր Պրոնքսի հրեական համայնքին մէջ եւ եղած էր այդ համայնքէն սերած նորաձեւութեան քանի մը յառաջատար ձեւաւորողներէն մէկը։ Անոնց շարքին կը գտնուէին նաեւ Ռոպըրթ Տեննինկ եւ Ռալֆ Լորեն։ Քլայն հետագային կը դառնայ Պարոն տը Կիւնցպուրկի հովանաւորեալը[3][4]։
1968-ին Քլայն 10,000 տոլար սկզբնական գումարով Նիւ Եորք Պանդոկին (York Hotel) մէջ կը հիմնէ «Calvin Klein Limited» ընկերութիւնը՝ վերարկուներու խանութ մը։
Քելվըն Քլայնի առաջին հաւաքածոն կը բաղկանար երիտասարդական ոճով, պարզ եւ զուսպ վերարկուներէ եւ զգեստներէ, որոնք կը ներկայացուին Նիւ Եորքի «Պոնուիթ Թելլըր» (Bonwit Teller) վաճառատան մէջ։
Սեպտեմբեր 1969-ին Քլայն կը ներկայանայ «Վոկ» (Vogue) ամսագիրի կողքին[5]։
1970-ականներ
[Խմբագրել | Խմբագրել աղբիւրը]1973-ին, Քլայն կը ստանայ իր առաջին «Ամերիկեան նորաձեւութեան քննադատներու Քոթի մրցանակ»ը (Coty American Fashion Critics’ Award)՝ կանանց հագուստի 74 կտորէ բաղկացած հաւաքածոյին համար։ Այդ օրերուն, ան մրցանակը ստացող ամէնէն երիտասարդ ձեւաւորողն էր։ Քլայն մրցանակին կրկին կ’արժանանայ 1974-ին եւ 1975-ին։
1977-ին ընկերութեան տարեկան եկամուտը բարձրացած էր 30 միլիոն տոլարի։ Քլայն արտօնագիրեր ունէր փողկապերու (վզկապերու), կօշիկներու, գօտիներու, արեւային ակնոցներու եւ անկողինի սաւաններու համար։ Քլայն եւ Շուըրց իւրաքանչիւրը տարեկան 4 միլիոն տոլար կը վաստկէին[6]։
Ընկերութիւնը դիմայարդարման արտադրանքներու, ճինզերու եւ տղամարդոց հագուստի ոլորտներ մտնելէ ետք՝ Քլայնի տարեկան մանրածախ վաճառքի ծաւալը գնահատուած էր 100 միլիոն տոլար։
1978-ին Քլայն կը յայտարարէ, թէ շուկային մէջ իր հանրայայտ ճինզերէն առաջին շաբթուան ընթացքին վաճառուած էր 200,000 զոյգ։
1981-ին «Fortune» ամսագիրը Քլայնի տարեկան եկամուտը կը գնահատէ 8,5 միլիոն տոլար։
1970-ականներու կէսերուն Քլայն նորաձեւութեան մէջ ստեղծած էր ձեւաւորողական ճինզերու նոր ոճ մը՝ իր անունը ետեւի գրպանին վրայ զետեղելով։ Այդ օրերուն, իր ձեւաւորման օգնականը՝ Ճեֆրի Պենքս, յայտնած է, որ նշանակը հագուստներու վրայ օգտագործելու գաղափարին մէջ ինք դեր ունեցած է։ Ան Քլայնին նուիրած էր շագանակագոյն շապիկ մը, որուն թեւին վրայ նշանակը դրուած էր տպագրական յատուկ եղանակով։ Շուըրց ենթադրած էր, թէ այդ նուէրը նոր հաւաքածոյի մը մաս կը կազմէ, եւ նմանատիպ նշանակով շապիկներ դարձած էին Քլայնի յաջորդ նորաձեւութեան ցուցադրութեան աշխատակիցներուն համազգեստը։ Այս հանգամանքը կը յառաջացնէ գնորդներու հետաքրքրութիւնը եւ պահանջքը։
1980-ականներ
[Խմբագրել | Խմբագրել աղբիւրը]Քելվըն Քլայնի գործունէութիւնը էական փոփոխութիւն կը բերէ ամերիկեան տղամարդոց ներքնազգեստի շուկային մէջ։ Նախապէս տղամարդոց ներքնազգեստը մեծ մասամբ ճերմակ էր եւ սովորաբար երեքական զոյգով կը գնուէր՝ կիներու, մայրերու կամ ընկերուհիներու կողմէ։ Քլայնի վաճառանիշը կը նպաստէ այնպիսի մշակոյթի մը ձեւաւորման, ուր տղամարդիկ կը սկսին կարեւորութիւն տալ իրենց ներքնազգեստի վաճառանիշին, նոյնիսկ եթէ զայն ուրիշները չէին տեսներ։
1990-ականներ
[Խմբագրել | Խմբագրել աղբիւրը]
Հակառակ անոր, որ ընկերութիւնը 1992-ին գրեթէ սնանկացման եզրին հասած էր, Քելվըն Քլայն կը յաջողի 1990-ականներու երկրորդ կէսին վերականգնել եւ մեծապէս բարձրացնել իր կայսրութեան շահութաբերութիւնը։ Այս յաջողութեան հիմնական աղբիւրներն էին մեծ ժողովրդականութիւն վայելող ներքնազգեստի եւ օծանելիքի շարքերը, ինչպէս նաեւ «ck» մարզական հագուստի շարքը։
1990-1995 թուականներուն Ճոն Վարվաթոս Քելվըն Քլայնի տղամարդոց հագուստի գլխաւոր ձեւաւորողն էր։ Ան առաջնակարգ դեր կ'ունենայ տղամարդոց ներքնազգեստի նոր տեսակ մը՝ «boxer briefs»ը, զարգացնելու մէջ։
1992-ին Մարք Ուոլպըրկի մասնակցութեամբ տպագիր գովազդներու շարք մը մեծապէս հանրածանօթ կը դարձնէ այս նոր տեսակի ներքնազգեստը, որ հետագային կը կոչուի դարու հագուստի ամէնէն մեծ յեղափոխութիւններէն մէկը։
2000-ականներ
[Խմբագրել | Խմբագրել աղբիւրը]
2002-էն մինչեւ Դեկտեմբերի կէսերուն, «Calvin Klein Inc.»ը կը վաճառուի Ֆիլիփս Վան Հոսեն ընկերութեան (Phillips Van Heusen Corp.)։
Գործարքը կը ներառէր շուրջ 400 միլիոն տոլար կանխիկ գումար, 30 միլիոն տոլարի բաժնետոմսեր, ինչպէս նաեւ արտօնագրային իրաւունքներ եւ յաջորդ 15 տարիներու եկամուտներուն կապուած վարձատրութիւններ, որոնց ընդհանուր արժէքը գնահատուած էր 200-300 միլիոն տոլար։
«PVH» կը գերազանցէ «VF Corp.»ի առաջարկը։ Վերճինզ հետաքրքրուած էր Քելվըն Քլայնի ճինզերու, ներքնազգեստի եւ լողազգեստի գործառնութիւններով, որոնք 1997-էն ի վեր կը վերահսկուէին «Warnaco Group»ի կողմէ[7]։
«PVH»ի հետ կնքուած գործարքը չէր ներառեր այս բաժինները, որոնք կը շարունակեն մնալ «Warnaco»ի վերահսկողութեան տակ։ Սակայն ձեռքբերումներու եւ արտօնագրային համաձայնութիւններու պարտքերու պատճառով, ինչպէս նաեւ Քելվըն Քլայնի հետ ունեցած դատական վէճի հետեւանքով ստեղծուած բացասական հրապարակայնութեան պատճառով, «Warnaco 2001»ի կէսերուն կը դիմէ սնանկացման օրէնքի 11-րդ գլուխով պաշտպանութեան։ Ընկերութիւնը, սակայն Փետրուար 2003-ին դուրս կու գայ սնանկութեան կարգավիճակէն։
Քելվըն Քլայնի եւ «PVH»-ի գործարքը նիւթապէս կ'օժանդակուի «Apax Partners Inc.» ներդրումային ընկերութեան կողմէ։ Վերճինզ «PVH»ի մէջ կը կատարէ 250 միլիոն տոլարի ներդրում՝ փոխարկելի արտօնեալ բաժնետոմսերու ձեւով, ինչպէս նաեւ կը տրամադրէ 125 միլիոն տոլարի երկու տարուան ապահովուած փոխառութիւն։
Քելվըն Քլայնը ձեռք բերելէ ետք՝ Ֆիլիփս Վան Հէօսէն (Phillips Van Heusen) կը յայտարարէ Ռալֆ Լորենի (Ralph Lauren) հաւաքածոներուն մրցակից տղամարդոց նոր մարզական հագուստի շարքի մը ստեղծման ծրագիրին մասին։ Այս շարքը պիտի արտադրէր Վան Հէօսէնը։
Ըստ 2010-ի զեկոյցի մը ՝ «PVH», որ կը կառավարէ Քելվըն Քլայնի հագուստի գործունէութիւնը, Քելվըն Քլայնի արտադրանքներու վաճառքը գնահատած էր 5 միլիառ տոլարէ աւելի։
Փետրուար 2013-ին «Warnaco Group»ը 2,8 միլիառ տոլարով ձեռք կը բերուի «PVH»ի կողմէ։ Այսպիսով կը միաւորուին Քելվըն Քլայնի պաշտօնական հագուստի, ներքնազգեստի, ճինզի եւ մարզական հագուստի շարքերը։
2020-ին «PVH» կը յայտարարէ, որ անասուններու բարեկեցութեան իր քաղաքականութեան ծիրէն ներս ընկերութիւնը չի գործածեր անասուններու մորթեր եւ Քելվըն Քլայնի հաւաքածոներուն մէջ եւս պիտի արգիլէ անոնց գործածութիւնը։
2025-ի գործունէութիւնները
[Խմբագրել | Խմբագրել աղբիւրը]2025-ին, Քելվըն Քլայնի արտադրանքներու համաշխարհային մանրածախ վաճառքի ծաւալը հասած է մօտաւորապէս 9 միլիառ տոլարի։ Նոյն տարուան ընթացքին վաճառանիշին եկամուտը նախորդ տարուան համեմատ աճած է 3 տոկոսով[8]:
2025-ին Քելվըն Քլայնի ղեկավարութեան կազմին մէջ փոփոխութիւն մը տեղի կ'ունենայ։ Տէյվիտ Սաւմա կը նշանակուի վաճառանիշին համաշխարհային նախագահը՝ այդ պաշտօնին մէջ փոխարինելով Եւա Սերրանոն։ Ան նոր պաշտօնին զուգահեռ կը շարունակէ իր պատասխանատուութիւնները «PVH»ի մատակարարման շղթայի եւ գործառնութիւններու ոլորտներուն մէջ՝ մինչեւ անցումային շրջանին աւարտը[9]։
2026-ի նպատակակէտը
[Խմբագրել | Խմբագրել աղբիւրը]2026-ին Քելվըն Քլայն իր գործունէութեան մէջ շեշտը կը դնէ թուային հաղորդակցութեան, մշակութային համագործակցութիւններու եւ նորաձեւութիւնը ժամանակակից մշակոյթի հետ համադրող գովազդային արշաւներու վրայ[10]։
Արտադրանք եւ վաճառանիշի պատմութիւն
[Խմբագրել | Խմբագրել աղբիւրը]Քելվըն Քլայնի վաճառանիշի հիմնական անուններէն են՝
- Calvin Klein Collection - բարձրակարգ ձեւաւորողական հագուստի շարք, որ 2017-ին կը վերանուանուի Calvin Klein 205W39NYC, 2019-ին կը դադրի գործել, իսկ 2025-ին կը վերականգնի։
- ck Calvin Klein -միջին եւ բարձրակարգ մակարդակի հաւաքածոներու շարք։
- Calvin Klein - հիմնական նորաձեւութեան եւ բարձրորակ մարզական հագուստի շարք։
- Calvin Klein Sport - ճերմակ պիտակի շարքի մարզական տարբերակը՝ «Macy’s» վաճառատուներուն համար։
- Calvin Klein Jeans - ճինզային հագուստի շարք։
- Calvin Klein Home - բարձրակարգ անկողնային պարագաներու, սրբիչներու, լոգարանի գորգերու եւ այլ պարագաներու հաւաքածոներ։
- The Khaki Collection - երիտասարդական ոճով միջինէն մինչեւ բարձրակարգ անկողնային պարագաներու եւ տան այլ իրերու շարք, որ կը դադրի գործելէ 2008-ին։
- Calvin Klein Golf-2007-ի վերջերուն գործարկուած կոլֆի հագուստի եւ պարագաներու շարք։
- Calvin Klein Underwear - ներքնազգեստի հաւաքածոներ։
- CK one Lifestyle - օծանելիքի, ներքնազգեստի եւ ճինզի ապրելակերպային վաճառանիշ, որ կը գործարկուի 2011-ին։
- Calvin Klein Watches + Jewelry - ժամացոյցներու շարք, որ կը գործարկուի 1997-ին, իսկ զարդեղէնի շարքը՝ 2004-ին։
Օծանելիքներ
[Խմբագրել | Խմբագրել աղբիւրը]
Քելվըն Քլայն ունի օծանելիքներու եւ բուրումնաւէտ ջուրերու զանազան շարքեր, որոնց շարքին են «Obsession», «CK Be» եւ «Eternity»։
Մինչեւ Մայիս 2005, Քելվըն Քլայնի օծանելիքներն ու անոնց համապատասխան բուրումնաւէտ արտադրանքները կը կառավարուէին «Calvin Klein Cosmetics Company» (CKCC)-ի կողմէ, որ «Unilever» ընկերութեան մաս կը կազմէր։
Նիւ Եորքահիմն «Coty» ընկերութիւնը հետագային «Unilever»էն կը գնէ Քելվըն Քլայնի օծանելիքներու արտօնագրային համաձայնութիւնները։
Վաճառանիշին նշանակը
[Խմբագրել | Խմբագրել աղբիւրը]Ինչպէս նորաձեւութեան այլ վաճառանիշեր, Քելվըն Քլայն եւս կը ստեղծէ իր նշանակը՝ «ck» խորհրդանիշը։
Արտօնագրատէրեր
[Խմբագրել | Խմբագրել աղբիւրը]2012-ի դրութեամբ, Քելվըն Քլայնի երեք մեծագոյն արտօնագրատէրերն էին՝
- Warnaco Group - արտօնագրային վարձատրութիւններու 40 տոկոսը։
- Coty -արտօնագրային վարձատրութիւններու 12 տոկոսը։
- G-III Apparel Group - արտօնագրային վարձատրութիւններու 14 տոկոսը։
Ձեւաւորողներ
[Խմբագրել | Խմբագրել աղբիւրը]2003-ին Քելվըն Քլայն «PVH Corp.»ի կողմէ ձեռք բերելէ ետք՝ Ֆրանսիսքօ Քոսթա կը նշանակուի Քելվըն Քլայն հաւաքածոյի կանանց հագուստի ստեղծագործական տնօրէն։ Քոսթա արդէն աշխատած էր Քլայնի հետ՝ նախքան հիմնադիրին ընկերութենէն հեռանալը, եւ 2003-ին ստանձնած էր այդ պաշտօնը։
Իթալօ Զուքքելի, որ նախապէս աշխատած էր «Jil Sander» եւ «Romeo Gigli» վաճառանիշներուն հետ, Քելվըն Քլայնի հետ համագործակցած էր վեց հաւաքածոներու ընթացքին, ապա 2004-ի գարնան նշանակուած էր Քելվըն Քլայնի տղամարդոց հագուստի գլխաւոր ձեւաւորող եւ ստեղծագործական տնօրէն։
Ապրիլ 2016-ին կը յայտարարուի, որ Ֆրանսիսքօ Քոսթա եւ Իթալօ Զուքքելի պիտի հեռանան ընկերութենէն։
Ռաֆ Սիմոնս 2017-ին կը փոխէ վաճառանիշին նշանակը, որ նախագծուած էր Փիթըր Սաւիլի կողմէ։ Այս տարբերակը կը գործածուի մինչեւ 2020-ի վերջը։
Օգոստոս 2016-ին Քելվըն Քլայն կը յայտարարէ, Ռաֆ Սիմոնսը վաճառանիշի գլխաւոր ստեղծագործական տնօրէն նշանակուիլը։ Ան պիտի վերահսկէր ձեւաւորման, համաշխարհային շուկայի, հաղորդակցութեան եւ տեսողական ստեղծագործական ծառայութիւններու բոլոր ոլորտները։
Սիմոնս համաշխարհային մակարդակով պիտի առաջնորդէր Քելվըն Քլայնի հագուստի, միջին մակարդակի, մարզական հագուստի, ճինզի, ներքնազգեստի եւ տան արտադրանքներու ստեղծագործական ռազմավարութիւնը։ Միաժամանակ Փիթըր Միւլիէ կը նշանակուի ստեղծագործող տնօրէն՝ անմիջականօրէն Սիմոնսի ենթակայութեամբ, պատասխանատու ըլլալով տղամարդոց եւ կանանց հագուստի, առօրեայ հագուստի եւ պարագաներու ստեղծագործական եւ ձեւաւորման տեսլականին կիրարկման համար։
Կը յայտարարուի նաեւ, որ Քեւըն Քարիկըն ընկերութենէն հեռացած էր՝ Ռալֆ Լորենի (Ralph Lauren) մէջ ստեղծագործական պաշտօն մը ստանձնելուն համար։ Սիմոնսի առաջին հաւաքածոները կը ներկայացուին 2017-ի Աշնան։
Դեկտեմբեր 2016-ին կը յայտարարուի, որ Էյմի Մելըն պիտի հեռանայ ընկերութենէն։
Յունուար 2017-ին կը յայտարարուի, որ Քլեմանթ Պըրժըվին Պլեքմեն պիտի ստանձնէ «Calvin Klein Home»ի ձեւաւորման փոխ նախագահի պաշտօնը։
Դեկտեմբեր 2018-ին կը յայտարարուի, որ Ռաֆ Սիմոնս ընդամէնը երկու տարի ընկերութեան մէջ աշխատելէ ետք, հեռացած է Քելվըն Քլայնէն։
Նոյեմբեր 2020-ին Ճեսիքա Լոմաքս կը նշանակուի ձեւաւորման համաշխարհային ղեկավար՝ առաջնորդելու համար Քելվըն Քլայնի համաշխարհային ձեւաւորման ռազմավարութիւնը եւ ընկերութեան գործունէութեան բոլոր ոլորտներուն մէջ ստեղծագործական ուղղութիւն տալու նպատակով։
2026-ի դրութեամբ, Վերոնիքա Լէոնի Քելվըն Քլայն հաւաքածոյի ստեղծագործական տնօրէնն է։ Ան այս պաշտօնին նշանակուած է 2024-ին եւ իր առաջին ամբողջական հաւաքածոն ներկայացուցած է 2025-ի Աշնան։ 2026-ին ան նախագծած է Քելվըն Քլայն հաւաքածոյի Գարնան եւ Աշնան հաւաքածոները, իսկ Սեպտեմբերին ներկայացուցած է նաեւ 2027-ի Գարնան հաւաքածոն[11]։